ဂျာမနီအစိုးရဟာ ဂျာမနီနိုင်ငံဆီ ရောက်လာတဲ့ ယူကရိန်းနိုင်ငံက အများစုအပါအဝင် ဒုက္ခသည်တွေအတွက် ကုန်ကျစရိတ်တွေကို ကာမိစေဖို့ ၂၀၂၃ ခုနှစ်မှာ နောက်ထပ် ယူရို ၁ ဘီလီယံ သုံးစွဲမယ်လို့ ဂျာမန်အဓိပတိ အိုလာ့ဖ်ရှို့လ်ဇ်က မေ ၁၀ ရက်နှောင်းပိုင်းမှာ ပြောခဲ့ပါတယ်။
သူနဲ့ ပြည်နယ်ဝန်ကြီးချုပ် ၁၆ ဦးတို့ နာရီအတော်ကြာ ဆွေးနွေးခဲ့ကြပြီးနောက် ဘာလင်မြို့တော်က အဓိပတိရုံးမှာ ရှို့လ်ဇ်က သတင်းထောက်တွေကို ပြောခဲ့တာပါ။
ရှို့လ်ဇ်နဲ့ သူ့ရဲ့ဘဏ္ဍာရေးဝန်ကြီး ခရစ်စီယံလင်ဒ်နာက ဂျာမနီနိုင်ငံရဲ့ ပြည်နယ် ၁၆ ခုမှာရှိတဲ့ မြူနီစီပယ်နယ်မြေတွေအတွက် အစိုးရအနေနဲ့ ပိုက်ဆံပိုမပေးနိုင်ဘူးလို့ အရင်က ပြောခဲ့ပါတယ်။
ဂျာမနီဟာ ယူကရိန်းစစ်ပွဲ ဖြစ်ပွားကတည်းက ယူကရိန်းဒုက္ခသည် တသန်းလောက်ကို လက်ခံ စာရင်းသွင်းထားတယ်လို့ ရှို့လ်ဇ်က ပြောပါတယ်။
“တချိန်တည်းမှာပဲ တခြားနိုင်ငံတွေကနေ လာပြီး ဂျာမနီမှာ ခိုလှုံခွင့်တောင်းခံသူ အရေအတွက် တိုးလာတယ်” လို့ ရှို့လ်ဇ်က ပြောပါတယ်။
ဂျာမနီရွှေ့ပြောင်းနေထိုင်မှုနှင့် ဒုက္ခသည်များအတွက် အေဂျင်စီ (Bamf) ဟာ အခုနှစ် ပထမလေးလအတွင်း ခိုလှုံခွင့်တောင်းခံသူ ၁၀၂,၀၀၀ နီးပါးကို မှတ်ပုံတင်ခဲ့ပြီး ၂၀၂၂ ခုနှစ်နဲ့ နှိုင်းယှဉ်ရင် ၇၈ ရာခိုင်နှုန်း တိုးလာခဲ့ပါတယ်။
ပြင်သစ် နိုင်ငံတကာသတင်း အေဂျင်စီ (AFP) ရဲ့ ယူကရိန်းရှိ ဌာနခွဲမှ ရုပ်သံသတင်းထောက် အသက် ၃၂ နှစ် အရွယ် အာမန် ဆိုလ်ဒင် ဟာ ယူကရိန်းအရှေ့ပိုင်းရှိ ချာဆိဗ်ယားမြို့မှာ Grad ဒုံးပျံနဲ့ပစ်ခတ်မှုကြောင့် သေဆုံးခဲ့ကြောင်း ဒီအဖြစ်အပျက်ကို မျက်မြင်တွေ့ခဲ့တဲ့ AFP လုပ်ဖော်ကိုင်ဘက်တွေကို ကိုးကားပြီး AFP က တွစ်တာမှာ ရေးသား ဖော်ပြခဲ့ပါတယ်။
“ဒီနေ့ ယူကရိန်းအရှေ့ပိုင်းမှာ AFP ဗီဒီယိုသတင်းထောက် အာမန်ဆိုလ်ဒင် ကွယ်လွန်တာကို သိလိုက်ရလို့ စိတ်မကောင်းဖြစ်ရပါကြောင်း” ရေးထားပါတယ်။
ဆိုလ်ဒင်ဟာ လုပ်ဖော်ကိုင်ဘက် ၄ ဦးနဲ့ အတူရှိနေခဲ့ပြီး ကျန်သူအားလုံးမှာ ထိခိုက်မှုမရှိပါဘူး။ တိုက်ခိုက်မှုအတွင်း သူတို့ဟာ ယူကရိန်းစစ်သားတွေနဲ့အတူ ရှိနေခဲ့ကြောင်း အေအက်ဖ်ပီက တွစ်တာမှာ ပြောကြားခဲ့ပါတယ်။
ယူကရိန်း အရှေ့ပိုင်းမှာ လအတော်ကြာ တိုက်ပွဲတွေ ဖြစ်ပွားရာ ဗဟိုချက်ဖြစ်တဲ့ ဘတ်ခ်မွတ်နဲ့ နီးတဲ့ မြို့အစွန်အဖျားမှာ တိုက်ခိုက်မှု ဖြစ်ပွားလေ့ရှိပါတယ်။
