အသံထက်မြန်တဲ့ ခရုဇ်ဒုံးကျည် မျိုးဆက်သစ်တွေ တပ်ဆင်ထားတဲ့ ရုရှားအလံတပ် စစ်သင်္ဘောဟာ တရုတ်ပါဝင်မယ့် စစ်ရေးလေ့ကျင့်မှုတွေ လုပ်ဆောင်ဖို့ တောင်အာဖရိကရဲ့ ရစ်ချတ်စ်ဘေးမြို့ ဆိပ်ကမ်းကို ရောက်ရှိလာကြောင်း ရုရှားကာကွယ်ရေးဝန်ကြီးဌာနက ဖေဖော်ဝါရီ ၂၂ ရက်မှာ သတင်းထုတ်ပြန်ပါတယ်။

တောင်အာဖရိကဟာ ပူးတွဲစစ်ရေးလေ့ကျင့်မှုကို သောကြာနေ့ စတင်မှာဖြစ်ပါတယ်။ ဒါဟာ ပုံမှန်စစ်ရေးလေ့ကျင့်မှုလို့ ခေါ်ဆိုပေမဲ့လည်း ပြည်တွင်းမှာ ဝေဖန်မှုတွေ တိုးလာပြီးတော့ အနောက်တိုင်း မိတ်ဘက်တွေနဲ့ ဆက်ဆံရေးတွေကို အန္တရာယ်ဖြစ်စေနိုင်မှာကိုလည်း စိုးရိမ်ကြပါတယ်။

စစ်ရေးလေ့ကျင့်မှုရဲ့အစဟာ ယူကရိန်းမှာ ရုရှားရဲ့ အထူးစစ်ဆင်ရေးလို့ နာမည်ခံထားတဲ့ ကျူးကျော်စစ် ပထမဆုံး နှစ်ပတ်လည်နေ့နဲ့ တိုက်ဆိုင်နေပြီး အမေရိကန်ပြည်ထောင်စုနဲ့ ရုရှားရဲ့ နောက်ဆုံး နျူးကလီးယားလက်နက်ထိန်းချုပ်ရေးစာချုပ်ကို ရပ်ဆိုင်းထားဖို့ ရုရှားသမ္မတ ဗလာဒီမာပူတင်ရဲ့ ဆုံးဖြတ်ချက်ကို ဖေဖော်ဝါရီ ၂၁ ရက်မှာ ကြေညာခဲ့အပြီး ပေါ်ပေါက်လာတာလည်း ဖြစ်ပါတယ်။

ဆိုဗီယက်သမ္မတနိုင်ငံ ရေတပ်ရဲ့ ရေတပ်ဗိုလ်ချုပ်ကြီး ဂေါ်ရှ်ကို့ဗ်လို့ နာမည်ပေးထားတဲ့ စစ်သင်္ဘောကြီးဟာ ခရီးရှည်ကြီး တာဝန်တွေကို ထမ်းဆောင်ဖို့ ရစ်ချတ်စ်ဘေးကို ရောက်ရှိလာပြီဖြစ်ကြောင်း ရုရှားမြောက်ပိုင်းရေတပ်ရဲ့ ထုတ်ပြန်ချက်ကို ကိုးကားပြီး RIA သတင်းဌာနက ထုတ်ပြန်ပါတယ်။

ဇန်နဝါရီ ၄ ရက်မှာ ရုရှားကနေ ရွက်လွှင့်လာတဲ့ ဂေါ်ရှ်ကို့ဗ် စစ်သင်္ဘောကြီးဟာ ဇာကန် ဒုံးကျည်တွေကို သယ်ဆောင်ခဲ့တာပါ။ အဲဒီဒုံးကျည်တွေဟာ အကွာအဝေး မိုင် ၅၆၀ အတွင်း ပစ်ခတ်နိုင်ပြီး အသံရဲ့အမြန်နှုန်းထက် အဆများစွာ သွားလာနိုင်တာကြောင့် သူတို့ကို ကာကွယ်နိုင်ဖို့ ခက်ခဲပါတယ်။

