ရုရှားက ကျူး​ကျော် သိမ်းပိုက်ထားပြီး လူထုဆန္ဒခံယူပွဲတွေ လုပ်နေတဲ့ ယူကရိန်းဒေသတွေကို ရုရှားအပြည့်အဝ ကာကွယ်သွားမယ်လို့ ရုရှားနိုင်ငံခြားရေးဝန်ကြီး ဆာဂီလာ့ဗ်ရော့ဗ်က စက်တင်ဘာ ၂၄ ရက်မှာ ပြောပါတယ်။

ရုရှားက ပဋိပက္ခတွေ ပိုပြင်းထန်လာအောင် လုပ်နိုင်ပြီး နျူကလီးယား လက်နက်တွေကိုတောင် သုံးလာမှာကို စိုးရိမ်နေကြတာပါ။

အမေရိကန်နိုင်ငံ နယူးယောက်မြို့မှာ ကျင်းပတဲ့ ကုလသမဂ္ဂ အထွေထွေညီလာခံမှာ မိန့်ခွန်း ပြောချိန်မှာ ခုလို ပြောခဲ့တာပါ။

ရုရှားဟာ သူ့ အိမ်နီးချင်းကို ဖေဖော်ဝါရီလ ကျူးကျော်မှုအတွက် အကြောင်းပြဖို့ ကြိုးပမ်းရင်း ရုရှားအစိုးရရဲ့ မဟုတ်မမှန် အခိုင်အမာ ပြောစကားတွေကို ထပ်ပြောခဲ့တယ်လို့ ရိုက်တာ သတင်းမှာ ဖော်ပြပါတယ်။

ယူကရိန်း ရွေးကောက်ခံအစိုးဟာ တရားမ၀င်ဘဲ နာဇီလက်သစ်ဝါဒီတွေနဲ့ ဖွဲ့စည်းထားပြီး နိုင်ငံ အရှေ့ပိုင်းက ရုရှားစကားပြောတဲ့ ပြည်သူတွေကို နှိပ်ကွပ်နေတယ်လို့ လာ့ဗ်ရော့ဗ်က ကုလ အထွေထွေ ညီလာခံနဲ့ ကမ္ဘာ့မီဒီယာတွေကို ထပ်ခါတလဲလဲ ပြောဆိုခဲ့ပါတယ်။

ရုရှားဟာ အင်အားသုံး သိမ်းပိုက်ထားတဲ့ ယူကရိန်းအရှေ့ပိုင်းဒေသ ၄ ခုမှာ စက်တင်ဘာ ၂၃ ရက်က လူထုဆန္ဒခံယူပွဲ လုပ်ခဲ့ပါတယ်။

ဒီပွဲကို အတုအယောင်အဖြစ် အနောက်နိုင်ငံတွေက ပယ်ချခဲ့တာပါ။ ၄ ရက်ကြာ မဲခွဲမှုအတွင်း ဒေသခံတွေဟာ မဲပေးဖို့ အတင်းအကျပ် ဖိအားပေးခံ နေရတယ်လို့ ယူကရိန်းအစိုးရက ပြောပါတယ်။ 

ယူကရိန်းကလည်း ဆန္ဒခံယူပွဲနဲ့ပတ်သက်ပြီး ကုလသမဂ္ဂလုံခြုံရေးကောင်စီမှာ အရေးပေါ် အစည်းအဝေးကို ကျင်းပဖို့ တောင်းဆိုခဲ့ပါတယ်။ 

ရုရှားဟာ ကုလသမဂ္ဂပဋိဉာဉ်ကို ချိုးဖောက်မှု နဲ့ ယူကရိန်းရဲ့ နိုင်ငံတကာ အသိအမှတ်ပြု နယ်နိမိတ်တွေကို ပြောင်းလဲဖို့ နောက်ထပ် ကြိုးပမ်းမှုတွေအတွက် တာဝန်ခံရမယ်လို့ ယူကရိန်း နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ အိုလက် နစ်ကိုလန်ကိုက တွစ်တာ လူမှုကွန်ရက်ပေါ်ကနေ ပြောခဲ့ပါတယ်။

ရုရှားဟာ ခရိုင်းမီးယားဒေသမှ စွယ်စုံသုံး သီးနှံရိတ်စက်တွေကို ရုရှားသိမ်းပိုက်ထားတဲ့ ယူကရိန်း ဒေသ နှစ်ခုဆီ ပေးပို့လိုက်ကြောင်း ရုရှား-ခန့်အပ်တဲ့-ဒေသအုပ်ချုပ်ရေးအဖွဲ့ရဲ့ ကိုယ်စားလှယ်တဦးက ပြောကြားခဲ့ပါတယ်။ 

ဇာပိုရဇ်ဟီယာ နဲ့ ခါရ်ဆွန်း ဒေသတွေမှာ ရိတ်သိမ်းချိန်အတွင်း လယ်ယာသုံး စက်ယန္တရားတွေ ပြတ်လပ်သွားတာကို ကာမိစေဖို့ ပေးပို့လိုက်တာဖြစ်ကြောင်း ခရိုင်းမီးယားမြောက်ပိုင်း လိုဘာနော့ဗ်ကျေးရွာက အမည်မဖော်လိုသူ ရုရှားဩဇာခံ ဇာပိုရဇ်ဟီယာဒေသ အုပ်ချုပ်ရေးမှူးက သတင်းထောက်တွေကို ပြောကြားခဲ့ပါတယ်။ 

အရင်က ရှိခဲ့တဲ့ ပစ္စည်းကိရိယာတွေက ပျက်သွားတာမျိုး၊ အရင်ပိုင်ရှင်တွေက နယ်မြေပြင်ပကို ယူသွားတာမျိုးတွေကြောင့် ကောက်ရိတ်စက်တွေကို လိုအပ်နေတာ ဖြစ်ကြောင်း တာဝန်ရှိသူက ပြောပါတယ်။ 

ဇာပိုရဇ်ဟီယာရှိ အလုပ်အကိုင် စီမံခန့်ခွဲရေး အကြီးအကဲ အက်ဗ်ဂျဲနီ ဘာလစ်စကီက ဒီ စွယ်စုံသုံး ကောက်ရိတ်စက်တွေဟာ ရုရှား စိုက်ပျိုးရေးဝန်ကြီးဌာနက ပံ့ပိုးပေးထားကြောင်း လူမှုမီဒီယာမှာ ပြောကြားခဲ့ပါတယ်။ 

ရိတ်သိမ်းချိန်အတွင်း ဒီဒေသမှာ နောက်ထပ် လယ်ယာသုံးစက် ၇၅ စီး ထပ်ရရှိသင့်ကြောင်း သူက ဆိုပါတယ်။ 

ယူကရိန်းကတော့ ကမ္ဘာ့အကြီးဆုံး ဂျုံတင်ပို့သူ ရုရှားဟာ သူ့စစ်တပ်က သိမ်းပိုက်ထားတဲ့ ယူကရိန်းနယ်မြေထဲက ကောက်နှံစပါးတွေကို ခိုးယူနေကြောင်း စွပ်စွဲထားပြီး မော်စကိုကတော့ ဒါကိုငြင်းဆန်ထားပါတယ်။