အခု ဇွန်လနောက်ဆုံးပတ်ထဲမှာ မြစ်ရေတွေဟာ လက်ရှိရေမှတ်တွေထက် ၅ ပေလောက်အထိ မြင့်တက်လာနိုင်ပြီး ဧရာဝတီမြစ်ရေဟာ မနေ့ညနေက ရွှေကူမြို့ရဲ့ စိုးရိမ်ရေမှတ်အထက်ကို ရောက်ခဲ့တယ်လို့  မိုးဇလဌာနက  ထုတ်ပြန်ပါတယ်။

ဒီ ၁၀ ရက်အတွင်းမှာ ဧရာဝတီမြစ်ရေဟာ မြစ်ကြီးနားမြို့၊ ဗန်းမော်မြို့၊ ရွှေကူနဲ့ ကသာမြို့တို့မှာ ၁ ပေကနေ ၃ ပေလောက်၊ သပိတ်ကျင်းမြို့၊ မန္တလေးမြို့၊ စစ်ကိုင်းမြို့၊ မြင်းမူမြို့၊ ပခုက္ကူမြို့၊ ညောင်ဦးမြို့၊ ချောက်မြို့၊ မင်းဘူးမြို့၊ မကွေးမြို့၊ အောင်လံမြို့၊ ပြည်မြို့၊ ဆိပ်သာမြို့၊ ဟင်္သာတမြို့နဲ့ ဇလွန်မြို့တို့မှာ ၂ ပေကနေ ၄ ပေလောက်အထိ လက်ရှိရေမှတ်တွေရဲ့အထက်ကို မြင့်တက်လာနိုင်တယ်လို့ ခန့်မှန်းထားပါတယ်။

ချင်းတွင်းမြစ်ရေကတော့ ခန္တီးမြို့၊ ဟုမ္မလင်းမြို့၊ ဖောင်းပြင်မြို့၊ မော်လိုက်မြို့၊ ကလေးဝမြို့၊ မင်းကင်းမြို့၊ ကနီမြို့နဲ့ မုံရွာမြို့တို့မှာ ၂ ပေကနေ ၅ ပေလောက်အထိ အခုရောက်နေတဲ့ ရေမှတ်တွေရဲ့အထက်ကို တက်လာနိုင်တယ်လို့ ဆိုပါတယ်။

ပြီးတော့ မြစ်သာမြစ်ရေဟာ ကလေးမြို့မှာ ၁ ပေလောက်၊ ဒုဋ္ဌဝတီမြစ်ရေဟာ သီပေါမြို့၊ ရွှေစာရံနဲ့ မြစ်ငယ်မြို့တို့မှာ ပေထက်ကနေ ၃ ပေလောက်၊ စစ်တောင်းမြစ်ရေဟာ တောင်ငူမြို့နဲ့ မဒေါက်မြို့တို့မှာ ၁ ပေကနေ ၃ ပေလောက်၊ ရွှေကျင်မြစ်ရေဟာ ရွှေကျင်မြို့မှာ ၂ ပေလောက်၊ ပဲခူးမြစ်ရေဟာ ဇောင်းတူမြို့နဲ့ ပဲခူးမြို့တို့မှာ ၁ ပေကနေ ၃ ပေလောက်အထိ၊ သံလွင်မြစ်ရေဟာ ဖားဆောင်းမြို့နဲ့ ဘားအံမြို့တို့မှာ ၁ ပေကနေ ၃ ပေလောက်အထိ၊ သောင်ရင်းမြစ်ရေဟာ မြဝတီမြို့မှာ ၁ ပေခွဲလောက်၊ ငဝန်မြစ်ရေဟာ ငါးသိုင်းချောင်းမြို့၊ သာပေါင်းမြို့နဲ့ ပုသိမ်မြို့တို့မှာ ၁ ပေကနေ ၃ ပေလောက်၊ တိုးမြစ်ရေဟာ မအူပင်မြို့မှာ ၂ ပေလောက်၊ ကုလားတန်မြစ်ရေဟာ ပလက်ဝမြို့နဲ့ ကျောက်တော်မြို့တို့မှာ ၂ ပေကနေ ၅ ပေလောက်၊ လေးမြို့မြစ်ရေဟာ မြောက်ဦးမြို့မှာ ၁ ပေလောက်၊ ဘီးလင်းမြစ်ရေဟာ ဘီးလင်းမြို့မှာ ၂ ပေလောက်အထိ လက်ရှိရေမှတ်တွေအထက်ကို မြင့်တက်နိုင်တယ်လို့ ခန့်မှန်းထားပါတယ်။

ဧရာဝတီမြစ်ရေဟာ ဇွန် ၂၁ ရက် ညနေ ၆ နာရီခွဲအချိန်က ရွှေကူမြို့ရဲ့ စိုးရိမ်ရေမှတ်အထက် ၂ လက်မအထိကျော်လွန်ခဲ့ပြီး ဒီနေ့ ဇွန် ၂၂ ရက်နေ့ မနက်ပိုင်းမှာတော့ စိုးရိမ်ရေမှတ်အောက်ကို ပြန်ရောက်သွားပြီလို့လည်း ထုတ်ပြန်ထားပါတယ်။

မန္တလေးတိုင်း၊ သပိတ်ကျင်းမြို့နယ်၊ တွင်းငယ်ကျေးရွာမှာ သြဂုတ် ၂၃ ရက်က ဧရာဝတီမြစ်ရေ မြင့်တက်လာလို့ အိမ်ထောင်စု ၅၁ စု ယာယီပြောင်းရွှေခဲ့ရတယ်လို့ မန္တလေးတိုင်း ဘေးအန္တရာယ်ဆိုင်ရာစီမံခန့်ခွဲမှုဦးစီးဌာနကနေ သိရပါတယ်။ 

ဩဂုတ် ၂၄  ရက်က ယာယီပြောင်းရွှေ့နေထိုင်ရတဲ့ အိမ်ထောင်စု ၅၂ စု လူဦးရေ ၂၂၆ ဦး အတွက် ဆန်ရိက္ခာဖိုး ထောက်ပံ့ငွေ ၅ သိန်းခွဲကျော်ကို ထောက်ပံ့ပေးခဲ့တယ်လို့လည်း သိရပါတယ်။ 

တွင်းငယ်ကျေးရွာရှိ အနိမ့်ပိုင်းနေရာတွေကို  ရေစတင်ဝင်ရောက်နေတာဖြစ်ပြီး အရင်ကလည်း ဧရာဝတီမြစ်ရေမြင့်တက်လာပါက  အဲဒီရွာထဲကို ရေဝင်ရောက်လေ့ရှိပါတယ်။ 

သပိတ်ကျင်းမြို့ရဲ့ ဧရာဝတီမြစ်ရေဟာ ၁၃၇၄ စင်တာမီတာသို့ ရောက်ရှိနေပြီး စိုးရိမ်ရေအမှတ် ရောက်ရှိဖို့ ၁၀၆ စင်တာမီတာ အလိုမှာ ရောက်ရှိနေတာပါ။

သပိတ်ကျင်းမြို့ရဲ့ အနိမ့်ပိုင်းကျေးရွာတွေမှာ နယ်မြေခံ မီးသတ်တပ်ဖွဲ့က မြစ်ရေမြင့်တက် လာနိုင်ကြောင်း လိုက်လံအသိပေးတာတွေ လုပ်ဆောင်ပေးနေပြီး ယာယီရွှေ့ပြောင်းဖို့ လိုအပ်သည့်နေရာတွေမှာ  ပြောင်းရွှေရေး ကူညီပေးနေပါတယ်။