မွန်ပြည်နယ်၊ ကျိုက်ထိုမြို့၊ ရန်ကုန်-မော်လမြိုင်ကားလမ်းမ၊ မရမ်းချောင်စစ်ဆေးရေးဂိတ် အနီး၊ ကုလားမကွေ့မှာ မေလ ၅ ရက် မနက်ပိုင်းက ဘုန်းကြီးကျောင်းကားတစီး တိမ်းမှောက်ခဲ့တာကြောင့် ၁ ဦးသေဆုံးပြီး ၃၃ ဦး ထိခိုက်ဒဏ်ရာ ရရှိခဲ့တယ်လို့ မြို့ခံကယ်ဆယ်ရေးအသင်းတွေက ပြောပါတယ်။

အဆိုပါ ကန်တာအမျိုးအစားကားဟာ ရန်ကုန်၊ သန်လျင်မြို့နယ်ကနေ မော်လမြိုင်၊ ဝါးပိုးကျေးရွာရှိ ပဋ္ဌာန်းပွဲနဲ့ ရေးမြို့၊ လမိုင်းရွာကို ဘုရားထီးတော်တင်သွားကြမှာဖြစ်ပြီး ရဟန်း၊ ကိုရင် အပါအဝင် ၃၄ ဦး လိုက်ပါလာကြတာပါ။

မြို့ခံကယ်ဆယ်ရေးအသင်း တာဝန်ခံတဦးက “အသင်းကားတွေနဲ့ အဲ့နားကကားတွေက ဆေးရုံလိုက်ပို့ပေးပါတယ်။ တဦးကတော့ Deadbody ဖြစ်သွားပါပြီ။ ကိုရင်‌တပါးရဲ့အမေလို့ ပြောတယ်။ အသက် ၃၀ လောက်ပဲ ရှိဦးမယ်။ ကားပေါ်မှာ ဦးဇင်းတွေ ကိုရင်တွေပါတယ်။ သန်လျင်ဘက်က ပရဟိတ ဘုန်းကြီးကျောင်းကလို့ ပြောတယ်” လို့ ပြောပါတယ်။

လမ်းအကွေ့မှာ ဘရိတ်နင်းရာကနေ အရှိန်မထိန်းနိုင်ဘဲ တိမ်းမှောက်ခဲ့တာကြောင့် ယာဉ်ခေါင်းခန်း၊ မှန်တွေပျက်စီးသွားပြီး ရဟန်း၊ ကိုရင် ၉ ပါးနဲ့ ကျား မ ၂၄ ဦး ထိခိုက်ဒဏ်ရာ ရရှိခဲ့ကာ အမျိုးသမီး ၁ ဦး သေဆုံးခဲ့ပါတယ်။

အသက် ၃၀ အရွယ်ရှိ သေဆုံးသူ အမျိုးသမီးဟာ ကားပေါ်ပါ ကိုရင်တပါးရဲ့မိခင် ဖြစ်တယ်လို့ သိရပြီး သေဆုံးသူနဲ့ ထိခိုက်ဒဏ်ရာရရှိသူတွေကို သိမ်ဇရပ်ဆေးရုံကြီးကို ပို့ဆောင်ထားတယ်လို့ သိရပါတယ်။

ယာဉ်တိမ်းမှောက်တဲ့နေရာကို သက်ဆိုင်ရာအဖွဲ့အစည်းတွေနဲ့ ကယ်ဆယ်ရေးအသင်း ၅ သင်း တို့က ကူညီကယ်ဆယ်ခဲ့ကြပြီး ဒဏ်ရာသက်သာသူတွေကို သန်လျင်မြို့နယ်ပြန်ဖို့ စီစဉ်‌ပေးထားတယ်လို့ သိရပါတယ်။

မက္ကဆီကိုနိုင်ငံ အနောက်ပိုင်း ချောက်ကမ်းပါးတစ်ခုပေါ်ကနေ ဘတ်စ်ကားတစ်စီး ပြုတ်ကျလို့ လူ ၁၈ ဦးထက်မနည်း သေဆုံးပြီး ၃၃ ဦး ဒဏ်ရာရခဲ့တယ်လို့ ဒေသန္တရအာဏာပိုင်တွေက ဧပြီ ၃၀ ရက်မှာ ပြောလိုက်ပါတယ်။

ဘတ်စ်ကားဟာ ဧပြီ ၂၉ ရက်ညက ပြည်နယ်မြို့တော် တေပစ်နဲ့ ပွာတိုဗယ်လာတာမြို့တို့ကို ဆက်သွယ်ထားတဲ့ အဝေးပြေးလမ်းမကြီးဘေးက  ပေ ၅၀ လောက်နက်တဲ့ လျှိုထဲ ပြုတ်ကျခဲ့ပြီး အမျိုးသမီး ၁၁ ဦးနဲ့ အမျိုးသား ၇ ဦး သေဆုံးခဲ့တယ်လို့ ယာဉ်မတော်တဆဖြစ်ခဲ့တဲ့ နာယာရစ်ပြည်နယ်က အစိုးရရှေ့နေရုံးက  ပြောပါတယ်။  အရွယ်မရောက်သေးသူ ၁၁ ဦးကို ဆေးကုဖို့ ဆေးရုံတွေဆီ  လွှဲပြောင်းပေးခဲ့ပါတယ်။

နာယာရစ်ပြည်နယ် လုံခြုံရေးနှင့် မြို့ပြကာကွယ်ရေးဝန်ကြီးဌာနက ထုတ်ပြန်တဲ့ ဓာတ်ပုံတွေထဲမှာ ကယ်ဆယ်ရေးသမားတွေက ဧပြီ ၂၉ ရက် ညပိုင်း ယာဉ်မတော်တဆမှုရဲ့ ဓားစာခံတွေကို ကယ်ထုတ်နေပုံတွေကို ပြသထားပါတယ်။