တနင်္သာရီတိုင်းမှာ တော်လှန်ရေးကို ဒီနှစ်မှာ ရှေ့တဆင့်တက်ဖို့အတွက် “ပါဝင်လက်တွဲ တနင်္သာရီအောင်ပွဲ”လို့ အမည်ပေးထားတဲ့ အစီအစဥ်တခုကို တနင်္သာရီစစ်ဒေသခွဲ၊ ကွပ်ကဲရေးအဖွဲ့နဲ့ ပြည်တွင်းပြည်ပထောက်ပို့ရဲဘော်တွေ ကမကထပြုလုပ်ပြီး ဇန်နဝါရီ ၁၅ ရက်မှ ဖေဖော်ဝါရီ ၂၆ ရက်အထိ ကျင်းပသွားဖို့ရှိနေပါတယ်။
တနင်္သာရီစစ်ဒေသအတွက် ဒေါ်လာတစ်သိန်း ရရှိရေး ရန်ပုံငွေရှာမယ့် စီမံကိန်းဖွင့်ပွဲကို အရှင်ထာဝရ(ရွှေဝါရောင်ဆရာတော်)၊ NUG နိုင်ငံတော် ဝန်ကြီးချုပ် မန်းဝင်းခိုင်သန်း ကာကွယ်ရေးဝန်ကြီး ဦးရည်မွန်၊ လူ့အခွင့်အရေးဝန်ကြီး ဦးအောင်မျိုးမင်း၊ ဒုကာကွယ်ရေးဝန်ကြီး နိုင်ကောင်းရွတ်၊ ဒါရိုက်တာ ကိုပေါက်တို့က အမှာစကားပြောကြဖို့ရှိသလို တနင်္သာရီစစ်ဒေသခွဲ ကွပ်ကဲရေးအဖွဲ့ တာဝန်ခံဂျူပီတာက စစ်ရေးအခြေအနေကို တင်ပြသွားဖို့ ရှိပါတယ်။
တနင်္သာရီစစ်ဒေသခွဲ ကွပ်ကဲရေးအဖွဲ့က တနင်္သာရီတော်လှန်ရေး ရှေ့တဆင့်တက်ပြီး စစ်အာဏာရှင်စနစ်ကို အပြီးသတ်ဖယ်ရှားမယ့် ခုခံတွန်းလှန်စစ်ဆင်နွှဲရာမှာ အရေးပေါ် လိုအပ်ချက်တွေ ဖြည့်ဆည်းရာမှာ သုံးစွဲဖို့ ရည်ရွယ်ချက်နဲ့ လုပ်ဆောင်တာလို့ တာဝန်ရှိသူတဦးက ဒီဗွီဘီကို ပြောပါတယ်။
“ကျနော်တို့ဟာ ဒီနှစ်ကာလထဲမှာ တိုက်ခိုက်ရေးကာလလို့ သတ်မှတ်ထားတဲ့အတွက် ပြည်သူလူထုတွေအနေနဲ့ စစ်ရေးသတိရှိကြပါ။ စစ်ကောင်စီတပ်စွဲထားတဲ့ နေရာတွေမှာ မနေကြဖို့၊ ခရီးသွားရင်လည်း စကစယဉ်တန်းတွေနောက်ကနေ ခပ်ခွာခွာနေပေးကြဖို့ ပြည်သူလူထုကို အသိပေးချင်တယ်။”
ဒီစီမံကိန်းအောင်မြင်ဖို့အတွက် အာရှ၊ ဥရောပနဲ့ အမေရိကန်နိုင်ငံတွေမှာ ငွေကောက်ခံပွဲကို လေးကြိမ်တိုင်တိုင် ကျင်းပသွားမှာဖြစ်ပြီး သတင်းဌာနတွေနဲ့ ဖေ့စ်ဘွတ်ခ်စာမျက်နှာတွေမှာလည်း တိုက်ရိုက်ထုတ်လွှင့်သွားမယ်လို့ သိရပါတယ်။
