ယူကရိန်းနိုင်ငံမှာ ရုရှားစစ်ရှုံးမှသာ တစ်ချိန်က ရုရှားထိန်းချုပ်ခဲ့တဲ့နယ်မြေတွေကို တိုက်ခိုက်သိမ်းပိုက်မှု ရပ်တန့်သွားဖြစ်တယ်လို့ ယူကရိန်းသမ္မတ ဇလန်းစကီးက ဖေဖော်ဝါရီ ၂၄ ရက်မှာ ရုရှားဘက်က အလုံးစုံကျူးကျော်မှု တစ်နှစ်ပြည့်အဖြစ် မှတ်ချက်ပြုပြောဆိုပါတယ်။
ဇလန်းစကီးက "ရုရှားအနေနဲ့ ယူကရိန်းမှာ လုံးဝကျရှုံးရမယ်" ဆိုပြီး လစ်သူယေးနီးယားနိုင်ငံမှာကျင်းပတဲ့ သတင်းစာရှင်းလင်းပွဲတစ်ခုမှာ ဗီဒီယို လင့်ခ်ကတဆင့် ပြောကြားသွားတာပါ။
“ရုရှားဟာ သူဆုံးရှုံးသွားတဲ့ ကိယက်ဗ်နဲ့ ဗေးလ်နီးရက်စ်၊ ချီစီနောနဲ့ ဝါဆောတို့အပြင် ကျနော်တို့ရဲ့ ညီအစ်ကိုနိုင်ငံတွေဖြစ်ကြတဲ့ လတ်ဗီးယား၊ အက်စ်တိုးနီးယားနဲ့ ဂျော်ဂျီယာနိုင်ငံတွေနဲ့အတူ လက်ရှိအချိန်မှာ ခြိမ်းခြောက်ခံနေရတဲ့ တခြားနိုင်ငံတွေကိုပါ လက်တုံ့ပြန် ပြန်သိမ်းပိုက်ချင်တဲ့ သူ့ဝါဒပါ ထာဝရ မေ့ပျောက်သွားရလိမ့်မယ်” လို့ ဇလန်းစကီးက ပြောပါတယ်။
လစ်သူယေးနီယားနိုင်ငံသမ္မတ ဂီတားနက်စ်နောစီဒါကတော့ ဒီစစ်ပွဲမှာ ယူကရိန်းအောင်နိုင်မှသာ စည်းမျဉ်းတွေအပေါ် အခြေခံတဲ့ နိုင်ငံတကာလုပ်ထုံးလုပ်နည်းတွေကို အကာအကွယ်ပေးနိုင်မှာ ဖြစ်တယ်လို့ ထောက်ပြပါတယ်။
“ယူကရိန်းပြည်သူတွေက သူတို့ကိုယ်ပိုင်ဂုဏ်သိက္ခာ၊ ကိုယ်ပိုင်လက္ခဏာနဲ့ သူတို့နိုင်ငံရဲ့ အချုပ်အခြာအာဏာအတွက် ရဲရင့်စွာ တိုက်ပွဲဝင်နေကြတာပါ၊ သူတို့ပုခုံးပေါ်တင်ထားတဲ့အရာက ဥရောပရဲ့အနာဂတ်လည်း ဖြစ်ပါတယ်” ဆိုပြီး နောစီဒါက ပြောသွားတာပါ။
ဖေဖော်ဝါရီ ၂၁ ရက်က မော်စကိုမြို့မှာ ပူတင်နောက်ဆုံးပြောကြားခဲ့တဲ့ နှစ်ပတ်လည်မိန့်ခွန်းကို ရည်ညွှန်းကာ "ဒီရုရှားခေါင်းဆောင်ဟာ ဘာတွေပဲဖြစ်နေပါစေ ခေါင်းမာစွာ ရှေ့ဆက်တိုးလိုတဲ့ ဆန္ဒကို ထပ်ပြီးပြသခဲ့တယ်"လို့ နောစီဒါက မှတ်ချက်ပြုပြောဆိုပါတယ်။