ဇန်နဝါရီလနှောင်းပိုင်းမှာ သင်္ဘောဟာ အတ္တလန္တိတ်သမုဒ္ဒရာ အနောက်ဘက်ခြမ်းမှာ သူ့ရဲ့တိုက်ခိုက်မှုစွမ်းရည်ကို စမ်းသပ်ခဲ့ပါတယ်။

အသံထက်မြန်တဲ့ ခရုဇ်ဒုံးကျည်လက်နက်တွေ တပ်ဆင်ထားတဲ့ ရုရှားစစ်သင်္ဘောတစင်း နော်ဝေ ပင်လယ်ထဲမှာ စစ်ရေးလေ့ကျင့်ခဲ့တယ်လို့ ရုရှားကာကွယ်ရေးဝန်ကြီးဌာနက ဇန်နဝါရီ ၁၀ ရက်မှာ ပြောပါတယ်။

“ဆိုဗီယက်ယူနီယံ ရေတပ်ဗိုလ်ချုပ် ဂတ်ရှ်ကို့ဗ် ဖရီးဂိတ်စစ်သင်္ဘောပေါ်က သင်္ဘောသားတွေဟာ နော်ဝေပင်လယ်ထဲမှာ လေကြောင်းရန်ကာကွယ်ရေး လေ့ကျင့်ခဲ့ပါတယ်”လို့ ဝန်ကြီးဌာနက ပြောပြီး စစ်ရေးလေ့ကျင့်မှုမှတ်တမ်းကိုလည်း ထုတ်ပြန်ခဲ့ပါတယ်။

ပြီးခဲ့တဲ့သီတင်းပတ်က ရုရှားသမ္မတ ဗလာဒီမာပူတင်ဟာ အတ္တလန္တိတ် သမုဒ္ဒရာဆီကို အသံထက်မြန်တဲ့ ခရုဇ်ဒုံးကျည်တွေ တပ်ဆင်ထားတဲ့ မျိုးဆက်သစ် ဖရီးဂိတ်စစ်သင်္ဘောတစီး စေလွှတ်ခဲ့ပြီး ယူကရိန်းမှာ သူ့ရဲ့ အထူးစစ်ဆင်ရေးကို ကျောခိုင်းမှာမဟုတ်ဘူးဆိုတာ အချက်ပြခဲ့ပါတယ်။

ဇာကွန်အမျိုးအစား အသံထက်မြန်တဲ့ ဒုံးကျည်တွေဟာ ရုရှားကို ပြင်ပခြိမ်းခြောက်မှုကနေ ကာကွယ်နိုင်မယ်လို့ ယုံကြည်ကြောင်း ပူတင်က ကာကွယ်ရေးဝန်ကြီးနဲ့ ရေယာဉ်မှူးတို့ တက်ရောက်တဲ့ ဗီဒီယိုကွန်ဖရင့်တခုမှာ ပြောခဲ့ပါတယ်။

အသံထက်မြန်တဲ့ လက်နက်တွေရဲ့ ပစ်မှတ်ဟာ သူတို့ရဲ့ ထိန်းကျောင်းနိုင်စွမ်းကြောင့် တိုက်ချင်းပစ် ပဲ့ထိန်းဒုံးကျည်တွေထက် တွက်ချက်ဖို့ ပိုခက်ခဲပါတယ်။

ရုရှား၊ အမေရိကန်နဲ့ တရုတ်နိုင်ငံတို့အပြင် သြစတြေးလျ၊ ပြင်သစ်၊ ဂျာမနီ၊ တောင်ကိုရီးယား၊ မြောက်ကိုရီးယားနဲ့ ဂျပန်နိုင်ငံတို့ အပါအဝင် တခြားနိုင်ငံအများအပြားဟာလည်း အသံထက်မြန်တဲ့ လက်နက်တွေကို တီထွင်ထုတ်လုပ်နေတယ်လို့ အမေရိကန် အောက်လွှတ်တော် သုတေသနဌာနက ဆိုထားပါတယ်။