တနင်္သာရီစစ်ဒေသခွဲ-ကွပ်ကဲရေးဟာ အမှတ်-၂ တောင်ပိုင်းစစ်ဒေသကွပ်ကဲရေးအောက်မှာ ရှိပြီး စစ်ရေးဌာန၊ ထောက်လှမ်းရေးဌာန၊ စစ်ဆင်ရေးဌာန၊ ထောက်ပို့၊ ပြည်သူ့လုံခြုံရေးနဲ့ သတင်းနဲ့ဝါဒဖြန့်ချိရေးဌာနတို့နဲ့ ဖွဲ့စည်းထားတယ်လို့လည်း သိရပါတယ်။
စစ်ကောင်စီတပ်ရဲ့ရဟတ်ယာဉ်တွေကိုခြိမ်းခြောက်နိုင်တဲ့ Patriot ပခုံးထမ်းလောင်ချာကို ယောဒေသကာကွယ်ရေးတပ် (YDF)က အောင်မြင်စွာ ထုတ်လုပ်နိုင်ခဲ့ပြီဖြစ်လို့ “မြေပြင်ကိုလည်း သိမ်းမယ်၊ ဝေဟင်ကိုလည်းထိန်းမယ်” လို့အမည်ပေးထားတဲ့ ဒေါ်လာ ၂ သိန်းခွဲ ရန်ပုံငွေရှာတဲ့ ကမ်ပိန်းကို သြဂုတ် ၉ ရက်က စတင်လိုက်ပါတယ်။
YDFနဲ့ မဟာမိတ်တွေအားလုံးအတွက် လက်နက်တွေ အမြန်ဆုံးနဲ့ အများဆုံးအရေအတွက် ရအောင် လိုအပ်တဲ့ ဘဏ္ဍာငွေရရှိဖို့အတွက် ဒီကမ်ပိန်းကို စတင်လိုက်တာဖြစ်တယ်လို့ YDF Fundraising Team အဖွဲ့ဝင်တဦးက ပြောပါတယ်။
“ကျနော်တို့ရဲ့ ကြိုးပမ်းမှုနဲ့ ပခုံးထမ်းတွေဆိုတာက နည်းပညာခက်ခက်ခဲခဲနဲ့ တီထွင်နိုင်ခဲ့ပြီ။ ခက်တာက တိုက်ပွဲဝင်အရေအတွက်ရအောင် ထုတ်လုပ်ဖို့က ပြည်သူ့အားလိုပါတယ်။ ပခုံးထမ်းဟာ လေထဲက ရန်သူကို ကောင်းကောင်းခြိမ်းခြောက်နိုင်ပါတယ်။ မမြင်ဖူးရင် ရုပ်ရှင်တွေထဲ ကြည့်ပါ။ တလက်မှ ကျပ်သိန်း ၂၀ အောက်ကုန်ကျမယ့် ပခုံးထမ်းတွေ အများအပြားနဲ့ ဒေါ်လာမီလီယံကျော် ရဟတ်ယာဉ်ကြီးကို ဘယ်လိုပစ်ချလိုက်တာဆိုတဲ့ ဇာတ်လမ်းတွေ ပြောပြနိုင်ဖို့ ဒေါ်လာ ၂ သိန်းခွဲ ရဟတ်ယာဉ်ကို ပစ်ချမယ့် အိပ်မက် အကောင်အထည်ဖော်ချင်ပါတယ်။ တယောက်ဒေါ်လာ ၁၀၀ ထည့်ရင် လူ ၂,၅၀၀ ပဲ လိုတာပါ အများကြီး မဟုတ်ပါဘူး။”
