ထိုင်းနိုင်ငံအလယ်ပိုင်း၊ အယုဒ္ဓယခရိုင်၊ ဖတ်ယိုင်မြို့နယ်ထဲမှာ ဒီဇင်ဘာ ၆ ရက်  မနက်စောစောက တရားမဝင်မြန်မာအလုပ်သမားတွေ တင်ဆောင်လာတဲ့ကား တစီး တိမ်းမှောက်သွားပြီး လမ်းဘေးက ထိုင်းလူမျိုးတချို့နဲ့ ကားပေါ်ကမြန်မာလုပ်သားတွေပါ ထိခိုက် ဒဏ်ရာရခဲ့တယ်လို့ မတ်တီချွန်း ထိုင်းသတင်းမှာ ဖော်ပြပါတယ်။

မနေ့မနက် ၆ နာရီလောက်က ဖတ်ယိုင်မြို့နယ်နဲ့ ဆေနားမြို့နယ်ကြား ထာ့ဒင်ဒဲန်းရပ်ကွက်ထဲမှာ ယာဉ်မတော်တဆမှုသတင်းရတဲ့အတွက် သွားရောက်စစ်ဆေးရာမှာ အခင်းဖြစ်တဲ့နေရာမှာ လမ်းချိုးအကွေ့ဖြစ်ပြီး စောင်းလျက်အနေအထား တိမ်းမှောက်နေတဲ့ မီးခိုးရောင် တိုယိုတာဟိုင်းလပ်စ်ကား ၁ စီးနဲ့ ထိခိုက်ဒဏ်ရာရသူတချို့ကို တွေ့ရှိခဲ့တယ်လို့ ဖတ်ယိုင်နယ်မြေရဲစခန်း တာဝန်ကျရဲအရာရှိက သတင်းထောက်တွေကို ပြောပါတယ်။

ကနဦးဒဏ်ရာရရှိသူမှာ လမ်းဘေးက ထိုင်းလူမျိုး ၃ ဦးနဲ့ ကားပေါ်က မြန်မာလုပ်သား ၁၀ ဦးတို့ဖြစ်ပြီး လူနာတင်ကားနဲ့ ဖတ်ယိုင်ဆေးရုံကြီးကို ပို့ဆောင်ထားတယ်လို့ ဆိုပါတယ်။ 

စုံစမ်းစစ်ဆေးချက်အရ အဆိုပါဟိုင်းလပ်စ်ကားဟာ တရားမဝင်မြန်မာအလုပ်သမားတွေကို ကားနဲ့ ကြပ်ညပ်အောင် မတန်တဆတင်ဆောင်လာပြီး အမြန်မောင်းနှင်လာကြောင်း၊ လမ်းချိုး ကွေ့တနေရာရောက်တော့ အရှိန်မထိန်းနိုင်ဘဲ လမ်းထိပ်မှာ သံဃာတော်တွေကို ဆွမ်းလောင်းဖို့ ထိုင်စောင့်နေတဲ့ လူအုပ်ထဲကို တိမ်းမှောက်သွားတာလို့ ဆိုပါတယ်။

ဆွမ်းလောင်းဖို့ စောင့်နေကြတဲ့ သက်ကြီးရွယ်အို အဘိုးအဘွားတွေ  အလန့် တကြား ထွက်ပြေးတိမ်းရှောင်ကြရာမှာ  အဘွားအိုတယောက်  ပြေးရင်းလွှားရင်း နောက် ကားတစ်စီးနဲ့ တိုက်မိပြီး ဒဏ်ရာရခဲ့ပါတယ်။

အဆိုပါကားဟာ တာ့ခ်ခရိုင်က တရားမဝင်အလုပ်သမား ၂၄ ဦးကို တင်ဆောင်လာတာဖြစ်ပြီး ဘန်ကောက်ကိုအလုပ်သွားလုပ်ဖို့ ပို့ဆောင်ပေးစဉ် လမ်းခုလပ်မှာခုလိုမတော်တဆ ထိခိုက်မှု ကြုံခဲ့ရတာ ဖြစ်ပါတယ်။

