ရုရှားနိုင်ငံတောင်ပိုင်းက နယ်စပ်ဖြတ်ကျော်ဒေသတခုမှာ ယူကရိန်း ကျောထောက်နောက်ခံ အမျိုးသားရေးဝါဒီတွေရဲ့ ပစ်ခတ်မှုကြောင့် လူနှစ်ဦး သေဆုံးခဲ့ရပြီး တရက်အကြာမှာပဲ နောက်ထပ် နယ်စပ်ကျူးကျော်မှုတွေကို တားဆီးမယ့်အစီအစဉ်တွေ လုပ်ဆောင်သွားမယ်လို့ မတ် ၃ ရက်မှာ ရုရှားဘက်က ပြောလာပါတယ်။ 

သမ္မတ ဗလာဒီမာပူတင်ကတော့ ယူကရိန်းနဲ့ နယ်နိမိတ်ချင်း ထိစပ်နေတဲ့ ရုရှားနိုင်ငံတောင်ပိုင်း ဘရိုင်ယန့်စ်ခ်ဒေသမှာ အကြမ်းဖက်တိုက်ခိုက်ခံခဲ့ရတယ်လို့ မတ် ၂ ရက်က ပြောပါတယ်။ 

ဒါဟာ ယူကရိန်းအကြမ်းဖက်အဖွဲ့တခုက အရပ်သားတွေကို ပစ်ခတ်ခဲ့တာဖြစ်ကြောင်း ပူတင်က မှတ်ချက်ပေးတဲ့အပြင် ဒီအဖွဲ့ကို ချေမှုန်းပစ်ဖို့ ကတိပြုတယ်လို့လည်း ဆိုပါတယ်။

ယူကရိန်းသမ္မတအကြံပေးတဦးကတော့ ဒီဖြစ်ရပ်ဟာ ရုရှားက မှားယွင်းတဲ့ရန်စမှုတခုအဖြစ်  ဇာတ်လမ်းဆင်ထားတာသာဖြစ်ပြီး ယူကရိန်းအပေါ် ကျူးကျော်မှုဟာ တရားမျှတကြောင်း ပြသလိုတာသာ ဖြစ်တယ်လို့ တုံ့ပြန်ပါတယ်။ 

ကရင်မလင်နန်းတော်ရဲ့ ပြောရေးဆိုခွင့်ရှိသူ ဒီမီထရီ ပက်စ်ကော့ဗ်ကတော့  နောင်အနာဂတ်မှာ အလားတူဖြစ်ရပ်တွေကို တားဆီးနိုင်ဖို့အတွက် နယ်စပ်ဒေသကာကွယ်ရေး ဆိုင်ရာ အစီအစဉ် တွေကို ဖြည့်စွက်လုပ်ဆောင်သွားမှာဖြစ်သလို ဒီအကြမ်းဖက်တိုက်ခိုက်မှုကိုလည်း စုံစမ်းစစ်ဆေးသွားမယ်လို့ ဆိုပါတယ်။ 

မတ် ၂ ရက် ဒီဖြစ်ရပ်အတွင်း ပစ်ခတ်ခံထားရတဲ့ ကားနှစ်စီးနဲ့ အတူ အထဲမှာ ယာဉ်မောင်းတွေ လဲကျသေဆုံးနေတဲ့ ဓာတ်ပုံ၊ ဗွီဒီယိုမှတ်တမ်းတွေကို ရုရှားဖက်ဒရယ် လုံခြုံရေးဌာန   (FSB) က ထုတ်ပြန်ခဲ့ပါတယ်။ 

ဒီဖြစ်ရပ်ကြောင့် ပူတင်က ရုရှားလုံခြုံရေးကောင်စီ ပုံမှန်အစည်းအဝေးတခုကို မတ် ၃ ရက် နှောင်းပိုင်းမှာ ကျင်းပဖို့ စီစဉ်ထားပါတယ်။

ရုရှား-ယူကရိန်း စစ်ရေးအခြေအနေတွေကြောင့် ရုရှားနိုင်ငံတောင်ပိုင်းက လေဆိပ်တွေ လုပ်ငန်းလည်ပတ်မှုတွေကို ကန့်သတ်ရပ်ဆိုင်းထားတယ်လို့ ရုရှားလေကြောင်း အာဏာပိုင်တွေက ပြောပါတယ်။

ရုရှားဖက်ဒရယ်လေကြောင်းပို့ဆောင်ရေးအေဂျင်စီ ရိုဆာဗီယက်ဆီရာရဲ့ ထုတ်ပြန်ချက်မှာတော့ “ယူကရိန်းနိုင်ငံတဝိုက် ခက်ခဲတဲ့အခြေအနေတွေကြောင့် ဖေဖော်ဝါရီ ၂၄ ရက် မနက် မော်စကို စံတော်ချိန် ၃ နာရီ ၄၅ မိနစ်က စတင်ပြီးတော့ ရုရှားနိုင်ငံတောင်ပိုင်းရှိ လေဆိပ်အများအပြားရှိ လေယာဉ်ခရီးစဉ်တွေကို ရပ်ဆိုင်းလိုက်တယ်”လို့ ဖော်ပြထားတာပါ။

အဆိုပါ ထုတ်ပြန်ချက်အရ ဒီကန့်သတ်ချက်ဟာ လာမယ့် မတ် ၂ ရက်အထိ အကျုံးဝင်မှာ ဖြစ်ပြီး အဆိုပါ လေဆိပ်တွေထဲမှာတော့ ရော့စ်တော့ဗ်၊ ကရာဆနိုဒါ၊ အန်နာပါ၊ ဂျယ်လန် ဇီ၊ အယ်လစ်စတာ၊ စတပ်ဗ်ရိုပို၊ ဘယ်လ်ဂိုရော့ဒ်၊ ခရိုင်းမီးယားစတဲ့ လေဆိပ်တွေအပါအ ဝင် လေဆိပ် ၁၂ ခု ပါဝင်နေတယ်လို့ ဆိုပါတယ်။

"လေဆိပ်နဲ့ လေကြောင်းလိုင်းတွေရဲ့ အချိန်ဇယားပြောင်းလဲမှုတွေ အားလုံးကိုတော့ အင် တာနက်လူမှုကွန်ရက်တွေအပါအဝင် လေဆိပ်တွေ၊ လေကြောင်းလိုင်းတွေရဲ့ တရားဝင် ဝဘ်ဆိုက်စာမျက်နှာတွေမှာ ဖော်ပြသွားမယ်လို့ ဆိုပါတယ်။

ကိုးကား-CNN