မန္တလေးတိုင်း၊ နွားထိုးကြီးမြို့မရဲစခန်းကို နိုဝင်ဘာ ၁ ရက်၊ မနက် ၈ နာရီလောက်က ဒရုန်းနဲ့ ဗုံးဖောက်ခွဲတိုက်ခိုက်ခဲ့ရာမှာ ကင်းစောင့်ရဲသားတယောက်သေဆုံးကာ တယောက် ဒဏ်ရာရတယ်လို့ Natogyi People Defence Force (NPDF) အဖွဲ့က နိုဝင်ဘာ ၂ ရက်မှာ ထုတ်ပြန်လိုက်ပါတယ်။
ဒေသခံတယောက်က “စခန်းဝင်းထဲ မနက်က ပေါက်ကွဲသံကြားတာ။ မနက်ခင်း လူစည်ကားချိန်တောင် အသံက ကျယ်တယ်ဗျ။ ဘယ်အဖွဲ့ကလုပ်တယ်တော့မသိဘူး”လို့ ပြောပါတယ်။
နိုင်ငံရေးလေ့လာသူတယောက်ကလည်း “ဒီဘက်ရက်တွေမှာ Natogyi People Defence Force (NPDF) က စစ်ကောင်စီတပ်စွဲရာ နေရာတွေကို ဒရုန်းသုံး ဗုံးချ ဖောက်ခွဲ တိုက်ခိုက်တာတွေ လုပ်ဆောင်လာနေတာရှိတယ်” လို့ ပြောပါတယ်။
နွားထိုးကြီးမှာ အောက်တိုဘာ ၃၀ ရက်ကလည်း မြို့နဲ့ ၁၀ မိုင်ဝေးတဲ့ ဝက်လူးကျေးရွာ ရဲစခန်း ဒရုန်းနဲ့ ဗုံးချခံရပြီး ရဲတပ်ဖွဲ့ဝင် ထိခိုက်မှုမရှိဘူးလို့ ဒေသခံတွေက ပြောပါတယ်။
မြင်းခြံခရိုင်မှာ တောင်သာ TTA (ပြောက်ကျားတပ်)၊ နွားထိုးကြီး PDF တို့က စစ်ကောင်စီတပ်စွဲရာ နေရာတွေမှာ ဒရုန်းသုံးပြီး ဗုံးချ ဖောက်ခွဲတိုက်ခိုက်တာတွေ ရက်ဆက်လုပ်ဆောင်လာနေတယ်လို့ သိရပါတယ်။
မွန်ပြည်နယ်၊ ကျိုက်ထိုမြို့နယ်၊ သိမ်ဇရပ်မြို့အခြေစိုက် စစ်ကောင်စီ ခြေမြန်တပ်ရင်း ခလရ(၂၀၇)တပ်နဲ့ မြို့မရဲစခန်းကို မေလ ၂၄ ရက် မနက်ပိုင်းက လက်နက်ကြီးနဲ့ ပစ်ခတ်တိုက်ခိုက်ခဲ့တယ်လို့ ကျိုက်ထိုတော်လှန်ရေးအင်အားစု KRF က ပြောပါတယ်။
အဲဒီစစ်ကောင်စီတပ်နဲ့ မြို့မရဲစခန်းကို ကရင်အမျိုးသားလွတ်မြောက်ရေးတပ်မတော် KNLA ၊ PDF ပူးပေါင်းအဖွဲ့က လက်နက်ကြီးနဲ့ ပစ်ခတ်တိုက်ခိုက်ခဲ့တာ ဖြစ်ပါတယ်။
KNLA ပူးပေါင်းအဖွဲ့က ပစ်ခတ်လိုက်တဲ့ လက်နက်ကြီးကျည်ဟာ စစ်ကောင်စီ ခလရ(၂၀၇)တပ်ရဲ့ ဗဟိုကင်းအတွင်း ကျရောက် ပေါက်ကွဲခဲ့တာကြောင့် စစ်ကောင်စီတပ်သာ ၁ ဦး သေဆုံးပြီး ၂ ဦး ထိခိုက်ဒဏ်ရာရှိခဲ့ပါတယ်။
သိမ်ဇရပ်မြို့မရဲစခန်း တိုက်ခိုက်မှုမှာတော့ ထိခိုက်မှု ရှိ၊ မရှိ ဆက်လက် စုံစမ်းနေဆဲ ဖြစ်ကြောင်းနဲ့ ထပ်မံတိုက်ခိုက်နိုင်တဲ့ အခွင့်အရေး ရှိခဲ့ပေမဲ့ မိသားစုတွေကို ငဲ့ညှာတဲ့အားဖြင့် သတိပေးတဲ့အနေနဲ့သာ ပြုလုပ်ခဲ့တယ်လို့ KRF တာဝန်ရှိသူ တစ်ဦးက ပြောပါတယ်။
ဒါကြောင့် စစ်ကောင်စီတပ်ဖွဲ့ဝင်တွေအနေနဲ့ ကျိုက်ထိုတော်လှန်ရေးအင်အားစုကို အချိန်မီ ဆက်သွယ်ပေးဖို့နဲ့ နောက်ထပ် တစ်ကြိမ် အခွင့်အရေးမျှ ပေးမှာ မဟုတ်ဘူးလို့ ဆိုပါတယ်။
ကျိုက်ထိုမြို့နယ်မှာ စစ်ကောင်စီတပ်နဲ့ KNLA ပူးပေါင်းတပ်ဖွဲ့တို့ကြား မကြာခဏ ဆိုသလို တိုက်ပွဲတွေ ဆက်လက်ဖြစ်ပွားနေပြီး အဲဒီတိုက်ပွဲအတွင်း စစ်ကောင်စီဘက်က အထိနာနေတာ ဖြစ်ပါတယ်။
