မန္တလေးတိုင်း၊ မြင်းခြံခရိုင်မှာ  သြဂုတ် ၁ ရက်မှ သြဂုတ် ၃ ရက်အထိ သုံးရက်ဆက်တိုက် ရပ်ကျေးအုပ်ချုပ်ရေးမှူးတွေ ပစ်ခတ်သတ်ဖြတ်ခံနေရတယ်လို့ ဒေသခံတွေဆီက သိရပါတယ်။

သြဂုတ် ၁ ရက် ညနေ ၃ နာရီလောက်မှာ မြင်းခြံခရိုင် ငါန်းဇွန်မြို့နယ်က စီကောင်းကျေးရွာ အုပ်ချုပ်ရေးမှူး ဦးသိန်းကို အမည်မသိ သေနတ်သမား ၂ ဦးက ပစ်ခတ်ခဲ့တာကြောင့် ဦးသိန်း သေဆုံးခဲ့တာလို့ ဆိုပါတယ်။

စီကောင်းကျေးရွာအုပ်ချုပ်ရေးမှူး ဦးသိန်း ပစ်သတ်ခံရတာနဲ့ ပတ်သက်ပြီး ဘုံသာကျေးရွာနဲ့ ရွာသစ်ကုန်းကျေးရွာတွေက ရွာသား ၉ ဦးကိုလည်း စစ်ကောင်စီက ဖမ်းဆီးခဲ့နေပါတယ်။

သြဂုတ် ၃ ရက် ညနေ ၃ နာရီက ငါန်းဇွန်မြို့နယ် လက်ပံကျင်းတောင်ရွာ ဘုန်းကြီးကျောင်းထဲမှာ စစ်ကောင်စီက လာရောက်တပ်စွဲထားတယ်လို့ ရွာသားတဦးက ပြောပါတယ်။

မြင်းခြံခရိုင် တောင်သာမြို့နယ် နန်းမြင့်ကျေးရွာမှာလည်း သြဂုတ် ၂ ရက် နေ့လယ်က နန်းမြင့်ကျေးရွာ အုပ်ချုပ်ရေးမှူး ပစ်ခတ်ခံရပြီး သေဆုံးခဲ့တယ်လို့ TTA-ပြောက်ကျား (တောင်သာ) ရဲ့ ထုတ်ပြန်ချက်အရ သိရပါတယ်။

အလားတူ မြင်းခြံမြို့နယ် လယ်သစ်ကျေးရွာ အုပ်ချုပ်ရေးမှူး ဦးမြင့်လွင်နဲ့ လယ်သစ်ရွာ ပျူစောထီး မောင်နိုင်တို့ သြဂုတ် ၃ ရက် ည ၇ နာရီ‌လောက်က  အသတ်ခံရတာကြောင့် မြင်းခြံခရိုင်မှာ ၃ ရက်အတွင်း ပျူစောထီးနဲ့ အုပ်ချုပ်ရေးမှူး ၄ ဦးထိ အသတ်ခံနေတယ်လို့ ဆိုပါတယ်။

မြင်းခြံခရိုင်အတွင်းက ရပ်ကျေးအုပ်ချုပ်ရေးမှူးတွေ အမြန်ဆုံး နုတ်ထွက်ပေးဖို့ TTA -Guerrilla Army က သတိပေးထား​တယ်လို့ တောင်သာ ပြောက်ကျားတပ်က သိရပါတယ်။

မန္တလေးတိုင်းဒေသကြီး မြင်းခြံခရိုင် ၄ မြို့နယ်မှာ   ဇူလိုင် ၃၀ ရက်ထိ  ကိုဗစ်-၁၉ အတည်ပြုလူနာ ၂၉၀၆ ဦးနဲ့ သေဆုံး ၁၀၇ ဦးရှိပြီလို့ ဒေသတွင်း ပရဟိတအသင်းတွေဆီက သိရပါတယ်။

မြင်းခံမြို့နယ်မှာ အတည်ပြုလူနာ ၅၃၂ ဦးနဲ့ သေဆုံးသူ ၅၀၊ တောင်သာမြို့နယ်မှာ အတည်ပြုလူနာ ၇၂၇ ဦးနဲ့ သေဆုံးသူ ၂၀၊ ငါန်းဇွန်မြို့နယ်မှာ အတည်ပြုလူနာ ၄၃၁ ဦးနဲ့ သေဆုံးသူ ၂၀၊ နွားထိုးကြီးမြို့နယ်မှာ အတည်ပြုလူနာ ၁၂၁၆ ဦးနဲ့ သေဆုံးသူ ၁၇ ဦး ရှိပြီလို့ ဆိုပါတယ်။

မြင်းခြံခရိုင်အတွင်း နွားထိုးကြီး၊ တောင်သာနဲ့ ငါန်းဇွန်မြို့နယ်တို့ကို  Stay   At   Home  သတ်မှတ်ထားတယ်လို့ သိရပါတယ်။