နေပြည်တော်သပိတ်တိုက်ပွဲတွေမှာ နေပြည်တော်ကျောင်းသားများ သမဂ္ဂစစ်ကြောင်းရဲ့ ဦးဆောင်သူ ကိုကျော်ဘိုဘိုခန့်ကို ဇူလိုင် ၂၇ ရက်နေ့ နေ့လယ်ပိုင်းမှာ စစ်ကောင်စီတပ်က ရိုက်နှက်ဖမ်းဆီးသွားတယ်လို့ သိရပါတယ်။

သူဟာ မိသားစုနဲ့ဝေးတဲ့ ပျဥ်းမနားက ဘုန်းကြီးကျောင်းမှာ တိမ်းရှောင်ခိုလှုံနေတာဖြစ်ပြီး နေမကောင်းဖြစ်နေတဲ့အချိန်မှာ စစ်ကောင်စီတပ်က အင်အားအလုံးအရင်းနဲ့ ရိုက်နှက်ဖမ်းဆီးသွားတာလို့ တက္ကသိုလ်ကျောင်းသားတစ်ဦးက ပြောပါတယ်။

"နာမည်နဲ့ လိပ်စာနဲ့ကို အတိအကျ လာဖမ်းတာ၊ ဒလန်ကောင်တွေရဲ့ လက်ချက်ကြောင့်ပဲ။ စစ်ကောင်စီကို တိုက်ထုတ်နေတဲ့ ကျောင်းသားတွေကို အခုလို ဦးတည်ပြီး ရက်ရက်စက်စက် ဖမ်းဆီးနေကြတယ်။ နေမကောင်းတာတောင် အလွန်အကျွံရိုက်ပြီး ဖမ်းတယ်။ တော်လှန်ရေးကာလဟာ ပြည်သူကို ပြည်သူချင်း ကာကွယ်ရမဲ့အချိန်ဖြစ်တယ်။” 

ဇူလိုင် ၂၇ ရက်နေ့ နေ့လယ် ၁ နာရီခွဲ သပိတ်စစ်ကြောင်းစဖို့ စီစဥ်ထားခဲ့ပေမယ့် ကိုကျော်ဘိုဘိုခန့် အခုလို အဖမ်းခံခဲ့ရတာကြောင့် သပိတ်စစ်ကြောင်းကို ရပ်နားလိုက်ရတယ်လို့ ဆိုပါတယ်။

လက်ရှိအချိန်အထိ ကိုကျော်ဘိုဘိုခန့်အား ဘယ်စခန်း၊ ဘယ်နေရာကို ဖမ်းဆီးခေါ်ဆောင်သွားတယ်ဆိုတာ မသိရသေးပါဘူး။

ကိုကျော်ဘိုဘိုခန့်ဟာ ရမည်းသင်းနည်းပညာတက္ကသိုလ် ဒုတိယနှစ်ကျောင်းသားတစ်ဦးဖြစ်ပြီး သူအပါအဝင် ဖမ်းဆီးခံရတဲ့ နေပြည်တော်တက္ကသိုလ်ကျောင်းသားများသမဂ္ဂက ကျောင်းသား ငါးယောက် ရှိပြီလို့ သိရပါတယ်။ 

နွေလှိုင်း(YU)

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်၊ သံဘိုကျေးရွာသား ၅ ဦးကို စစ်ကောင်စီတပ်ဖွဲ့တွေက မေလ ၂၅ ရက် နေ့လည်ပိုင်းက ရိုက်နှက်ဖမ်းဆီးခေါ်ဆောင်သွားတယ်လို့ ဒေသခံတွေဆီက သိရပါတယ်။

ဒေသခံရွာသားတစ်ဦးက “စစ်ကောင်စီတပ်ကရွာကို အလာဗျ ဘုန်းကြီးကျောင်းက ခိုင်းလိုက်တဲ့ ကလေးသုံးယောက်က ရွာကကားနဲ့အထွက်တွေ့ပြီး ဖမ်းသွားတယ်။ နောက်ထပ် ရွာထဲဆက်ဝင်လာပြီး ရွာသားနှစ်ယောက်နဲ့ ထိပ်တိုက်တွေ့တော့ ထပ်ဖမ်းသွားတယ်။ တချို့သူတွေကိုတော့ ရိုက်နှက်ဖမ်းသွားတယ်လို့တော့သိရတယ်ဗျ။ အားလုံး ၅ ယောက်ပေါ့။ သူတို့က စစ်ကားတွေအဝေးမှာရပ်ထားခဲ့ပြီး ရွာဘက်ကို ခြေလျင်လျှောက်လာကြတာ။ အရပ်ဝတ် လက်နက်ကိုင်တွေရော၊ ယူနီဖေါင်းတွေနဲ့ရော တော်တော်များတယ်။ နေ့လည် ၁ နာရီလောက်က ဝင်လာပြီး၊ ၂ နာရီလောက်ကြ ပြန်ထွက်သွားတယ်။ ရွာသူရွာသားအားလုံးနီးနီး ကတော့ ထွက်ပြေးကြရတာပေါ့” လို့ ပြောပါတယ်။

ပြီးခဲ့တဲ့ရက်တွေကလည်း စစ်ကောင်စီကခန့်ထားတဲ့ အုပ်ချုပ်ရေးမှူးက ဒီကျေးရွာရဲ့ လုံခြုံရေးအတွက် စစ်တပ်ဝင်မှာဖြစ်ပြီး  တားတာဆီးတာ လုံးဝမလုပ်ကြဖို့နဲ့ PSI စလောင်းတွေဖြုတ်ထားကြဖို့  မဖြုတ်ရင် ဒဏ်ငွေနဲ့ ထောင်ဒဏ်ချမှတ်မယ်လို့ အသံချဲ့စက်နဲ့ကြေညာခဲ့တယ်လို့  သိရပါတယ်။

သံဘိုကျေးရွာကို စစ်ကောင်စီတပ်တွေ ဝင်ရောက်တာ ၄ ကြိမ်အထိရှိခဲ့ပြီး၊ ပထမဆုံးအကြိမ်ဝင်စဉ်ကလည်း လူငယ်နှစ်ယောက်ကို ဖမ်းဆီး‌စစ်မေးပြီး ပြန်လွှတ်ပေးခဲ့ပါတယ် ။ အခု ဒုတိယအကြိမ်မှာတော့  ရွာသား ၅ ယောက် ဖမ်းဆီးခံခဲ့ရပါတယ်။။