တောင်ကိုရီးယား သမ္မတသစ် ယွန်းဆက်ယိုးလ်ဟာ မေ ၁၁ ရက်မှာ ကနေဒါနိုင်ငံက အထက်လွှတ်တော်ဥက္ကဋ္ဌ ဂျော့ချ်ဖာရေး ခေါင်းဆောင်တဲ့ ကိုယ်စားလှယ်အဖွဲ့ကို ဆိုးလ်မြို့မှာ လက်ခံတွေ့ဆုံပါတယ်။
မနေ့က ရာထူးလက်ခံတဲ့ သမ္မတသစ်ကို ကနေဒါ ကိုယ်စားလှယ်အဖွဲ့က သွားရောက်တွေ့ဆုံသလို ဆော်ဒီ ရေနံကုမ္ပဏီဖြစ်တဲ့ Saudi Aramco ရဲ့ ဘုတ်အဖွဲ့ ဒါရိုက်တာလည်းဖြစ်၊ Public Investment Fund အဖွဲ့က အုပ်ချုပ်ရေးအရာရှိလည်း ဖြစ်တဲ့ ယာဆာ အောသ်မန် အယ် ရူမေယံကလည်း သွားရောက်တွေ့ဆုံပါတယ်။
ကနေဒါနဲ့ ဆော်ဒီက ကိုယ်စားလှယ်အဖွဲ့တွေရဲ့ ခေါင်းဆောင်တွေဟာ မနေ့က သမ္မသစ်ရာထူး လက်ခံတဲ့ အခမ်းအနားကိုလည်း တက်ရောက်ခဲ့ကြပါတယ်။
သမ္မတအဖြစ် ကျမ်းသစ္စာကျိန်ဆိုတဲ့ အခမ်းအနားကို နိုင်ငံခြားသားဧည့်သည် ၃၀၀ လောက် တက်ရောက်ခဲ့တယ်လို့ သိရပါတယ်။
တောင်ကိုရီးယားသမ္မတသစ်ဟာ အင်ဒိုနီးရှား၊ ကာတာ၊ နိုင်ဂျီးရီးယား၊ ကာတာ၊ မွန်ဂိုလီးယားတို့က ကိုယ်စားလှယ်အဖွဲ့တွေ၊ ဂျပန်က လွှတ်တော်အမတ်တွေနဲ့လည်း တွေ့ဆုံပြီး ပူးပေါင်းဆောင်ရွက်ရေး မြှင့်တင်ဖို့ ဆွေးနွေးခဲ့ကြပါတယ်။
အသက် ၆၁ နှစ်အရွယ် တောင်ကိုရီးယားသမ္မတဟာ မြောက်ကိုရီးယားရဲ့ ခြိမ်းခြောက်မှုနဲ့ ကိုဗစ်အလွန် စီးပွားရေး ပြန်လည်ထူထောင်ရေးဆိုတဲ့ စိန်ခေါ်မှုနှစ်ခုကို အဓိက ရင်ဆိုင်ကိုင်တွယ်ရဖို့ ရှိပါတယ်။
တောင်ကိုရီးယားရဲ့ အကြိတ်အနယ်အရှိဆုံး ရွေးကောက်ပွဲကနေ အတိုက်အခံ ကွန်ဆာဗေးတစ်ပါတီ ခေါင်းဆောင် ယွန်းဆက်ယိုးလ်ကို မတ် ၁၀ ရက်မှာ သမ္မတသစ်အဖြစ် ရွေးချယ်တင်မြှောက်လိုက်ပါတယ်။
မတ်လ ၁၀ ရက် ညနေ ၅ နာရီခွဲ ဆန္ဒမဲ ၉၉ ဒသမ ၈ ရာခိုင်နှုန်း ရေတွက်ပြီးချိန်မှာ People Power Party မှ အသက် ၆၀ နှစ်ရှိ မစ္စတာယွန်းက ၄၈ ဒဿမ ၆ ရာခိုင်နှုန်းရရှိပြီး အတိုက်အခံပါတီမှ လီဂျေးမြောင်က ၄၇ ဒဿမ ၈ ရာခိုင်နှုန်း ရရှိကာ ပွတ်ကာသီကာ အနိုင်ရရှိခဲ့တာပါ။
လေးစားဂုဏ်ယူရတဲ့ အခြေခံဥပဒေနဲ့ ပါလီမန် တို့အောက်မှာ အတိုက်အခံပါတီတွေနဲ့ လက်တွဲဆောင်ရွက်ရင်း အကွဲအပြဲနိုင်ငံရေးကို ရင်ကြားစေ့ညီညွတ်ဖို့ ကြိုးစားသွားမယ်လို့ ယွန်းဆက်ယိုးလ်ကပြောပါတယ်။
“ကြီးမြတ်သောလူထုရဲ့ အောင်ပွဲပါ၊ ကျနော်တို့ ပြိုင်ဆိုင်မှု ပြီးသွားပါပြီ၊ အခုကစပြီး ကိုရီးသမ္မတနိုင်ငံနဲ့ ပြည်သူလူထုအတွက် ညီညီညွတ်ညွတ် လက်တွဲ ဆောင်ရွက်ကြပါစို့။”
အခြေခံဥပဒေအရ သမ္မတသက်တမ်း ၅ နှစ်သာ ထမ်းဆောင်ခွင့်ရှိတဲ့အတွက် လက်ရှိသမ္မတ မွန်ဂျေအင်းက သမ္မတသစ် ယွန်းဆက်ယိုးလ်ကို ဒီလထဲမှာ အာဏာလွှဲပြောင်းပေးရမှာပါ။
အာရှရဲ့ စတုတ္ထစီးပွားရေးအင်အားကြီးနိုင်ငံကို ယွန်းက လာမယ့်ငါးနှစ်အတွင်း ပဲ့ကိုင်ပုံဖော်သွားရ မှာပါ။
