ထိုင်းနိုင်ငံအလယ်ပိုင်း၊ စမွတ်ပရကန်ခရိုင်၊ ဘန်ဖရီမြို့နယ်ထဲမှာ မြန်မာအမျိုးသား  ၁ ဦး ဆွဲကြိုးချသေဆုံးမှုဖြစ်ခဲ့တယ်လို့ ထိုင်းရတ်သတင်းမှာ ဖော်ပြပါတယ်။

ဖေဖော်ဝါရီ ၆ ရက် ည ၉ နာရီလောက်က ဘန်ဖရီမြို့နယ်၊ ဘန်ပလာရပ်ကွက်ထဲမှာ လူတစ်ယောက် ဆွဲကြိုးချသေဆုံးကြောင်းသတင်းရလို့ ဘန်ဖရီဆေးရုံက ဆရာဝန်၊ လူနာတင်ကားတွေနဲ့အတူ သွားရောက်စစ်ဆေးခဲ့တယ်လို့ ဘန်ဖရီရဲစခန်း တာဝန်ရှိသူက သတင်းထောက်ကို ပြောပါတယ်။ 

အခင်းဖြစ်ပွါးတဲ့နေရာဟာ ၃ ထပ်တိုက်ခန်းရဲ့ ဒုတိယထပ် နောက်ဖေးခန်းမှာဖြစ်ကြောင်း၊ အမျိုးသား ၁ ဦးဟာ နိုင်လွန်ကြိုးအစိမ်းရောင်နဲ့ ဆွဲကြိုးချသေဆုံးတဲ့အနေအထားရှိပြီး လက်နှစ်ဖက်ကိုလည်း ကြိုးနဲ့ရစ်ထားကြောင်း၊ အကြမ်းဖက်ခံထားရတဲ့ ဒဏ်ရာတွေမရှိဘဲ လွန်ခဲ့တဲ့ ၁၀ နာရီလောက်က အသက်ထွက်သွားတာလို့ တာဝန်ရှိသူက ပြောပါတယ်။ 

မခင်စန္ဒာရဲ့ထွက်ဆိုချက်အရ သေဆုံးသူဟာ သူ့ဖခင် ဦးစောအောင်ထွန်းသိန်း (၅၆ နှစ်) ဖြစ်ကြောင်း ၊အဲဒီနေ့မနက်စောစောက  သူတို့လင်မယား နှစ်ယောက် ဖခင်ကိုအခန်းမှာထားခဲ့ပြီး အလုပ်သွားလုပ်ကြောင်း၊ ည ၈ နာရီခွဲပြန်လာတဲ့အခါ အခန်းမီးတွေပိတ်ထားကြောင်း၊ မီးဖွင့်ကြည့်တော့ အဖေကို အိမ်ခန်းထဲမှာမတွေ့လို့ နောက်ဖေးဘက်သွားရှာရာမှာ ဆွဲကြိုးချ အနေအထားနဲ့ သေဆုံးနေလို့ ရဲစခန်းကို အကြောင်းကြားလိုက်တာလို့ ဆိုပါတယ်။ 

ဖခင်ဖြစ်သူမှာ စကားအလွန်နည်းပြီး ဘာသိဘာသာနေတတ်ကြောင်း၊ အလုပ်လက်မဲ့ဖြစ်နေတာ လအတန်ကြာပြီဖြစ်လို့ မြန်မာပြည်ပြန်မယ်လို့ ပြောခဲ့ကြောင်း၊ ဒါပေမဲ့ သားသမီးတွေအကုန် ထိုင်းမှာရောက်နေလို့ မြန်မာပြည်မှာ အဖေတယောက်တည်းနေရမှာစိုးလို့ တားမြစ်ခဲ့ကြောင်း၊ အိမ်ပြန်ချင်တာ မပြန်ရလို့စိတ်ခုပြီး ခုလိုလုပ်သွားတာဖြစ်နိုင်တယ်လို့ သမီးက ပြောပါတယ်။ 

ရဲတပ်ဖွဲ့ကလည်း သေဆုံးသူဟာ အလုပ်လက်မဲ့စိတ်ဖိစီးလို့ သေကြောင်းကြံတာလို့ ကနဦးသုံးသပ်ပြီး ဖြစ်ရပ်မှန်သိရဖို့ အလောင်းကို ဆေးရုံမှာထပ်မံဓာတ်ခွဲကြည့်မှာဖြစ်သလို အဲဒီအနီးနားက စီစီကင်မရာတွေလည်း ပြန်လည်စစ်ဆေးကြည့်ရှုသွားမယ်လို့  ပြောပါတယ်။

ထိုင်းနိုင်ငံ၊ ဘန်ကောက်၊ ဘန်ဘွမ်နယ်မြေ ဧကချိုင်းလမ်းသွယ် ၈၉ ထဲမှာ ပြီးခဲ့တဲ့ နိုဝင်ဘာ ၁၀ ရက်က သေဆုံးနေတဲ့ မြန်မာအမျိုးသမီးတယောက်ရဲ့အလောင်း တွေ့ရှိပြီးနောက် ဘန်ခွန်ထိန်းနယ်မြေရဲတပ်ဖွဲ့က တရားခံကို လိုက်လံစုံစမ်းရှာဖွေနေရာမှာ နောက်တနေ့မှာပဲ အခန်းချင်းကပ်လျက် နေထိုင်တဲ့ မြန်မာအမျိုးသားတယောက်ကို ဖမ်းဆီးလိုက်တယ်လို့ မန်နေဂျာအွန်လိုင်း ထိုင်းသတင်းမှာ ဖော်ပြပါတယ်။