“ကရင်မလင်နန်းတော်ရဲ့ နယ်ချဲ့လိုတဲ့ရည်မှန်းချက်တွေဟာ ယူကရိန်းနိုင်ငံရှင်သန်ရေး အပြင် ဥရောပရဲ့ လုံခြုံရေးဖွဲ့စည်းပုံကိုပါ ခြိမ်းခြောက်နေတာဖြစ်တယ်”လို့လည်း နောစီဒါက ဖြည့်စွက် ပြောဆိုပါတယ်။
ယူကရိန်းနဲ့တိုက်ပွဲအတွင်း ဖမ်းမိတဲ့ အမေရိကန်နိုင်ငံသား ၂ ယောက်လို့ ပြောထားတဲ့ လူ ၂ ယောက်ရဲ့ ပုံတွေကို ရုရှားမီဒီယာက ဇွန် ၁၇ ရက်မှာ ထုတ်လွှင့်ခဲ့ပါတယ်။
ဒါဟာ စစ်သုံ့ပန်းအဖြစ် ပထမဆုံး အတည်ပြုချက် ဖြစ်နိုင်တယ်လို့ ရိုက်တာသတင်းဌာနက သုံးသပ်ပါတယ်။
အလာဘားမားပြည်နယ် ဟာ့တ်ဆယ်လေမြို့က အသက် ၂၇ နှစ်အရွယ် အန်ဒီ ဟိုင်နဲ့ တက်စ်ကာလူဆာမြို့က အသက် ၃၉ နှစ်အရွယ် အလက်ဇန်းဒါး ဒရူအယ်ကေတို့နဲ့ အကျဉ်းချုံး လူတွေ့ မေးမြန်းခန်းလို့ ပြောတဲ့ ရုပ်သံကို ရုရှားရုပ်သံ ရော့စီယာဝမ်းက ထုတ်လွှင့်ပြသခဲ့တာပါ။
သူတို့ ၂ ယောက်ဟာ ယူကရိန်းနိုင်ငံထဲမှာ ပျောက်နေတာ သီတင်းပတ်တပတ် ရှိပြီး အကျဉ်းသားအဖြစ် အဖမ်းခံ ထားရမှာ စိုးရိမ်နေခဲ့တာလို့ သူတို့ရဲ့ မိသားစုတွေက ဇွန် ၁၅ ရက်မှာ ပြောပါတယ်။
တယ်လီဂရမ် အက်ပ်ထဲမှာ တင်ထားတဲ့ ၆စက္ကန့်စီ ကြာတဲ့ ရုပ်သံတွေထဲမှာ မုတ်ဆိတ်နဲ့ လူတယောက်က ကျနော့်နာမည် အလက်ဇန်းဒါး ဒရူအေက်ဖြစ်ပြီး စစ်ကို ဆန့်ကျင်တယ်လို့ အမေရိကန်လေသံနဲ့ ပြောထားသလို့ ကျနော် စစ်ကို ဆန့်ကျင်တယ်လို့ ရုရှားဘာသာနဲ့လည်း သူက ထပ်ပြောထားပါတယ်။
ဟိုင်လို့ ရုရှားမီဒီယာကပြောတဲ့ အမျိုးသားကတော့ ကျနော်စစ်ကို ဆန့်ကျင်တယ်လို့ ၂ စက္ကန့်ကြာတဲ့ ရုပ်သံထဲမှာ ပြောထားပါတယ်။
ဒီအစီရင်ခံစာတွေနဲ့ ပတ်သက်ပြီး မှတ်ချက်ပေးဖို့ တောင်းဆိုချက်ကို ရုရှားကာကွယ်ရေး ဝန်ကြီးဌာနက မတုန့်ပြန်သေးပါဘူး။
ဒီလူတွေ လွတ်လွတ်လပ်လပ် ပြောနေတာလား ဆိုတာကိုရော သူတို့ရဲ့ တယ်လီဂရမ် အကောင့်တွေကိုပါ သီးခြား လွတ်လွတ်လပ်လပ် စစ်ဆေးအတည်ပြုနိုင်တာ မရှိသေးပါဘူး။