ယူကရိန်းနဲ့ ရှုပ်ထွေးတဲ့ညှိနှိုင်းဆွေးနွေးမှု လုပ်ငန်းစဉ်ရလဒ်အဖြစ် ရုရှားစစ်သုံ့ပန်း ၆၃ ဦး ပြန်လည်လွတ်မြောက်လာခဲ့ပြီလို့ ရုရှားကာကွယ်ရေးဝန်ကြီးဌာနက ဖေဖော်ဝါရီ ၄ ရက်မှာ ပြောပါတယ်။ 

လွတ်မြောက်လာတဲ့ ရုရှားစစ်မှုထမ်းအုပ်စုထဲမှာ "သတိထားရမယ့် အမျိုးအစား" ထဲက လူပုဂ္ဂိုလ်တွေ ပါဝင်တယ်လို့ ဆိုပါတယ်။

အာရပ် စော်ဘွားများပြည်ထောင်စု ယူအေအီးနိုင်ငံရဲ့  ကြားဝင်ဆောင်ရွက်ပေးမှုကတဆင့် ဒီစစ်သုံ့ပန်း အပြန်အလှန်လဲလှယ်မှု အစီအစဉ်ကို ဆောင်ရွက်နိုင်ခဲ့တာလို့ ရုရှားကာကွယ်ရေး ဝန်ကြီးဌာနက ထုတ်ပြန်ပါတယ်။ 

ယူကရိန်းဘက်ကလည်း ဒီစစ်သုံ့ပန်းလဲလှယ်မှုကို အတည်ပြုပါတယ်။ 

ယူကရိန်းသမ္မတရုံး အကြီးအကဲ အန်ဒရီ ယာမက်ခ်က ပြန်လွတ်လာတဲ့ ယူကရိန်းစစ်သုံ့ပန်း ၁၁၆ ဦးထဲမှာ အရာရှိ ၂ ဦးပါပြီး ကျန်ရှိတဲ့ ၁၁၄ ဦးက တပ်ကြပ်ကြီးနဲ့ တပ်သားအဆင့်တွေဖြစ်တယ်လို့ အတည်ပြုပြောဆိုပါတယ်။ 

ယူကရိန်းကို ဒီလူတွေအားလုံး ပြန်ရောက်နေပြီလို့လည်း သိရပါတယ်။ 

ပြီးခဲ့တဲ့ဇန်နဝါရီလက ယူကရိန်းနိုင်ငံ အရှေ့ပိုင်းမှာ လူသား ချင်းစာနာထောက်ထားမှုဆိုင်ရာ ကယ်ဆယ်ရေးကြိုးပမ်းမှုတစ်ခုအတွင်း သတ်ဖြတ်ခံခဲ့ရတဲ့ ဗြိတိန်နိုင်ငံသား အကူအညီပေးရေေး စေတနာ့ဝန်ထမ်းတွေဖြစ်ကြတဲ့ အန်ဒရူးဘက်ဂ်ရှော နဲ့ ခရစ္စပယ်ရီ တို့ရဲ့ ရုပ်အလောင်းတွေကို ယူကရိန်းဆီ ပြန်ပို့ပေးပြီးပြီလို့လည်း ယာမက်ခ် ကပြောပါတယ်။

ယူကရိန်းစစ်တပ်က ဖမ်းဆီးမိထားတဲ့ ရုရှား စစ်သုံ့ပန်းတယောက်ကို စစ်ရာဇဝတ်မှုနဲ့ တရားစွဲထားတဲ့ အမှုကို ကီးယက်ဗ်မြို့၊ မြို့နယ်တရားရုံးတရုံးမှာ မေ ၁၈ ရက်က စစ်ဆေးပါတယ်။

ဒါဟာ ဖေဖော်ဝါရီ ၂၄ ရက်မှာ စတင်တဲ့ ရုရှားရဲ့ကျူးကျော်တဲ့ စစ်ပွဲကာလအတွင်း ပထမဆုံး စစ်ရာဇဝတ်မှု တရားခွင်ဖြစ်ပြီး အသက် ၂၁ နှစ်အရွယ် ရုရှားတင့်ကားတပ်က အရာရှိ ဗာဒင် ရှီရှီမာရင်းကို ရုံးထုတ်လာတာ တွေ့ရပါတယ်။

ယူကရိန်း အရှေ့မြောက် ကျေးရွာတရွာမှာ အသက် ၆၂ နှစ်အရွယ် ရွာသားတယောက်ကို သတ်ဖြတ်ခဲ့တဲ့အမှု ဖြစ်ပါတယ်။

ရုရှားတပ်တွေဟာ စစ်ပွဲအတွင်း အရပ်သားတွေအပေါ် ဥပဒေမဲ့၊ ရက်စက်တဲ့ ရာဇဝတ်မှုတွေ ကျူးလွန်ခဲ့တယ်လို့ ယူကရိန်းဘက်က စွပ်စွဲထားပါတယ်။ ဒါပေမဲ့ ရုရှားဘက်ကတော့ ဒီလို အရပ်သားတွေကို ပစ်မှတ်ထားတာ မရှိဘူးလို့ ငြင်းဆန်ထားပါတယ်။

အခု ရုံးတော်ကိုတင်ထားတဲ့ အမှုအသွားအလာအရ တင့်ကားတပ်က အရာရှိနဲ့ တခြား ရုရှားစစ်သား ၄ ယောက်ဟာ သူတို့ တင့်ကားတန်းကို ယူကရိန်းတပ်တွေက ပြန်ပြီး တိုက်ခိုက်တာကို ခံရပြီး ထွက်ပြေးတဲ့လမ်းမှာ အရပ်သားကားတစီးကို သေနတ်နဲ့ပစ်ပြီး အတင်းလုယူခဲ့ကြတယ်လို့ ဆိုပါတယ်။

အဲဒီနောက် ရွာတရွာကို ရောက်သွားတဲ့အချိန်မှာ ဆိုင်ကယ်စီးရင်း ဖုန်းပြောလာတဲ့ အမျိုးသားတယောက်ကို ဖမ်းပြီး သူတို့ ရုရှားစစ်သားတွေ ရွာထဲရောက်နေတာကို ဘယ်သူမှမသိအောင် ရိုင်ဖယ်သေနတ်နဲ့ အချက်ပေါင်းများစွာ မသေမချင်း ပစ်သတ်ခဲ့တယ်လို့ ဆိုပါတယ်။

အစိုးရရှေ့နေရဲ့ ဒီစွပ်စွဲချက်တွေနဲ့ ပတ်သက်လို့ ရုရှားစစ်သားက ဝန်ချတောင်းပန်ခဲ့ပေမဲ့ သူဟာ ဥပဒေအရ တသက်တကျွန်းပြစ်ဒဏ် ကျခံရဖွယ် ရှိပါတယ်။