ဒီအမှုနဲ့ပတ်သက်ပြီး သေဆုံးသူ မခင်မာဝင်း (၂၉ နှစ်) ရဲ့ ရည်းစားကိုရော၊ အခန်းဘေးက လူတွေကိုပါ ရဲတပ်ဖွဲ့က ခေါ်ယူစစ်ဆေးခဲ့ရာမှာ သူ့ရည်းစားမှာတော့ မသင်္ကာစရာ မတွေ့ရဘူးလို့ ဆိုပါတယ်။

ဒါပေမဲ့ ဘေးခန်းက အမျိုးသမီးကို ရဲကစစ်ဆေးမေးမြန်းရာမှာတော့ သူ့ခင်ပွန်းက တခြားကို ထွက်သွားပြီလို့ ထွက်ဆိုခဲ့တဲ့အတွက် စီစီတီဗွီကင်မရာတွေ လိုက်လံစစ်ဆေးရာမှာ အဆိုပါ အမျိုးသမီးရဲ့ ခင်ပွန်းဟာ ၉ ရက်နေ့ မနက်စောစောကတည်းက အဆောင်ကနေ ထွက်ခွာသွားတာတွေ့ရလို့ ခြေရာလိုက်ကောက်ရာက နိုဝင်ဘာ ၁၁ ရက် မွန်းလွဲ ၁ နာရီခွဲမှာ ချချိန်းဆောင်းမြို့မှာ ဖမ်းဆီးရမိခဲ့တာ ဖြစ်ပါတယ်။

ဖမ်းမိတဲ့အမျိုးသားမှာ အသက် ၂၈ နှစ်အရွယ်ရှိ အောင်ဇော်ဝင်းဖြစ်ပြီး လျှပ်စစ်ပစ္စည်း ရောင်းဝယ်ရေးဆိုင်က အလုပ်သမားဖြစ်ကြောင်း၊ သူဟာ ဇနီးနဲ့ သားသမီးနဲ့အတူ သေဆုံးသူ မခင်မာဝင်းနဲ့ အခန်းချင်းကပ်လျက် နေထိုင်သူလို့ ဆိုပါတယ်။

ပြီးခဲ့တဲ့ နိုဝင်ဘာ ၈ ရက် ညနက်ချိန် ထိုင်းနိုင်ငံရဲ့ လွိုင်ကထုန်မီးထွန်းပွဲမှာ သူဟာ အပြင်ကနေ သောက်စားမူးယစ်ပြီး ပြန်လာကြောင်း၊ သူ့အခန်းထဲမှာ ဇနီးနဲ့ကလေး ရှိမနေဘဲ ဘေးခန်းကို ချောင်းကြည့်တော့ မခင်မာဝင်းမှာ အိပ်ပျော်နေလို့ ခြင်လုံဇကာကိုဟပြီး အတွင်းကနေ တံခါးဖုကို လှည့်ဖွင့်ခဲ့ကြောင်း၊ အဲဒီနောက် မုဒိမ်းကျင့်ဖို့ကြံရွယ်စဉ် အမျိုးသမီးက လန့်နိုးလာကာ အော်ဟစ်အကူအညီတောင်းမလို့ လုပ်တာကြောင့် အဖမ်းခံရမှာ စိုးပြီး လည်ပင်းကို အရင်ညှစ်ကာ အနီးကတုတ်နဲ့ ခေါင်းကိုရိုက်ထည့်လိုက်တာလို့ ဖွင့်ဟဝန်ခံပါတယ်။

မခင်မာဝင်း သေသွားတော့ အဲဒီညမှာ ဟန်မပျက် သူ့အခန်းထဲပြန်နေပြီး မနက်မိုးလင်းတော့ သူငယ်ချင်းရှိရာ ချချိန်းဆောင်းဘက် ရှောင်ထွက်လာစဉ် အဖမ်းခံလိုက်ရတာလို့ ဆိုပါတယ်။

ရဲတွေက သူ့ကို ဘန်ခွန်ထိန်းရဲစခန်းကို ပြန်ခေါ်လာပြီး တမင်ကြံရွယ်လူသတ်မှုနဲ့ ကနဦး အရေးယူထားကြောင်း၊ မုဒိမ်းမှု ကျူးလွန်ခြင်း ရှိမရှိကိုတော့ ဓာတ်ခွဲခန်းက ဆေးစစ်ချက်အဖြေ စောင့်ကြည့်ဦးမယ်လို့ ရဲတပ်ဖွဲ့က သတင်းထောက်တွေကို ပြောပါတယ်။

သေဆုံးသူ မခင်မာဝင်းဟာ တနင်္သာရီတိုင်း ထားဝယ်မြို့နယ်ဘက်ကဖြစ်ပြီး အသက် ၈ နှစ် အရွယ် သားတယောက် မြန်မာပြည်မှာ ကျန်ခဲ့ကာ ထိုင်းနိုင်ငံ ဘန်ကောက် ဧကချိုင်းလမ်းသွယ် ၈၉ ရှိ စက်ရုံတရုံမှာ အလုပ်လုပ်နေတာ ဖြစ်ပါတယ်။