စစ်ပွဲမှာ ဒဏ်ရာရလို့ ရုရှားတွေရဲ့ ဖမ်းဆီးခံရပြီးနောက် ပြန်လွတ်မြောက်လာတဲ့ ယူကရိန်းစစ်သား ၃ ယောက်ဟာ သူတို့ အဖမ်းခံနေရချိန်အတွင်း ရုရှားတွေရဲ့ နှိပ်စက်ညှဉ်းပန်းမှုနဲ့ စိတ်ပိုင်းဆိုင်ရာ ဖိအားပေးမှုတွေကို ခံခဲ့ရကြောင်း သြဂုတ် ၂၂ ရက်က စွပ်စွဲခဲ့ပါတယ်။ 

သူတို့ဟာ မာရီယူပိုတောင်ဘက်ဆိပ်ကမ်းရှိ ကြီးမားတဲ့ သံမဏိစက်ရုံကနေ သီတင်းပတ်ချီ တိုက်ပွဲ ဝင်ခဲ့တဲ့ တပ်ဖွဲ့ထဲက အဖွဲ့ဝင်တွေဖြစ်ပါတယ်။ 

ဖမ်းဆီးခဲ့သူတွေဟာ သူတို့ကို အရပ်သားတွေအပေါ် ရာဇ၀တ်မှုကျူးလွန်ကြောင်း အတင်းအကျပ် ဝန်ခံခိုင်းတယ်လို့ ကိယက်ဗ်မြို့ရှိ သတင်းစာရှင်းလင်းပွဲမှာ ပြောပါတယ်။ 

ခြေထောက်တဖက် ဆုံးရှုံးခဲ့ရသူတဦးက ခြေထောက်ဖြတ်ပြီးနောက် ပဋိဇီဝဆေး မသောက်ရသေးခင်မှာဘဲ စစ်ဆေးမေးမြန်းခံခဲ့ရကြောင်း ပြောပါတယ်။

“အဲဒီမှာရှိတဲ့သူတွေကို နှိပ်စက်ခံရတယ်။ တချို့က ဒဏ်ရာတွေကို အပ်တွေနဲ့ထိုးတယ်။ တချို့က ရေနဲ့ နှိပ်စက်ခံရတယ်၊ တချို့က လုံလောက်တဲ့ ကုသမှု မခံယူရဘူး။” 

အကျဉ်းသားတချို့ကို ကိုယ်တုံးလုံးချွတ်ခိုင်းပြီး ထိုင်ထလုပ်ခိုင်းခဲ့ကြောင်း လွတ်မြောက်လာသူ တဦးဖြစ်ကလည်း ပြောပါတယ်။ 

သူတို့က အမိန့်ကို ဆန့်ကျင်လုပ်ဆောင်ခဲ့တာတွေ၊ မြို့ကိုဗုံးခွဲတာတွေမှာ ငါတို့လုပ်တာလို့ သက်သေထွက်ဆိုစေချင်ပြီး အပြစ်ပုံချချင်တာလို့လည်း ပြောပါတယ်။ 

သူတို့သုံးဦးဟာ ရုရှားစစ်သုံ့ပန်းလဲလှယ်ရေးအစီအစဉ်မှာ ပါဝင်ခဲ့ပြီး ဇွန်လတုန်းက ယူကရိန်း သုံ့ပန်း ၁၄၄ ဦးကို ရုရှားက လွှဲပြောင်းပေးကြောင်း ကြေညာခဲ့ပါတယ်။ 

ရုရှားတွေရဲ့ဖမ်းဆီးတာ ခံခဲ့ရတယ်ဆိုတဲ့ သူတို့ သုံးယောက်ရဲ့ ပြောဆိုချက်ကို ရိုက်တာကတော့ သီးခြား အတည်ပြုနိုင်ခြင်း မရှိပါဘူး။ 

မာရီယူပိုလ် ဒေသဟာ သုံးလကြာ တိုက်ပွဲတွေအတွင်း အကြီးအကျယ် ပျက်စီးသွားခဲ့ပြီး ယူကရိန်းက အရပ်သား သောင်းနဲ့ချီ သေဆုံးခဲ့ပါတယ်။ 

