မကွေးတိုင်း၊ ပွင့်ဖြူမြို့နယ် မဲဇလီရဲစခန်းကို ဒီဇင်ဘာ ၃၁ ရက်က ရှော့တိုက်ဒုံးနဲ့ တိုက်ခိုက်ခဲ့လို့ စစ်ကောင်စီဘက်က ၄ ယောက် ဒဏ်ရာရရှိခဲ့တယ်လို့ ​ပွင့်ဖြူ ပ.က.ဖက ဇန်နဝါရီ ၂ ရက် ညနေပိုင်းမှာ ထုတ်ပြန်ပါတယ်။

ပွင့်ဖြူမြို့နယ် မဲဇလီရဲစခန်းကို ဒီဇင်ဘာ ၃၁ ရက် ည ၉ နာရီလောက်မှာ ရှော့တိုက်ဒုံး ၄ လုံးနဲ့ ပစ်ခတ်တိုက်ခိုက်ရာ ၃ လုံး Error ဖြစ်ပြီး တလုံးပေါက်ကွဲခဲ့တာကြောင့် ရဲ ၂ ယောက်၊ စစ်သား ၁ ယောက်နဲ့ စစ်ကောင်စီသတင်းပေး ၁ ယောက် ဒဏ်ရာရခဲ့တယ်လို့ ပွင့်ဖြူ ပ.က.ဖ တာဝန်ခံ ရာဇာကြီးက ဒီဗွီဘီကို ပြောပါတယ်။

အဲဒီတိုက်ခိုက်မှုဟာ မဲဇလီကြိုးတံတားပေါ်မှာ မြင့်မြတ်စွာ ကျဆုံးခဲ့တဲ့ သရက်-ကံမ ပြည်သူ့ကာကွယ်ရေးရဲဘော်တွေအတွက် လက်စားချေတာဖြစ်သလို နှစ်သစ်ကူး အထိမ်းအမှတ်အနေနဲ့ တိုက်ခိုက်ခဲ့တာလို့ ဆိုပါတယ်။

ပွင့်ဖြူ ပ.က.ဖ အနေနဲ့ နောက်နောင်မှာ ပြည်သူလူထုကို ဒုက္ခရောက်အောင် လျှပ်စစ်မီတာတွေကို ဖြုတ်ယူတာတွေ၊ မီတာဘေတွေကို ဖိအားပေးပြီး အတင်းအကျပ် ဆောင်ခိုင်းတာတွေ ပြုလုပ်ကာ စစ်ကောင်စီကို အားပေးအားမြှောက်လုပ်နေတဲ့ လျှပ်စစ်မန်နေဂျာနဲ့ လျှပ်စစ်ရုံးကိုလည်း တိုက်ခိုက်သွားမယ်လို့ ရာဇာကြီးက ပြောပါတယ်။

​ပွင့်ဖြူ ပ.က.ဖ ရဲဘော်တွေ အထိအခိုက် အကျအဆုံးမရှိဘဲ ဆုတ်ခွာနိုင်ခဲ့ပြီး ရဲဘော်တွေ လုံခြုံတဲ့နေရာရောက်အောင် စောင့်နေရတာကြောင့် သတင်းထုတ်ပြန်တာ နောက်ကျခဲ့ရတယ်လို့ ဆိုပါတယ်။

အဲဲဒီတိုက်ပွဲနဲ့ ပတ်သက်လို့တော့ စစ်ကောင်စီဘက်က ထိခိုက်ဒဏ်ရာရတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

မကွေးတိုင်းဒေသကြီး ပွင့်ဖြူမြို့နယ်မှာ အာဏာသိမ်းစစ်ခေါင်းဆောင်ရဲ့ ခရီးစဥ်ရှိပေမယ့် မနေ့က ညပိုင်းမှာ မဲဇလီရဲစခန်းရဲစခန်းကို ရှော့တိုက်ဒုံးနဲ့ ပစ်ခတ်တိုက်ခိုက်ခဲ့တယ်လို့ ပွင့်ဖြူဒေသခံတွေဆီကနေ သိရပါတယ်။

“မဲဇလီရဲစခန်းကို မနေ့က ည ၇ နာရီလောက်မှာ ရှော့တိုက်ဒုံးတစ်လုံးနဲ့ ပစ်ခတ်တိုက်ခိုက်ခဲ့တာဗျ။ စခန်းအတွင်းထဲမှာ ကျပြီးပေါက်ကွဲတာကြောင့် ထိခိုက်ပျက်စီးမှုတော့ ရှိနိုင်တယ်။ နောက်ပြီးတော့ သစ်ပုတီးကုန်းရွာက မိုင်တဲလ် တာဝါတိုင်မှာလည်း လက်လုပ်ဗုံးတစ်လုံးပေါက်ကွဲခဲ့တယ်” လို့ ဒေသခံတစ်ယောက်က ဒီဗွီဘီ ကို ပြောပါတယ်။

