ရခိုင်ပြည်နယ်၊ ရသေ့တောင်မြို့နယ်၊ မညင်းတောင်ကျေးရွာကို စက်တင်ဘာ ၂၆ ရက် မနက်က ဝင်ရောက်လာတဲ့ စစ်ကောင်စီတပ်က လက်နက်ကြီးနဲ့ အကြမ်းဖက်ပစ်ခတ်ခဲ့လို့ ရွာသူရွာသားတွေ အားလုံး ဘေးလွတ်ရာ ထွက်ပြေးခဲ့ကြရပါတယ်။

မညင်းတောင်ကျေးရွာဟာ အိမ်ခြေ ၇၀ လူဦးရေ ၄၀၀ ​ကျော် နေထိုင်နေကြတဲ့ ကျေးရွာတစ်ရွာဖြစ်ပြီး စစ်ကောင်စီတပ်တွေရဲ့ ဘေးရန်ကြောင့် ဘေးလွတ်ရာအနီးအနား​ ကျေးရွာတွေဆီ ထွက်ပြေးသွားခဲ့ကြတာပါ။

ဒေသခံရွာသားတဦးက “စစ်တပ်ဝင်လာတာနဲ့ ရွာအရှေ့ဘက်တောင်တန်းကို လက်နက်ကြီး လက်နက်ငယ်နဲ့ အဆက်မပြတ် ပစ်ဝင်လာကြတာ။ ရွာသူရွာသားတွေလည်း ကြောက်လို့ ထွက်ပြေးလာကြတယ်”လို့ ပြောပါတယ်။

တိုက်ပွဲဖြစ်တာမရှိဘဲ ကျေးရွာတွေကို အခုလို ပစ်ခတ်နေတာဟာ အေအေတပ်သားတွေ ရွာတွေမှာ ရှိနေတယ်ထင်ပြီး လုပ်ဆောင်နေကြတာဖြစ်တယ်လို့ ဒေသခံတွေက ပြောပါတယ်။

“သူတို့က တောတောင်ထဲမှာ အေအေတပ်သားတွေကို မရှာကြတော့ဘူး။ သွားရှာရင်လည်း သူတို့ပဲ သေကြတာဆိုတော့ အခုရွာတွေကို စစ်ကြောင်းထိုးပြီး လက်နက်ကြီး လက်နက်ငယ်တွေနဲ့ ဘေး ပတ်ဝန်းကျင်ကို ပစ်ခတ်ပြီး စီးနင်းလာနေတာ။ အေအေတပ်ဖွဲ့တွေရွာမှာ ရှိနေတယ်ထင်ပြီး အခုလို လုပ်ဆောင်နေကြတာ။ အမှန်တိုက်ပွဲဖြစ်ချင်ရင် တောထဲသွားကြပေါ့”လို့ ပြောပါတယ်။

ပြီးခဲ့တဲ့ စက်တင်ဘာ ၂၁ ရက်ကလည်း  ရသေ့တောင်မြို့နယ်မြောက်ပိုင်း၊ ကျောက်တန်းတိုက်နယ် အတွင်းရှိ မညင်းတောင်ကျေးရွာမှာ  ရက္ခိုင့်တပ်တော်နဲ့ စစ်ကောင်စီတပ်တို့ တိုက်ပွဲတွေ ပြင်းထန်စွာဖြစ်ပွားခဲ့ပါတယ်။

ရခိုင်ပြည်နယ်၊ ရသေ့တောင်မြို့နယ် မညင်းတောင်ကျေးရွာအနီးမှာ ရက္ခိုင့်တပ်တော် (အေအေ) နဲ့ စစ်ကောင်စီတပ်တို့ စက်တင်ဘာ ၂၁ ရက် မနက် ၉ နာရီကစပြီး တိုက်ပွဲအပြင်းအထန် ဖြစ်ပွားနေတယ်လို့ ဒေသခံတွေက ပြောပါတယ်။

မညင်းတောင်ဒေသခံတယောက်က “ဒီနေ့မနက် ၉ နာရီလောက်မှာ တကြိမ်ဖြစ်တယ်။ နေ့လယ် ၂ နာရီကျော်မှာလည်း တကြိမ်ဖြစ်တယ်။ ရစိုးချောင်း ဗျူဟာကုန်းက လက်နက်ကြီးက မနက်ကတည်းက အခုထိပစ်တုန်းပါ။ ရွာနားတွေမှာလည်း ကျတယ်။ ရွာသားတွေကတော့ စိုးရိမ်နေကြတယ်” လို့ ပြောပါတယ်။

ရသေ့တောင်မြို့နယ်မြောက်ပိုင်း၊ ကျောက်တန်းတိုက်နယ်အတွင်းရှိ မညင်းတောင်ကျေးရွာမှာ အေအေတပ်တွေနဲ့ မြန်မာစစ်ကောင်စီတပ်တို့အကြား ဒီကနေ့မနက်က တကြိမ်၊ နေ့လယ်ပိုင်းမှာ တကြိမ် တိုက်ပွဲတွေ အပြင်းအထန် ဖြစ်ပွားနေတာဖြစ်ပြီး နှစ်ဖက် ထိခိုက်ကျဆုံးတဲ့ အခြေအနေကိုတော့ မသိရသေးပါဘူး။

လက်ရှိ မညင်းတောင်ကျေးရွာအနီးကို စစ်ကြောင်းထိုးလာတဲ့ စစ်ကောင်စီတပ်စိတ်တခုကို အေအေက ဝိုင်းဝန်းပိတ်ဆို့ထားကြောင်း ဒေသခံ သတင်းရင်းမြစ်တခုက ပြောပါတယ်။

“ညတိုက်ပွဲတော့ ပြင်းထန်လာမယ်ဗျ။ စစ်ကြောင်းထိုးလာတဲ့ တပ်စိတ်တခုကို အေအေဘက်က ဝိုင်းပြီး ပိတ်ဆို့ထားတယ်။ လက်နက်ကြီးကတော့ မနားတမ်း ပစ်နေတာပါပဲ။”

သြဂုတ် ၃၁ ရက်ကလည်း ရေစိုးချောင်းဗျူဟာမှ ကုလားချောင်းကျေးရွာကို ရိက္ခာဆင်းယူလာတဲ့ စစ်ကြောင်းကို အေအေဘက်က အလိုက်အငိုက် တိုက်ခိုက်ခဲ့လို့ စစ်ကောင်စီတပ်ဘက်က ၄ ယောက် ကျဆုံးခဲ့ပါတယ်။