ဘရာဇီးအမျိုးသားဘောလုံးအသင်းဟာ လာမယ့်စနေနေ့မှာ ချစ်ကြည်ရေးပွဲအဖြစ် မော်ရိုကိုအသင်းနဲ့ ယှဉ်ပြိုင်ဖို့ လေ့ကျင့်ရေးအစီအစဉ်တွေကို မတ်လ ၂၀ ရက်က ပြုလုပ်ခဲ့ပါတယ်။

ဘရာဇီးအသင်းသားတွေဟာ မော်ရိုကိုနိုင်ငံက တန်ဂျီရာမြို့ကို မတ်လ ၂၀ ရက်ကတည်းက ရောက်ရှိနေတာဖြစ်ပြီး ၅ ရက်ကြာ လေ့ကျင့်ရေးအစီအစဉ်တွေ ပြုလုပ်သွားဖို့ ရှိနေပါတယ်။

ဘရာဇီးနည်းပြ ရာမွန် မန်နီဇီစ်ရဲ့ ပထမဆုံးဦးဆောင်တဲ့ လေ့ကျင့်ရေးအစီအစဉ်တွေကို တနင်္လာနေ့ မွန်းလွဲပိုင်းကတည်းက ဘာတိုတာ အားကစားကွင်းမှာ ပြုလုပ်နေကြတာလည်း ဖြစ်ပါတယ်။

လက်ရွေးစင်အသင်းမှာ လူငယ်ကစားသမားတွေဖြစ်တဲ့ ဗစ်တာရိုကွီနဲ့ အန်ဒရီစတုန်းတို့လို ကစားသမားအသစ် ၁၀ ယောက်လောက် ပါဝင်လာပြီး ကတ်စ်မဲရိုး၊ အီဒါမီလီတာအို၊ ရိုဒရီဂို၊ ဗင်နီစီးယက်စ် ဂျူနီယာတို့လို အတွေ့အကြုံရှိတဲ့ ကစားသမားတွေနဲ့အတူ လေ့ကျင်ခန်း ဆင်းနေကြတာကို တွေ့ရပါတယ်။

PSG အသင်းကစားသမား နေမာကတော့ ခြေကျင်းဝတ်ဒဏ်ရာကြောင့် ဒီချစ်ကြည်ရေးပွဲစဉ်မှာ ပါဝင်လာနိုင်ခြင်း မရှိပါဘူး။

လီဗာပူးအသင်းဟာ မော်ရိုကိုကွင်းလယ်လူ အမ်မရာဘတ်ကို ပေါင်သန်း ၄၀ နဲ့ခေါ်ယူဖို့ ကြိုးပမ်းနေပါတယ်။

ဖီအိုရင်တီးနားကစားသမား အမ်မရာဘတ်ဟာ အခုနှစ်ကမ္ဘာ့ဖလားပြိုင်ပွဲမှာ မော်ရိုကို အသင်းကို ဆီမီးဖိုင်နယ်တက်ရောက်အောင် စွမ်းဆောင်နိုင်ခဲ့သူဖြစ်ပြီး ကမ္ဘာ့ဖလားအကောင်းဆုံး အသင်းမှာလည်း ရွေးချယ်ခံခဲ့ရသူပါ။

ပြင်သစ်သတင်းဌာန ဖုဒ်မာကာတိုရဲ့ဖော်ပြချက်အရ လီဗာပူးနည်းပြ ယာဂန်ကလော့ပ်ဟာ အမ်မရာဘတ်ရဲ့ ကိုယ်စားလှယ်တွေနဲ့ ကြိုတင်တွေ့ဆုံခဲ့ပြီး ကစားသမား ဖြစ်သူနဲ့လည်း မကြာခင်မှာ ဆွေးနွေးဖို့ စီစဉ်ထားတယ်လို့သိရပါတယ်။

အသက်၂၆ နှစ်ရှိအမ်မရာဘတ်ကလည်း လီဗာပူးအသင်းဆီ ပြောင်းရွှေ့လိုနေတယ်လို့ ဆိုပါတယ်။

နည်းပြ ကလော့ပ်ဟာ ကွင်းလယ်နေရာအတွက် ဒေါ့မွန်က ဘယ်လင်ဂမ်ကိုလည်း ပစ်မှတ်ထားနေဆဲလို့ သိရပါတယ်။