ရုရှားဘက်က ယူကရိန်းစစ်တပ်ကို နည်းလမ်းပေါင်းစုံနဲ့ စတင်တိုက်ခိုက်နေချိန်မှာ ယူကရိန်းဘက်ကလည်း ရုရှားလုပ် Su-25 ဖိုက်တာဂျက်လေယာဉ်တစင်း အပါအဝင် မောင်းသူမဲ့လေယာဉ် နှစ်စင်းကိုပါ ပစ်ချနိုင်ခဲ့တယ်လို့ သိရပါတယ်။
ဖေဖော်ဝါရီ ၁၉ ရက်မှာ ရုရှားကာကွယ်ရေးဝန်ကြီးဌာနက ထုတ်ပြန်ခဲ့တဲ့ စစ်ရေးညွှန်ကြားချက်တခုအရ ယူကရိန်းနိုင်ငံပိုင် ကူပြန့်စ်၊ ကရာစနီနဲ့ လိုင်းမန်းမြို့ လမ်းကြောင်းတွေမှာ တိုက်ခိုက်ခဲ့တယ်လို့ ဖော်ပြထားပါတယ်။
တချိန်တည်းမှာပဲ ဒွန်နက်စ်နဲ့ ဇာပိုရိုစကီးဒေသတွေက အမှတ် ၁၀၂ နယ်မြေကာကွယ်ရေး တပ်မဟာနဲ့ အမှတ် ၇၂ စက်မှုတပ်မဟာတို့ရဲ့ ကွပ်ကဲရေးစခန်းတွေကို ရုရှားစစ်တပ်က ပစ်မှတ်ထား တိုက်ခိုက်ခဲ့တယ်လို့လည်း သိရပါတယ်။
နောက်ထပ်တိုက်ခိုက်မှုအဖြစ် ရုရှားတပ်ဖွဲ့တွေဟာ ခမယ်နိတ်စကီးဒေသက ယူကရိန်းပိုင် ဒရုန်းအခြေစိုက်စခန်းတွေကို တိုက်ခိုက်ခဲ့တဲ့အပြင် ရုရှားဘက်က လေကြောင်းနဲ့ ဒုံးကျည် အမြောက်တပ်ဖွဲ့တွေဟာလည်း ယူကရိန်းအမြောက်တပ် အပါအဝင် တခြားပစ်မှတ်တွေကိုပါ ထိမှန်အောင် တိုက်ခိုက်နိုင်ခဲ့တယ်လို့ ဆိုပါတယ်။
ယူကရိန်းလက်နက်ကိုင်တပ်ဖွဲ့ (AFU) ရဲ့ စစ်ဦးစီးချုပ်ဖြစ်သူက လွန်ခဲ့တဲ့ ၂၄ နာရီအတွင်း ဒွန်နက်စ်နဲ့ လူဟန့်စ်ဒေသတွေမှာ ရုရှားရဲ့တိုက်ခိုက်မှုတွေကို ယူကရိန်းစစ်တပ်က တန်ပြန်နိုင်ခဲ့ကြောင်း အတည်ပြု ပြောပါတယ်။
ယူကရိန်းဘက်ကလည်း ဆိုဗီယက်ခေတ်ထုတ် Su-25 ရုရှားတိုက်လေယာဉ် ၁ စင်းအပြင် မောင်းသူမဲ့လေယာဉ် အများအပြားကိုပါ ပစ်ချနိုင်ခဲ့တယ်လို့ အခိုင်အမာ ပြောကြားခဲ့ပြီး ရုရှား လေကြာင်းကာကွယ်ရေး ဒုံးကျည်စနစ် တည်နေရာတွေနဲ့အတူ တခြားပစ်မှတ်တွေကိုပါ ထိမှန်အောင် တိုက်ခိုက်နိုင်ခဲ့တယ်လို့လည်း ဆိုပါတယ်။
ရုရှားမောင်းသူမဲ့လေယာဉ်တစီးကယူကရိန်းမြို့တော် ကိယက်ဗ်ကို ဒီဇင်ဘာ ၁၄ ရက် အစောပိုင်းက တိုက်ခိုက်ခဲ့ရာမှာ အဆောက်အအုံတခု ခေါင်မိုးပေါက်သွားခဲ့ပေမဲ့ လေကြောင်းရန် ကာကွယ်ရေးတပ်တွေက ဆိုးဆိုးရွားရွား မပျက်စီးအောင် တားဆီးနိုင်ခဲ့တယ်လို့ မြို့အာဏာပိုင်တွေက ပြောပါတယ်။
ဒေသခံ ယာရိုဆလပ်ဗ် ဗစ်နိုကူရို့ဗ်က သူအလုပ်သွားဖို့ အသင့်ဖြစ်နေချိန်မှာ တောက်ပတဲ့ မီးရောင်ကို မြင်လိုက်တယ်လို့ ပြောပါတယ်။
“သူတို့က ငါတို့ကို မီးပျက်ပြီး လူတိုင်း ဒုက္ခရောက်စေချင်တယ်။ ဒါပေမဲ့ ဘယ်သူမှ ဒုက္ခရောက်မှာမဟုတ်ဘူး။ အရေးကြီးဆုံးကတော့ သူတို့ (ရုရှား) တွေ ဒီမှာ မရှိနေသေးဘူး” လို့ ဒေသခံက ပြောပါတယ်။
ရှာဟိဒ် မောင်းသူမဲ့လေယာဉ်တွေရဲ့ ပုံမှန် ဆူညံသံကြောင့် နိုးလာတယ်လို့ ဒေသခံ နာတာလီယာ မယ်လ်နစ်ခ်က ပြောပါတယ်။
“ရှစ်လလောက်ရှိပြီ၊ ဒီလောက်တောင့်ခံပြီးမှတော့ ကျမတို့ ဘယ်လိုစွန့်လွှတ်နိုင်မလဲ။ သူ ကျမတို့ကို အနိုင်ယူနိုင်မှာ မဟုတ်ဘူးလို့ ထင်တယ်” လို့ သူက ဆက်ပြောပါတယ်။
ဒရုန်းယာဉ်နဲ့ တိုက်ခိုက်ရာမှာ မှောင်နေချိန် မောင်းသူမဲ့လေယာဉ်တွေကို ပစ်ချရခက်ခဲပေမဲ့ ယူကရိန်း လေကြောင်းရန်ကာကွယ်ရေးစနစ်တွေက ထိရောက်တယ်လို့ ယူကရိန်းလေတပ် ပြောရေးဆိုခွင့်ရှိသူ ယူရင်း အေးဟနပ်က ပြောပါတယ်။
ရုရှားဟာ အောက်တိုဘာလကတည်းက ယူကရိန်းရဲ့ စွမ်းအင်အခြေခံ အဆောက်အအုံအပေါ် ဒုံးကျည်တွေ၊ မောင်းသူမဲ့လေယာဉ် အများအပြားနဲ့ တိုက်ခိုက်ခဲ့တာပါ။
ဗုဒ္ဓဟူးနေ့က တိုက်ခိုက်မှုဟာ ကိယက်ဗ်ဒေသတွင်း စွမ်းအင်ထောက်ပံ့မှုအပေါ် အကျိုးသက်ရောက်မှုရှိမရှိ ချက်ချင်းမသိရသေးပါဘူး။
