ရှမ်းပြည်နယ်မြောက်ပိုင်း၊ မူဆယ်ခရိုင်၊ ကွတ်ခိုင်မြို့နယ်၊ နမ့်ဖတ်လွန်းကျေးရွာအုပ်စုရှိ ဖာခေတ်ရွာအနီး နမ့်ဖလွန်တောင်မှာ နိုဝင်ဘာ ၁၈ ရက် ဒီနေ့မနက်ပိုင်းက စစ်ကောင်စီတပ် အချင်းချင်း မှားယွင်းပစ်ခတ်တာကြောင့် ၃ ဦးသေဆုံးပြီး ၂ ဦး ပြင်းထန်ဒဏ်ရာရရှိခဲ့တယ်လို့ ဒေသခံတွေက ပြောပါတယ်။
အမည်မဖော်လိုသူ ဒေသခံသတင်းရင်းမြစ်တဦးက “၃ ဦးသေတယ်။ ၂ ဦးက ပြင်းပြင်းထန်ထန် ဒဏ်ရာရထားတာ။ နမ့်ဖလွန်တောင်ပေါ်ဘက် သယ်တက်လာနေတယ်။ ဒီမနက်တော့ သူတို့အချင်းချင်းပဲ တိုက်ပွဲဖြစ်ကြတယ်” လို့ ပြောပါတယ်။
အဲဒီ ထိခိုက်ဒဏ်ရာရတဲ့ စစ်ကောင်စီတပ်ဖွဲ့ဝင် ၂ ယောက်လည်း ဒဏ်ရာတော်တော်ပြင်းထန်ပြီး စိုးရိမ်ရကြောင်း ဆိုပါတယ်။
နိုဝင်ဘာ ၁၈ ရက် မနက် ၉ နာရီခွဲကျော်လောက်က ကွတ်ခိုင်အကျော် နမ့်ဖလွန်တောင် ဖာခေတ်ရွာအထက်ဘက်က တောင်မှာ ပြည်သူ့စစ်ဝတ်စုံဝတ်ပြီး တက်လာတဲ့ စစ်ကောင်စီအဖွဲ့နဲ့ အဲဒီတောင်ပေါ်မှာ စောင့်နေတဲ့ စစ်ကောင်စီတပ်ဖွဲ့တို့ အချင်းချင်း မှားယွင်းပစ်ခတ်မိတယ်လို့ ပါတယ်။
နောက်ထပ် ဒေသခံတဦးကလည်း “ပြည်သူ့စစ်ထင်နေတာ၊ မဟုတ်ဘူး။ စစ်ကောင်စီအဖွဲ့က ပြည်သူ့စစ်ဝတ်စုံဝတ်ပြီး လှုပ်ရှားနေတာ။ အဲ့မှာ သေသွားတဲ့သူတွေအားလုံးက စစ်ကောင်စီပဲ” လို့ ရှင်းပြပါတယ်။
အဲဒီအနီးမှာ လက်ရှိသွားလာလှုပ်ရှားနေတဲ့ စစ်ကောင်စီတပ်ဖွဲ့ထဲ ပြည်သူ့စစ်ဝတ်စုံ ဝတ်ထားတဲ့သူ တော်တော်ပါနေပြီး တကယ့်ပြည်သူ့စစ်က မပါဘူးလို့ သူက ဆက်ပြောပါတယ်။
စစ်ကောင်စီခြေလျင်တပ်အချင်းချင်း မှားယွင်းပစ်ခတ်မိပြီး ခုလို သေဆုံး ဒဏ်ရာရတာကို အရင်က မကြားမိဘူးလို့ ဒေသခံတွေက ဆိုပါတယ်။
နိုဝင်ဘာ ၁၃ ရက်နေ့ကလည်း ကွတ်ခိုင်အကျော် အမှိုက်ပုံနား၊ နော်ဆွေရွာအကျော်နားနဲ့ ဖာခေတ်ရွာနား စတဲ့ ကွတ်ခိုင်-နမ့်ဖတ်ကာကြား ပြည်ထောင်စုလမ်းမပေါ် နေရာသုံးခုမှာ စစ်ကောင်စီတပ်နဲ့ KIA တပ်မဟာ ၆၊ တပ်ရင်း ၉၊ တပ်မဟာ ၄၊ တပ်ရင်း ၈ ပူးပေါင်းအဖွဲ့တို့ အကြား တိုက်ပွဲဖြစ်ပွားခဲ့ပြီး စစ်ကောင်စီဘက်က ၄ ဦးသေဆုံးပြီး စစ်ကောင်စီကား ၂ စီး ဘဇူကာကျည်ထိမှန် ပျက်စီးခဲ့ပြီး ကျန်သုံးစီးကိုတော့ လက်နက်သေးထိမှန်ခဲ့ကြောင်း KIA နဲ့ နီးစပ်သူတွေဆီက သိရပါတယ်။