ပခုံးထမ်းလောင်ချာတွေကို လျှို့ဝှက်ထုတ်လုပ်နေတာလည်း ၆ လလောက်ရှိနေပြီး အရင်က ကိုယ်ပိုင်ငွေနဲ့ လုပ်ခဲ့ကြရာက အခုကတော့ အနည်းဆုံး စမ်းသပ်ပစ်ခတ်နိုင်တဲ့ အဆင့်ရောက်ပြီ ဖြစ်လို့ အများပြည်သူထံ ရန်ပုံငွေတောင်းခံရခြင်း ဖြစ်တယ်၊ ဒီရလဒ်ထွက်လာဖို့ ရဲဘော်တွေရဲ့ ခြေလက်အင်္ဂါတွေ စွန့်လွှတ်ခဲ့ရတာတွေ ရှိခဲ့တယ်လို့ YDF Fundraising Team ရဲ့ သတင်းပြန်ကြားရေးတာဝန်ခံက ပြောပါတယ်။
YDF အနေနဲ့ ခါးချိုးသေနတ်တွေ၊ တလုံးထိုးသေနတ်တွေ၊ ၄၀ မမ သေနတ်နဲ့ ၄၀ မမ ဗုံးသီး (version3)၊ ၆၀ မမ မော်တာနဲ့ ၆၀ မမ ဗုံးသီး ၊ ၈၀ မမ မော်တာနဲ့ ၈၀ မမ ဗုံးသီး၊ Patriot ပခုံးထမ်းလောင်ချာ(1.5 Mile)၊ Patriot ပခုံးထမ်းလောင်ချာ(2.5Mile)၊ YDF –Bomber Drone ၂ ကီလိုအထိသယ်နိုင်တဲ့ ဗုံးကြဲဒရုန်းတွေ အောင်မြင်စွာ ထုတ်လုပ်နိုင်ခဲ့ပြီး ဖြစ်ပါတယ်။
လက်ရှိ စမ်းသပ်ထုတ်လုပ်နေတဲ့ လက်နက်တွေကတော့ Patriot –P1 ၅ မိုင်ကျော်သွားနိုင်တဲ့ တာဝေးပစ်ဒုံး၊ Patriot –P2 ၅ မိုင်ကျော် သွားနိုင်တဲ့ တာဝေးပစ်ဒုံး၊ တာဝေးပစ်ဒုံးမှာ အသုံးပြုနိုင်တဲ့ GPS Guided Module တွေဖြစ်ပါတယ်။
YDF အနေနဲ့ စစ်လက်နက်တွေ ထုတ်လုပ်ရာမှာ ရန်သူ့စစ်တပ်ကို မဟာဗျူဟာကျကျ တိုက်ခိုက်နိုင်မယ့် လက်နက်တွေ ထုတ်လုပ်နိုင်ရေး၊ YDF နဲ့ ထိစပ်ထားတဲ့ မဟာမိတ်တွေနဲ့ ခွဲဝေသုံးစွဲနိုင်ရေးကို ရည်မှန်းထုတ်လုပ်တယ်လို့ သိရပါတယ်။
ယောဒေသကာကွယ်ရေးတပ်ဟာ ယောဒေသရှိ မြို့နယ် ၅ ခုရဲ့ အခြေပြုလှုပ်ရှားနေတဲ့ ဒေသခံကာကွယ်ရေးတပ်တခု ဖြစ်ပြီး အမျိုးသားညီညွတ်ရေးအစိုးရရဲ့ ကာကွယ်ရေး ဝန်ကြီးဌာနမှ အသိအမှတ်ပြုထားတဲ့ ဒေသခံတပ်တခု ဖြစ်ပါတယ်။
ယောကာကွယ်ရေးတပ်-YDF ဟာ စစ်အာဏာသိမ်းတာကို လက်နက်ကိုင်တော်လှန်တဲ့ အဖွဲ့ထဲမှာ အစောဆုံးအဖွဲ့တဖွဲ့ဖြစ်ပြီး သက်တမ်းတနှစ်ကျော်အတွင်းမှာ ပြည်သူတွေရဲ့ ထောက်ပို့မှုနဲ့ စစ်ကောင်စီ အာဏာရှင် လက်ကိုင်တုတ် အမြောက်အမြားကို သုတ်သင်ထားနိုင်ခဲ့တယ်လို့ YDF ကနေ သိရပါတယ်။
