အာဆင်နယ်အသင်းအနေနဲ့ ပရီးမီးယားလိဂ်ချန်ပီယံဆုအတွက် လက်လျှော့ အရှုံးပေးမှာမဟုတ် ကြောင်း ဂိုးသမား အာရွန်ရမ်စ်ဒေးက ပြောပါတယ်။
အမှတ်ပေးဇယားထိပ်မှာ ဆက်လက်ရပ်တည်နေတဲ့ အာဆင်နယ်ဟာ မနေ့တုန်းက ပွဲစဉ်မှာ မန်စီးတီးကို ၄ ဂိုး ၁ဂိုးနဲ့ရှုံးနိမ့်ခဲ့ပြီး နှစ်ပွဲပိုကစားထားပေမဲ့ ၂ မှတ်သာကွာဟတော့တာပါ။
ဂိုးသမား ရမ်စ်ဒေးကတော့ ရှုံးပွဲအတွက်စိတ်ပျက်ခဲ့ရပေမဲ့ ပရီးမီးယားလိဂ်မှာ ဘာမဆိုဖြစ်နိုင်တဲ့အတွက် ချန်ပီယံဆုအတွက် လက်လျှော့အရှုံးပေးလိုက်မှာ မဟုတ်ကြောင်းပြောခဲ့တာပါ။
အာဆင်နယ် အသင်းအနေနဲ့ လက်ကျန် ၅ ပွဲစလုံးကို အနိုင်ရရှိအောင်ကြိုးပမ်းသွားရမှာဖြစ်ပြီး ရာသီကုန်ဆုံးချိန်ရောက်မှ ဘယ်လိုအဆုံးသတ်မလဲဆိုတာ သိရမှာဖြစ်ကြောင်း ရမ်စ်ဒေးကပြောပါတယ်။
အာဆင်နယ်အနေနဲ့ မန်စီးတီးကပွဲထက်ပိုကောင်းအောင် ကစားနိုင်တယ်ဆိုတာ သေချာပြီး လက်ကျန်ငါးပွဲကို အနိုင်ရဖို့ အရာအားလုံးလုပ်ဆောင်သွားမယ်လို့ ရမ်စ်ဒေးက ပြောသွားပါတယ်။
ကစားသမားသစ် ထရော့ဆတ်ဟာ အာဆင်နယ်တိုက်စစ်ကစားသမားတွေရဲ့ နေရာတခုကို လုယူနိုင်မယ့်သူ ဖြစ်တယ်လို့ ဂိုးသမား အာရွန်ရမ်စ်ဒေးက ပြောပါတယ်။
ဘယ်လ်ဂျီယံကွင်းလယ်လူ ထရော့ဆတ်ဟာ ဘရိုက်တန်ကနေ ပေါင် ၂၇ သန်းနဲ့ ပြောင်းရွှေ့လာခဲ့ပြီး ပွဲဦးထွက်ပွဲစဉ်ဖြစ်တဲ့ မန်ယူအသင်းနဲ့ပွဲစဉ်မှာ အနိုင်ဂိုးအတွက် ပါဝင်ပတ်သက်ခဲ့တာ ဖြစ်ပါတယ်။
မိနစ်အနည်းငယ်သာ ကစားခဲ့ရပေမဲ့ စွမ်းဆောင်ရည်ကောင်း ပြသနိုင်ခဲ့တဲ့ ထရော့ဆတ်ဟာ အာဆင်နယ် တိုက်စစ်ကစားသမားတဦးရဲ့နေရာကို အစားဝင်နိုင်သူဖြစ်ကြောင်း၊ တချိန်တုန်းက ဂိုးသမားလေနိုရဲ့ နေရာကို ရယူနိုင်ခဲ့တဲ့ သူ့ရဲ့ပုံစံအတိုင်း ထရော့ဆတ်ကလည်း ပုံမှန်ပွဲထွက်ခွင့်တနေရာကို လုယူနိုင်မှာဖြစ်ကြောင်း ရမ်စ်ဒေးက ပြောခဲ့တာပါ။
ထရော့ဆတ်ဟာ ပွဲဦးထွက်ပွဲစဉ်မှာ မာတင်နယ်လီရဲ့ ဘယ်တောင်ပံတိုက်စစ်နေရာမှာ ကစားခဲ့ပေမဲ့ သူကစားချင်တဲ့နေရာ ပြောဖူးတာက အိုဒီဂတ်ကစားနေတဲ့ ကွင်းလယ်တိုက်စစ်နေရာ ဖြစ်ပါတယ်။
