ထိုင်းမြန်မာနယ်စပ် တာ့ခ်ခရိုင် မဲဆောက်မြို့နယ်မှာ တရားမဝင် ဝင်ရောက်လာတဲ့ မြန်မာနိုင်ငံသား ၄၀ ဖမ်းဆီးခံရတယ်လို့ AEC အာဆီယံထိုင်းသတင်းမှာ ဖော်ပြပါတယ်။

ထိုင်းစစ်တပ် အမှတ် ၁၄  တပ်ရင်းလက်အောက်ခံတပ်ဖွဲ့ဟာ ဒီနေ့မနက်အစောပိုင်းက မဲဆောက်မြို့နယ် မယ်တောင်းကျေးရွာအုပ်စုထဲမှာ နယ်မြေလုံခြုံရေး စောင့်ကြပ်စဉ် ဘန့်ဒွန်းချိုင်းရွာဘက်ကနေ တရားမဝင် ဝင်ရောက်လာတဲ့ မြန်မာအမျိုးသား  ၂၈ ဦး၊ အမျိုးသမီး ၁၂ ဦး ပေါင်း ၄၀ ကို ဖမ်းဆီးရမိတာလို့ ဆိုပါတယ်။ 

ဖမ်းဆီးရမိသူတွေအားလုံးကို ATK စနစ်နဲ့ ကိုဗစ်-၁၉ ရောဂါစစ်ဆေးပြီး လဝက ဥပဒေနဲ့ဆက်လက်အရေးယူဖို့ မဲဆောက်မြို့နယ်ရဲတပ်ဖွဲ့ကို ပို့ဆောင်လိုက်တယ်လို့ ဆိုပါတယ်။ 

ဖမ်းဆီးရမိသူတွေကို ဥပဒေအရအရေးယူပြီး နယ်စပ်ဂိတ်ပေါက်ကနေတဆင့် မြန်မာ အာဏာပိုင်တွေလက်ထဲ ပြန်အပ်နေရာမှာ ဖေဖော်ဝါရီ ၂၆ မှာ နောက်ထပ် ၁၉၇ ဦး ပြန်ပို့ခဲ့ပါတယ်။

ပြီးခဲ့တဲ့နှစ် ဩဂုတ်လကနေ ဖေဖော်ဝါရီ ၂၆ ရက်အထိ ပြန်ပို့ခံရတဲ့ မြန်မာနိုင်ငံသား စုစုပေါင်း ၂၆၃၇၉ ဦးရှိတယ်လို့  မြန်မာပြည်သားများအရေးပူးတွဲလှုပ်ရှားမှုကော်မတီ(JACBA) ဥက္ကဋ္ဌ ဦးမိုးကြိုးက သူ့ရဲ့လူမှုကွန်ရက်စာမျက်နှာမှာ ရေးသားဖော်ပြပါတယ်။ 

မြန်မာနိုင်ငံသားအယောက် ၄၀ အပါအဝင် လူပေါင်း ၄၂ ယောက်မှာ SARS-CoV-2 Variant Omicron (အိုမီခရွန်) ရောဂါပိုး ထပ်မံစစ်ဆေးတွေ့ရှိရတယ်လို့ စစ်ကောင်စီ ကျန်းမာရေးဝန်ကြီးဌာနက ဇန်နဝါရီ ၁၃ ရက်ညပိုင်းမှာ ထုတ်ပြန်ပါတယ်။

ပြည်ပနိုင်ငံတွေက ပြန်လည်ရောက်ရှိလာပြီး ကိုဗစ်-၁၉ ရောဂါပိုး တွေ့ရှိသူတွေရဲ့ ဓာတ်ခွဲ နမူနာတွေထဲက မျိုးရိုးဗီဇပြောင်း ရောဂါပိုးတွေ့ရှိနိုင်တဲ့ သံသယဖြစ်ဖွယ် ဓာတ်ခွဲနမူနာတွေကို စစ်ဆေးခဲ့ရာမှ ၄၂ ခုမှာ အိုမီခရွန်ရောဂါပိုး တွေ့ရှိခဲ့ရတာလို့ ဆိုပါတယ်။

အဲဒီထဲမှာ မြန်မာနိုင်ငံသားအယောက် ၄၀ နဲ့ နိုင်ငံခြားသား ၂ ယောက်ပါဝင်ပြီး Relief Flight တွေနဲ့ ဝင်ရောက်လာသူတွေဖြစ်ကာ အိန္ဒိယနိုင်ငံက ၃၂ ယောက်၊ ယူအေးအီးနိုင်ငံက ၄ ယောက်၊ မလေးရှားနိုင်ငံက ၃ ယောက်နဲ့ ထိုင်းနိုင်ငံက ၃ ယောက် ပါဝင်တယ်လို့ ဆိုပါတယ်။

ပြီးခဲ့တဲ့ ၂၀၂၁ ခုနှစ်၊ ဒီဇင်ဘာ ၂၈ ရက်တုန်းကတော့ ယူအေအီးနိုင်ငံ၊ ဒူဘိုင်းမြို့ကနေ ကယ်ဆယ်ရေး လေယာဉ်နဲ့ ပြန်လည်ဝင်ရောက်လာသူ မြန်မာနိုင်ငံသား ၄ ယောက်မှာ အိုမီခရွန်ရောဂါပိုး တွေ့ရှိရကြောင်း ကနဦး ထုတ်ပြန်ထားခဲ့တာပါ။

အဲဒီနောက် ဇန်နဝါရီ ၇ ရက်နေ့မှာတော့ မြန်မာနိုင်ငံသား ၁၁ ယောက်နဲ့ နိုင်ငံခြားသား ၁ ယောက်၊ စုစုပေါင်း ၁၂ ယောက်၊ ဇန်နဝါရီ ၁၁ ရက်မှာ အိန္ဒိယနိုင်ငံက ပြန်လာတဲ့ မြန်မာနိုင်ငံသား ၃ ယောက်၊ ဇန်နဝါရီ ၁၂ ရက်မှာ အိန္ဒိယပြန်လာတဲ့ မြန်မာနိုင်ငံသား ၂ ယောက်တို့မှာ အိုမီခရွန်ရောဂါပိုး တွေ့ရှိကြောင်း ထုတ်ပြန်ထားပါတယ်။

အိုမီခရွန်ဟာ ကိုဗစ်ဖြစ်ဖူးသူတွေမှာ ပြန်ဖြစ်နိုင်ခြေများပြီး အရင်မျိုးစိတ်တွေထက်ပိုပြီး ကူးစက်မြန်စေတယ်လို့ ကျန်းမာရေးပညာရှင်တွေက ပြောထားပြီး ကာကွယ်ဆေးထိုးနှံ ပြီးသူတွေမှာလည်း ပြန်ဖြစ်နိုင်တယ်လို့ ဆိုပါတယ်။

လတ်တလောမှာတော့ ဗီဇပြောင်းမျိုးကွဲကိုဗစ်ပိုး အိုမီခရွန်ဟာ လက်ရှိနိုင်ငံ ၁၄၀ ကျော်မှာ ကူးစက်ပျံ့နှံ့နေပြီး အဲဒီမျိုးကွဲကြောင့် သေဆုံးသူ ၁၁၀ ကျော် ရှိနေပြီဖြစ်ပါတယ်။