ရုရှားကတော့ အရပ်သားတွေကို ပစ်မှတ်ထားတာ ငြင်းဆိုထားပါတယ်။  ရုရှားကာကွယ်ရေး ဝန်ကြီးဌာနကတော့ မှတ်ချက်ပေးဖို့ တောင်းဆိုချက်ကို ချက်ချင်းတုံ့ပြန်ခြင်းမရှိပါဘူး။

ယူကရိန်းဟာ ရုရှားကို စစ်ရာဇ၀တ်မှုတွေနဲ့ အရင်က စွပ်စွဲထားပြီး မော်စကိုက အဲဒီစွပ်စွဲချက်ကို ငြင်းဆိုထားပါတယ်။ 

ရုရှားစစ်တပ်က ပုံမှန် ပစ်ခတ်တာ ခံနေရတာကြောင့် ယူကရိန်းစစ်သားတွေဟာ ဒန်ညက်စ်ဒေသအတွင်း ဘာ့ခ်မွတ်မြို့နားမှာ ကတုတ်ကျင်းတွေ ပုန်းခိုကျင်းတွေကို ဇွန်လ ၅ ရက်က ပြင်ဆင်နေကြပြီး အခြေအနေက ခက်ခဲ့ပေမယ့် သူတို့ရဲ့ စခန်းတွေကို ဆက်ထိန်းထားနိုင်သေးတယ်လို့ စစ်သားတယောက်က ရိုက်တာ သတင်းဌာနကို ပြောပါတယ်။

“ကျနော်တို့က ရုရှားတွေကို ကျနော်တို့နယ်စပ်ကနေ တိုက်ထုတ်ရမယ်။ ဒါမှ သူတို့ ဘယ်တော့မှ ထပ်မလာမှာ”လို့ စစ်သည် အန်ဒရေက ပြောပါတယ်။

သူနဲ့ ရဲဘော်ရဲဘက်တွေဟာ နောက်ထပ် လက်နက် အထောက်အပံ့တွေရဖို့ ဆန္ဒရှိနေပြီး “တင့်ဖျက်လက်နက်တွေက တော်တော်ကွာခြားအောင် လုပ်နိုင်မယ်။ တင့်ကားတွေ ဖျက်ဆီးခံရရင် ပြေးဖို့ကလွဲလို့ ရွေးစရာမရှိဘူး” လို့ သူတို့က ပြောပါတယ်။

လတ်တလော သီတင်းပတ်တွေအတွင်းမှာ ရုရှားဟာ သူ့တပ်တွေကို ယူကရိန်းအရှေ့ဘက်က စက်မှုမြို့ငယ်လေး ဆေဗေရိုဒန်ညက်စ်အပေါ် အာရုံစိုက်ထားတာပါ။

လူဟန့်စ်နဲ့ ဒန်ညက်စ်ပြည်နယ် ၂ ခုထဲက တခုကို အပြီးသိမ်းဖို့ အကြီးဆုံးမြေပြင်စစ်ပွဲကို ဆင်နွှဲနေပါတယ်။ ယူကရိန်းတပ်တွေက ဆုတ်ခွာပြီးမှ တကျော့ပြန် ထိုးစစ်ဆင်ခဲ့လို့ ရုရှားတွေ အံ့အားသင့်ခဲ့ရပါတယ်။

မြို့ရဲ့တဝက်ကို ယူကရိန်းတပ်က ပြန်သိမ်းပြီး ရုရှားကို တရစပ် ပြန်တိုက်ထုတ်နေတယ်လို့ လူဟန့် ပြည်နယ် အုပ်ချုပ်ရေးမှူးက ပြောပါတယ်။ ဒီပြောဆိုချက်ကို သီးခြား လွတ်လွတ်လပ်လပ် စစ်ဆေး အတည်ပြုနိုင်မှုတော့ မရှိသေးပါဘူး။