ယူကရိန်းတောင်ပိုင်း ကရီဗီယီရီမြို့ရှိ လူနေအဆောက်အအုံတလုံးကို ဒီဇင်ဘာ ၁၆ ရက်က ရုရှားဒုံးကျည် တစ်စင်း ထိမှန်ခဲ့ရာမှာ လူ ၃ ဦး သေဆုံးပြီး အနည်းဆုံး ၁၃ ဦး ဒဏ်ရာရရှိခဲ့ကြောင်း ဒေသဆိုင်ရာ အုပ်ချုပ်ရေးမှူးက ပြောပါတယ်။
သူတို့ဖာသာ အိမ်ထဲမှာ ခပ်ရိုးရိုးရှင်းရှင်း နေထိုင်ကြတဲ့ အသက် ၆၄ နှစ် အရွယ် အမျိုးသမီးတဦးနဲ့ လူငယ်စုံတွဲတတွဲ သေဆုံးသွားတာဖြစ်ပြီး သူတို့ရဲ့သားငယ်လေးကတော့ အပျက်အစီးတွေ အောက်ကို ရောက်နေတာလို့ အုပ်ချုပ်ရေးမှူး ဗာလန်တင် ရဇ်နီချန်ကို က တယ်လီဂရမ်မှာ ရေးသားခဲ့ပါတယ်။
ဒွန်းနက်စ်ခ်ဒေသကို သွားရောက်ခဲ့တဲ့ ယူကရိန်း ဒုတိယပြည်ထဲရေးဝန်ကြီး ယက်ဗ်ဟံန်ယဲ့နင် ကလည်း သူ့ခရီးစဉ်အတွင်း ဒီဇင်ဘာ ၁၆ ရက် မနက်ပိုင်းမှာ ရုရှားက ယူကရိန်းကို ဒုံးကျည်အစင်း ၅၀ လောက် ပစ်လွှတ်ခဲ့ကြောင်း ပြောကြားခဲ့ပါတယ်။
“ကျနော်တို့ရဲ့ ဒုံးခွင်းဒုံးစနစ်က အတော်လေး ကောင်းမွန်ပါတယ်၊ ဒါပေမဲ့ ရုရှားဖက်ဒရေးရှင်းက ပစ်လွှတ်တဲ့ ခရုဇ်ဒုံးကျည် အရေအတွက် များပြားတာကြောင့် အခက်အခဲတချို့နဲ့ ရင်ဆိုင်နေရဆဲဖြစ်ပါတယ်”လို့ သူက ပြောဆိုပါတယ်။
ရုရှားက ပစ်ခတ်ခဲ့တဲ့ ဒုံးကျည် ၇၆ လုံးထဲက ၆၀ ကို ယူကရိန်းစစ်တပ်က ပစ်ချခဲ့တယ်လို့ ယူကရိန်းကာကွယ်ရေးဦးစီးချုပ်က ဒီဇင်ဘာ ၁၆ ရက် နှောင်းပိုင်းမှာ ပြောပါတယ်။
ရုရှားနိုင်ငံဟာ ယူကရိန်းနိုင်ငံတဝန်း စွမ်းအင်ဆိုင်ရာ အဆောက်အအုံတွေကို ဒီဇင်ဘာ ၁၆ ရက် မနက်ပိုင်းက ဒုံးကျည် ဒါဇင်နဲ့ချီပြီး ပစ်ခတ်ခဲ့လို့ အနည်းဆုံး လူနှစ်ဦး သေဆုံးပြီး စွမ်းအင်စက်ရုံ ၉ ခုလည်း ပျက်စီးသွားတာကြောင့် တချို့နေရာတွေမှာ လျှပ်စစ်မီးပြတ်တောက်ခဲ့ရပါတယ်။
ဆောင်းရာသီကာလမှာလည်း နိုင်ငံအနှံ့ အရေးပေါ် ဓာတ်အားဖြတ်တောက်မှုတွေကို မဖြစ်မနေ ကြုံရဖို့ရှိနေတာပါ။
