အိန္ဒိယနိုင်ငံအရှေ့ပိုင်းက အနောက်ဘန်ဂေါပြည်နယ်မှာ ခရီးသည်တင်ရထားတစီး လမ်းချော်လို့ သေဆုံးသူဦးရေ ၉ ဦး ရှိသွားပြီလို့ အာဏာပိုင်တွေက ဇန်နဝါရီ ၁၄ ရက်မှာ ပြောပါတယ်။

ဂျယ်ပိုင်ဂူရီခရိုင် မွိုင်နာဂူရီ ဘူတာရုံနားမှာ ရထားတွဲ ၇ တွဲ လမ်းချော်ခဲ့တာလို့ အကြီးတန်း အစိုးရအရာရှိ တယောက်က ပြောပါတယ်။

ရထားလမ်းချော်နေတဲ့နေရာမှာ ကယ်ဆယ်ရေးလုပ်ငန်းတွေ ဆက်လုပ်နေပြီး ပျက်ကျနေတဲ့ ရထားတွဲတွေထဲမှေ ပိတ်မိနေတဲ့ ခရီးသည်တွေကို ဝန်ချီစက်တွေရဲ့ အကူအညီနဲ့ ဖယ်ရှား ကယ်ထုတ်နေပါတယ်။

ဒဏ်ရာရသူ ၃၆ ယောက်ကို ဆေးရုံတင်ထားတယ်လို့ အရှေ့မြောက်ပိုင်း ရထားလုပ်ငန်း မန်နေဂျာချုပ် အန်ရှု ဂုပတားက ပြောပါတယ်။

မတော်တဆဖြစ်ရတဲ့ အကြောင်းရင်း အသေးစိတ်ကို အာဏာပိုင်တွေက မပြောသေးပါဘူး။

အစိုးရပိုင် အိန္ဒိယရဲ့ရထားလုပ်ငန်းဟာ အိုမင်းဟောင်းနွမ်းနေတဲ့ အခြေခံအဆောက်အအုံတွေ ကြောင့် ဘေးကင်းရေး စံချိန်စံညွှန်းတွေ လစ်ဟာနေတယ်လို့ ရိုက်တာသတင်းမှာ ဖော်ပြ ထားပါတယ်။

ဂျပန်နိုင်ငံရဲ့ မြို့တော်တိုကျိုမှာ အောက်တိုဘာ ၇ ရက်ညက အင်အားပြင်းငလျင် လှုပ်ခတ်ပြီးနောက်မှာ မောင်းသူမဲ့ ရထားတစ်စင်း လမ်းချော်သွားခဲ့ပြီး တိုကျိုနဲ့ကပ်ရက်က ချီဘစီရင်စုက ရေပိုက်လိုင်း ပေါက်ကွဲခဲ့ပါတယ်။ 

အလိုအလျောက် လမ်းကြောင်းကူးပြောင်း မောင်းနှင်စနစ်နဲ့သွားနေတဲ့ Nippori-Toneri Liner ရထားဟာ တိုကျိုမြောက်ဘက်မှာ အရေးပေါ်ရပ်နားလိုက်ရပြီးနောက် အလုံးစုံကို လမ်းချော်သွားတာပါ။ ရထားလိုင်းဟာ အောက်တိုဘာ ၈ ရက် မနက်မှာလည်း ရပ်နားထားရဆဲဖြစ်ပါတယ်။

ချီးဘစီရင်စုမှာ ရေစီးရေလာမြောင်းတံတားတခုပေါ်က ပျက်စီးနေတဲ့ပိုက်မှ ရေတွေ ယိုစိမ့်ထွက်နေပြီး တံတားအောက်ရှိမြစ်ထဲ စီးနေပါတယ်။ 

ငလျင်ဟာ တိုကျိုရဲ့အရှေ့ဘက်ကိုဗဟိုပြုပြီး ဒေသစံတော်ချိန် ည ၁၀ နာရီ ၄၁ မိနစ်မှာ လှုပ်ခတ်သွားတာပါ။  ဂျပန်မိုးလေဝသအေဂျင်စီက အစဦးပိုင်း ငလျင်ပြင်းအား ၆  ဒသမ ၁ လို့ ထုတ်ပြန်ခဲ့ရာက နောက်တော့ ၅ ဒသမ၉ လို့ လျှော့ချထုတ်ပြန်ခဲ့ပါတယ်။ 

ငလျင်ကြောင့် လူဒါဇင်များစွာ ဒဏ်ရာရရှိခဲ့ပြီး အဓိကကတော့ ပြုတ်ကျတဲ့ အရာဝတ္ထုတွေ ထိမှန်တာကြောင့်ဖြစ်ပြီး အသေးစားဒဏ်ရာတွေပဲ ရရှိတာဖြစ်ပါတယ်။