ရဲတပ်ဖွဲ့က အနည်းငယ်ထိခိုက်ဒဏ်ရာရသူတွေကို ဆေးထည့်ပေးပြီး လဝကဥပဒေအရ အရေးယူဖို့ ဖတ်ဟိုင်ရဲစခန်းကို ပို့ဆောင်ထားကြောင်း ထိုင်းသတင်းမှာ ဖော်ပြပါတယ်။ 

Ref-Matichon

ထိုင်းမြောက်ပိုင်း ချင်းရိုင်း - ချင်းမိုင်ခရိုင်သွား ကားလမ်းမကြီးတနေရာမှာ စိတ်ကြွဆေးပြား ၆ သန်းပါတဲ့ ကားတစီး တိမ်းမှောက်သွားခဲ့တယ်လို့ မယ်ဆိုင်ပရက်စ်သတင်းမှာ ဖော်ပြပါတယ်။ 

ပြီးခဲ့တဲ့ စက်တင်ဘာ ၂၀ ရက် ည ၁၁ နာရီလောက်က ချင်းရိုင်းခရိုင် မယ့်ဆွေမြို့နယ် မယ့်ဖရိတ်အုပ်စုအပိုင် ချင်းမိုင်သွားကားလမ်းမကြီးပေါ်မှာ ယာဉ်တိမ်းမှောက်မှုဖြစ်ပွားကြောင်း အကြောင်းကြားချက်ရတဲ့အတွက် လူနာတင်ယာဉ်နဲ့အတူ သွားရောက်စစ်ဆေးခဲ့တယ်လို့ မယ့်ဆွေမြို့နယ်ရဲတပ်ဖွဲ့က ပြောပါတယ် ။ 

အခင်းဖြစ်တဲ့နေရာမှာ အဖြူရောင်ဟိုင်းလပ်ကားတစီး ဘေးစောင်းအနေအထားတဲ့ တိမ်းမှောက် နေပြီး အနီးနားတဝိုက်မှာလည်း အစိမ်းရောင်မြွေရေခွံအိတ်တွေ ပြန့်ကျဲနေတယ်လို့ ဆိုပါတယ်။ 

ယာဉ်မောင်းသမားနဲ့ ထိခိုက်ဒဏ်ရာရာသူ တဦးတယောက်မှ မတွေ့ကြောင်း၊ အနီးအနားတဝိုက်မှာလည်း မသင်္ကာသူတယောက်မှ မတွေ့ကြောင်း၊ အိတ်တွေကို စစ်ဆေးရာမှာ စုစုပေါင်း ၃၀ ရှိပြီး အထဲမှာစိတ်ကြွဆေးပြား စုစုပေါင်း ၆ သန်းတွေ့ရတယ်လို့ ပြောပါတယ်။ 

တာဝန်ရှိသူတွေက ယာဉ်သွားရာလမ်းကြောင်းတွေကို ပြန်လည်စစ်ဆေးရာမှာ ရှေ့ကနေ လမ်းပြတဲ့ကားလို့ ယူဆရတဲ့ အနက်ရောင်ဟိုင်းလပ်ကားတစီးကို မယ့်ဆွေမြို့နယ် ထာ့ဆွေအုပ်စု မယ့်ဒမ်ကျေးရွာအနီးမှာ တွေ့ရှိကြောင်း၊ ယာဉ်မောင်းအမျိုးသား ၁ ဦးကို ခေါ်ယူစစ်ဆေးနေပြီး မူးယစ်ဆေးဝါးတွေကိုလည်း လိုအပ်သလို ဆက်လက်အရေးယူဖို့ မယ့်ဆွေရဲစခန်းကို သယ်ဆောင်ခဲ့တယ်လို့ တာဝန်ရှိသူက ပြောသွားပါတယ်။