"ကျနော်တို့ရဲ့ စွမ်းအင်အခြေခံ အဆောက်အအုံတွေကို တိုက်ခိုက်တာ၊ ဆောင်းရာသီမှာ ပြည်သူတွေကို ဒုက္ခရောက်အောင်လုပ်တာတွေဟာ ယူကရိန်းနိုင်ငံကို လူမျိုးတုံးသတ်ဖြတ်မှု ကျူးလွန်တာပဲ " လို့ ယဲ့နင် က ပြောကြားခဲ့ပါတယ်။
ရုရှားဒုဝန်ကြီးချုပ် မာရတ်ခုရှနူလင်ဟာ ရုရှားက သိမ်းပိုက်ထားတဲ့ ယူကရိန်းတောင်ပိုင်းက မာရီအူပယ်မြို့ကို လည်ပတ်ခဲ့တယ်လို့ သူ့ရဲ့ တယ်လီဂရမ် လူမှုကွန်ရက်ကနေ မေ ၈ ရက်မှာ ကြေညာပါတယ်။
သူဟာ ယူကရိန်းတောင်ပိုင်း ဆိပ်ကမ်းမြို့ကို ခြေချတဲ့ ရာထူးအမြင့်ဆုံး အစိုးရအရာရှိ ဖြစ်လာပါတယ်။
မာရီအူပယ်မြို့ဟာ ရုရှားက ၂၀၁၄ ခုနှစ်မှာ သိမ်းပိုက်ထားတဲ့ ခရိုင်းမီးယားကျွန်းဆွယ်၊ ရုရှားက ကျောထောက်နောက်ခံ ပေးထားတဲ့ ခွဲထွက်ရေးသူပုန်တွေ သိမ်းပိုက်ထားတဲ့ ယူကရိန်း အရှေ့ပိုင်း က ဒန်ညက်စ်နဲ့ လူဟန့်စ် ဒေသတွေနဲ့ ချိတ်ဆက်ဖို့ ရုရှားက ကြိုးစားနေတဲ့ အဓိကမြို့ပါ။
ဆောက်လုပ်ရေးနဲ့ မြို့ပြ ဖွံ့ဖြိုးရေးဆိုင်ရာ ဒုဝန်ကြီးချုပ်က ဒီမြို့ကို ပြန်တည်ဖို့ ဆောက်လုပ်ရေး ပစ္စည်းတွေ သယ်ရာမှာ ဆိပ်ကမ်းကို သုံးဖို့ ပြောခဲ့ကြောင်း ရုရှားကာကွယ်ရေး ဝန်ကြီး ဌာနရဲ့ ဇဗက်ဇ်ဒါ ရုပ်သံက ပြောပါတယ်။
ရုရှားက ကျောထောက်နောက်ခံ ပေးထားပြီး ဒန်ညက်စ်ပြည်သူ့သမ္မတနိုင်ငံလို့ တကိုယ်တော် ကြေညာထားတဲ့ ဒေသန္တရအကြီးအကဲ ဒန်းနစ် ပွတ်ရှီလင်နဲ့အတူ ရုရှားဒုဝန်ကြီးချုပ်က ဆိပ်ကမ်း ကို သွားရောက်လည်ပတ်နေပုံကိုလည်း ရုပ်သံက ပြသခဲ့ပါတယ်။
ယူကရိန်းကို ဖေဖော်ဝါရီ ၂၄ ရက်က စပြီး ကျူးကျော် တိုက်ခိုက်ခဲ့တဲ့ ရုရှားဟာ အချိန် ၂ လ လောက် ဝိုင်းထားအပြီး အာဇော့ဗ်ပင်လယ်ဆိပ်ကမ်းမြို့ မာရီအူပယ်ကို ထိန်းချုပ်နိုင်ပြီလို့ ကြေညာခဲ့ပါတယ်။
ဒါပေမဲ့ ယူကရိန်း တိုက်ခိုက်ရေးသမားတွေက မြို့ရဲ့ အာဇော့ဗ်စတယ် သံမဏိစက်ရုံထဲမှာ ခြေကုပ်ယူထားဆဲ ဖြစ်ပြီး ရုရှားက စက်ရုံကို လက်နက်ကြီးတွေနဲ့ အပြင်းအထန် တိုက်ခိုက်နေ တုန်းပဲလို့ ယူကရိန်းစစ်တပ်က ပြောခဲ့ပါတယ်။