ရုရှားရေနံစျေးနှုန်းကို အနောက်နိုင်ငံတွေက ကန့်သတ် သတ်မှတ်ထားလို့ အိန္ဒိယဟာ သူ့ရဲ့စွမ်းအင် ဖူလုံရေးကို ဦးစားပေး လုပ်ဆောင်ရာမှာ ခိုင်မာနေဆဲဖြစ်လို့ ရုရှားကနေ ရေနံတင်သွင်းမှု တိုးလာ ဖွယ်ရှိတယ်လို့  ကျွမ်းကျင်သူတွေက ပြောပါတယ်။

ဥရောပသမဂ္ဂ( အီးယူ) အဖွဲ့ဝင်နိုင်ငံတွေက ပင်လယ်ရေကြောင်းလမ်းကနေ သယ်မယ့် ရုရှားရေနံစိမ်း ဈေးနှုန်းအတွက် ၁ စည်ကို အမေရိကန်ဒေါ်လာ ၆၀ နှုန်း သတ်မှတ်ဖို့ သဘောတူ ခဲ့ကြပါတယ်။

ရေနံ ၁ စည်ကို အမေရိကန်ဒေါ်လာ ၆၀ အထက်နဲ့ ရောင်းချရင် ရုရှားရေနံတင်ပို့မှုအတွက် အာမခံ၊ ဘဏ္ဍာရေးနဲ့ တခြားဝန်ဆောင်မှုတွေကို စျေးနှုန်းကန့်သတ်ချက်အောက်မှာ ပိတ်ပင်မှာ ဖြစ်ပါတယ်။ 

မကြာသေးမီလတွေအတွင်း ရုရှားကနေ သွင်းတဲ့ ရေနံတွေအတွက် အိန္ဒိယက ပေးဆောင်နေတဲ့ စျေးနဲ့ စျေးနှုန်း ကန့်သတ်ချက်တို့က သိပ်မကွာခြားလှပါဘူး။

ကာဇက်စတန် ဆိုင်ရာ အိန္ဒိယ သံအမတ်ဟောင်းနဲ့ လက်ရှိ အိန္ဒိယနိုင်ငံ ကမ္ဘာလုံးဆိုင်ရာ လေ့လာရေး တက္ကသိုလ် ဥက္ကဋ္ဌ အာရှုပ် ဆာဂျန်ဟာက "အိန္ဒိယ၊ တရုတ်၊ တခြား ထွန်းသစ်စစီးပွားရေးနိုင်ငံတွေလို ရုရှားရေနံကို ဆက်သွင်းနေတဲ့ နိုင်ငံတွေက စေ့စပ်ညှိနှိုင်းရေးဆိုင်ရာ သြဇာပိုပေးနိုင်တယ်လို့ ထင်ပါတယ်။ ရုရှားနိုင်ငံခြားရေး ဝန်ကြီး ဆာဂီလ် လာ့ရော့ဗ်ကလည်း ရုရှားနိုင်ငံအနေနဲ့ နှစ်နိုင်ငံ ဆက်ညှိနှိုင်း သွားမယ်လို့ ပြောထားတယ်”လို့ ပြောပါတယ်။

နိုဝင်ဘာလမှာ ရုရှားက ရေနံကို အိန္ဒိယက တင်သွင်းမှုဟာ စံချိန်သစ် တင်ခဲ့ပြီး တရက်ကို ရေနံစည်ပေါင်း သန်းချီခဲ့ပါတယ်။

လောလောဆယ် အိန္ဒိယကို ရောင်းတဲ့ ရေနံအတွက် သင်္ဘောတင်ခနဲ့ အာမခံကြေးတွေကို ရုရှားဘက်က ပေးဆောင်နေပါတယ်။

ရေရှည်မှာ ရုရှားရေနံစိမ်းတင်ပို့မှု လျော့ကျသွားရင် ကမ္ဘာ့ဈေးကွက်တွေမှာ ရေနံဈေးနှုန်းတွေ မြင့်တက်လာနိုင်တယ်လို့ ကျွမ်းကျင်သူတွေက ဆိုထားပါတယ်။

ဥရောပနိုင်ငံတွေထဲ ဂျာမဏီက ရုရှားရေနံ အများဆုံး ဝယ်ယူနေတဲ့ ဂျာမဏီနိုင်ငံဟာ  ဒီနှစ်ကုန်မှာ ရုရှားမှ ရေနံတင်သွင်းမှု ရပ်ပစ်မယ်လို့ ဝန်ကြီးချုပ် အိုလက်ဗ်ရှုဇ်က ပြောပါတယ်။

ရုရှားကို စီးပွားရေးပိတ်ဆို့မှု အနောက်နိုင်ငံတွေက လုပ်နေပေမဲ့ ဂျာမဏီက ရုရှားရေနံနဲ့ ဓာတ်ငွေ့ ဆက်လက် ဝယ်ယူနေမှုအပေါ် ယူကရိန်းသမ္မဇလန်းစကီးက မကြာခဏ ဝေဖန်နေတာပါ။

အိုလက်ဗ်ရှုဇ်က ရေနံနဲ့ ဓာတ်ငွေ့အတွက် ရုရှားကို ယူရိုငွေ ဘီလီယံအများအပြား ပေးနေရတာ ရှက်မိကြောင်း ဝန်ခံပါတယ်။ 

သူက “ကျနော်တို့ ရုရှားရေနံတင်ပို့မှုကို ဖြတ်ပစ်ဖို့ တက်တက်ကြွကြွ လုပ်နေပါတယ်၊ ဒီနှစ်ကုန်မှာ ဖြစ်လာပါလိမ့်မယ်” လို့ လန်ဒန်မှာ ဗြိတိန်ဝန်ကြီးချုပ်ဘောရစ်ဂျွန်ဆင်နဲ့ သတင်းစာရှင်းလင်းပွဲ အတူလုပ်စဉ် ပြောခဲ့တာပါ။

ဥရောပသမဂ္ဂက ဒီတပတ်ထဲမှာ ရုရှားကို စီးပွားရေး ထပ်တိုးပိတ်ဆို့မှုတွေ လုပ်ဖို့ရှိပါတယ်။ ရုရှားဆီက ကျောက်မီးသွေးဝယ်ယူမှုကို ဩဂုတ်လ ရပ်မှာဖြစ်ပါတယ်။