မကွေးတိုင်းဒေသကြီး မင်းတုန်းမြို့နယ်မှာ ဇန်နဝါရီ ၁၁ ရက်နေ့ မနက်ပိုင်းက တိုက်ပွဲဖြစ်ပွားခဲ့ပြီး စစ်ကောင်စီတပ်သား ၁၁ ယောက်လောက် မိုင်းထိမှန်ဒဏ်ရာရကာ ၈ ယောက်လောက် သေဆုံးနိုင်တယ်လို့ သရက် PDF တပ်ဖွဲ့ဆီက သိရပါတယ်။
မင်းတုန်းမြို့နယ် သမ္ဗူလကျေးရွာနားမှာ ဒီကနေ့ မနက် ၉ နာရီလောက်ကနေ ၁၁ နာရီလောက်အထိ စစ်ကြောင်းဖြန့်လာတဲ့ စစ်ကောင်စီတပ်တွေကို သရက်-ကံမ PDF ပူပေါင်းစစ်ဆင်ရေးအဖွဲ့က ကြားဖြတ်တိုက်ခိုက်ခဲ့တယ်လို့ သရက် PDF ရဲ့ ပြန်ကြားရေးတာဝန်ခံက ပြောပါတယ်။
စစ်ကောင်စီတပ်တွေဟာ အဲဒီကျေးရွာဘက်တွေက တက်ကြွလှုပ်ရှားသူတွေကို ခြိမ်းခြောက်ရန်ရှာတာ၊ လူသစ် အဓမ္မစုဆောင်းတာနဲ့ တော်လှန်ရေးရဲဘော်တွေကို ဖမ်းဆီးဖို့ စစ်ကြောင်းထိုးလာတာချိန်မှာ မိုင်းဆွဲတိုက်ခိုက်တာလို့ ဆိုပါတယ်။
နှစ်ဘက် အပြန်အလှန်ပစ်ခတ်တိုက်ပွဲ ဖြစ်ပွားခဲ့ပြီးနောက် စစ်ကောင်စီတပ်သားတွေ ဆုတ်ခွာသွားကြကာ PDF ရဲဘော်တွေ အထိအခိုက်အကျအဆုံး မရှိခဲ့ဘူးလို့ ဆိုပါတယ်။
ပခုက္ကူမြို့နယ်မှာလည်း ဇန်နဝါရီ ၁၀ ရက်နေ့ ညပိုင်းက စစ်ကောင်စီခန့် အမှတ် ၆ ရပ်ကွက်အုပ်ချုပ်ရေးမှူးနဲ့ ပျူစောထီး ခေါင်းဆောင်တို့ မောင်းလာတဲ့ကားကို စစ်ကောင်စီတပ်သားတွေက ရပ်တန့်ဖို့ တားရာမှာ ရပ်မပေးလို့ မှားယွင်းပစ်ခတ်ပြီး ပျူစောထီး ခေါင်းဆောင် သေဆုံးခဲ့တယ်လို့ မြို့ခံတွေဆီက သိရပါတယ်။
နှစ်ဦးလုံး အပြင်းအထန် ဒဏ်ရာတွေရရှိခဲ့တာကြောင့် ညတွင်းချင်း မန္တလေးဆေးရုံကြီးကို ပို့ဆောင်ခဲ့ရာမှာ ပျူစောထီးခေါင်းဆောင် ရွှေသီးဟာ ဆေးရုံကြီးအရောက်မှာ သေဆုံးခဲ့ပြီး အုပ်ချုပ်ရေးမှူး တင်ကိုးကတော့ ကုသနေဆဲဖြစ်တယ်လို့ သိရပါတယ်။
မြို့ခံတစ်ဦးက “စကစခန့် အုပ်ကြီး ပျူစောထီးခေါင်းဆောင် ရွှေသီး သေတဲ့သတင်းက အတည်ပြုလို့ ရပါပြီ။ အမှတ် ၆ အုပ်ကြီး တင်ကိုးနဲ့ ပျူစောထီး ရွှေသီးတို့က ကားမောင်းလာချိန်မှာ စကစက စစ်ဖို့တားတာ မရပ်ပေးလို့ အပစ်ခံလိုက်ရတာ၊ သူတို့ထောက်ခံတဲ့ စကစကပဲ သူတို့ကို ပြန်ပစ်သတ်သွားတာပဲ” လို့ ပြောပါတယ်။
ကံမမြို့နယ် ထန်းဖြူ(သပြူ) ရွာနားမှာလည်း ဒီဇင်ဘာ ၅ ရက်နေ့ မွန်းလွဲ ၂ နာရီခွဲလောက်က သရက်/ကံမ ပူးပေါင်း စစ်ဆင်ရေးတပ်ဖွဲ့က သရက်ခရိုင်ရဲမှူး လိုက်ပါလာတဲ့ စစ်ကောင်စီယာဥ်တန်း ကား ၃ စီးကို ဗုံးခွဲတိုက်ခိုက်ခဲ့တယ်လို့ သိရပါတယ်။