အဲဒီဖောက်ခွဲတိုက်ခိုက်တာတွေကို သက်ဆိုင်ရာ ကာကွယ်ရေးတပ်ဖွဲ့တွေက သတင်းမထုတ်ပြန်သေးသလို ဘယ်အဖွဲ့က ပြုလုပ်တယ်ဆိုတာတော့ မသိရသေးဘူးလို့ ဆိုပါတယ်။

ပွင့်ဖြူမြို့နယ်ကို ဖေဖော်ဝါရီလ ၁၀ ရက်နေ့မှာ အာဏာသိမ်းစစ်ခေါင်းဆောင် မင်အောင်လှိုင်ရဲ့ ခရီးစဥ်ရှိတာကြောင့် နေရာအနှံ့ လုံခြုံရေးတွေ တင်းကျပ်ထားတယ်လို့ ဒေသခံက ပြောပါတယ်။

“ပွင့်ဖြူမြို့ ဘူတာရုံအဟောင်းကို သိန်း ၈၀ လောက်အကုန်ကျခံပြီး ဘန်ဂလိုလုပ်တယ်။ ကွန်ကရစ်လမ်းခင်းပြီးတော့ ဟတ်စကီးကွင်း ၂ ကွင်းဖောက်ထားတယ်။ လယ်ကိုင်းနဲ့ ပွင့်ဖြူကြားမှာ စစ်ကောင်စီဘက်က တစ်မိုင်ကို တစ်ဂိတ်နှုန်းနဲ့ ၇ ဂိတ်ရှိတယ်။ လယ်ကိုင်းနဲ့ စကုကြားမှာလည်း  ၁၀ ဂိတ်လောက် လုံခြုံရေးချထားတယ်။” 

အာဏာသိမ်းစစ်ခေါင်းဆောင်ဟာ ပွင့်ဖြူမြို့နယ်ထဲက သက်သာ၊ ပန်းတောင်းမှာ ဘုရားထီးတင်ပွဲကို ဖေဖော်ဝါရီ ၁၀ ရက်နေ့မှာ သွားရောက်ထီးတင်မယ်လို့ သိရပြီး အဲဒီရွာမှာလည်း စစ်ကောင်စီက တပ်စွဲထားတယ်လို့ ဆိုပါတယ်။

“ဘုရားကတော့ နဂိုရှိပြီးသား ဘုရားကို ယတြာအစီမံတွေနဲ့ ငုံတည်ထားတာဗျ။ ထီးတင်ပွဲမှာလည်း ယတြာအနေနဲ့ ထန်းသီးမုန့်ကျွေးမယ်လို့ သိရပြီး ဝင်ခွင့်လက်မှတ်ပါမှ ဝင်လို့ရမယ်လို့ သိရတယ်။” 

အဲဒီ ထီးတင်ပွဲကို ဖောက်ခွဲတာတွေပြုလုပ်ရင် အနီးနားက ကျေးရွာတွေကို မီးရှို့ဖျက်ဆီးပစ်မယ်ဆိုပြီး စစ်ကောင်စီတပ်သားတွေနဲ့ ပျူစောထီးတွေက ခြိမ်းခြောက်ထားတယ်လို့ ဆိုပါတယ်။

ဂိတ်တွေ အဆင့်ဆင့် အစစ်ဆေးတွေ ပြုလုပ်နေတာကြောင့် ဒေသခံတောင်သူတွေ လုပ်ငန်းခွင် သွားရောက်ဖို့ အခက်ခဲဖြစ်နေကြပါတယ်။

အာဏာသိမ်း စစ်ခေါင်းဆောင်ဟာ မကွေးတိုင်းအတွင်းမှာ အုပ်ချုပ်ရေးယန္တရား ပျက်ပြားနေတာကြောင့် ဒီကနေ့ မွန်းလွဲ ၁ နာရီမှာ မကွေးမြို့တော်ခန်းမမှာ ဌာနဆိုင်ရာဝန်ထမ်းတွေနဲ့ တွေ့ဆုံမယ် သတင်းရတယ်လို့ ပြည်သူ့ကာကွယ်ရေး တပ်ဖွဲ့ဝင်တစ်ယောက်က ပြောပါတယ်။

မကွေးတိုင်းဒေသကြီး ယောဒေသအတွင်းက ဂန့်ဂေါမြို့နယ်၊ ထီးလင်းမြို့နယ်၊ ဆောမြို့နယ်နဲ့ ပခုက္ကူခရိုင်ထဲက မြိုင်မြို့နယ်၊ ပေါက်မြို့နယ်တွေမှာ PDF တပ်ဖွဲ့တွေက နယ်မြေစိုးမိုးထားပြီး စစ်ကောင်စီရဲ့ အုပ်ချုပ်ရေးယန္တရား ပျက်ပြားနေတယ်လို့ သိရပါတယ်။