ရုရှားရေနံအပေါ် ဈေးနှုန်းကန့်သတ်ဖို့ G-7 ဘဏ္ဍာရေးဝန်ကြီးတွေဟာ စက်တင်ဘာ ၂ ရက်မှာ သဘောတူညီမှု ရရှိခဲ့တယ်လို့ G7 အဖွဲ့ ထုတ်ပြန်တဲ့ ပူးတွဲကြေညာချက်အရ သိရပါတယ်။
ရုရှားရေနံကုန်စည်တွေကို စျေးနှုန်းသတ်မှတ်မှုအတိုင်း ဒါမှမဟုတ် စျေးနှုန်းအောက် ရောက်မှသာ သယ်ယူပို့ဆောင်ခွင့်ပြုမှာဖြစ်ပါတယ်။
အီးယူရဲ့ ဆဋ္ဌမမြောက် ဒဏ်ခတ်အရေးယူမှု အစီအစဉ်ထဲမှာ ဆက်စပ်နေတဲ့ ဆောင်ရွက်မှုတွေ အတွက် အချိန်ဇယားနဲ့ စျေးနှုန်းကန့်သတ်မှုကို အကောင်အထည်ဖော်ဖို့ ရည်ရွယ်ကြောင်း ကြေညာချက်က ဆိုပါတယ်။
ဝန်ကြီးတွေဟာ စျေးနှုန်းသတ်မှတ်ချက် ဒီဇိုင်းကို တခါတည်း ထည့်သွင်းထားဖို့နဲ့ ဒီအရေးကြီးတဲ့ ဆောင်ရွက်ချက်ကို အကောင်အထည်ဖော်ဖို့ နိုင်ငံတိုင်းကိုလည်း ပန်ကြားထားပါတယ်။
ဥရောပသမဂ္ဂဟာ ရုရှားဓာတ်ငွေ့ပိုက်လိုင်းအတွက် စျေးနှုန်းသတ်မှတ်ဖို့ လိုအပ်ကြောင်း အီးယူကော်မရှင်အကြီးအကဲ အာဆူလာ ဖွှန်ဒယ်ရ်လေယန်က စက်တင်ဘာ ၂ ရက်အစောပိုင်းမှာ ပြောကြားခဲ့ပါတယ်။
ရုရှားသမ္မတ ဗလာဒီမာပူတင်ရဲ့ စွမ်းအင်ဈေးကွက်ကို ကြိုးကိုင်မယ့် ကြိုးပမ်းမှုတွေကို လျော့ပါး စေဖို့လို့လည်း သူက ဆိုပါတယ်။
လက်ရှိ G7 ဘဏ္ဍာရေးဥက္ကဋ္ဌ၊ ဂျာမန်ဘဏ္ဍာရေးဝန်ကြီး ခရစ္စစတီရန်လင်ဒါက ကမ္ဘာ့ရေနံ ဈေးကွက်အပေါ် စျေးနှုန်းသတ်မှတ်ချက် အစီအမံတွေရဲ့ အကျိုးသက်ရောက်မှုကို လျှော့ချနိုင်မယ်လို့ မျှော်လင့်ကြောင်း ပြောကြားခဲ့ပါတယ်။
ရုရှားကလည်း ရုရှားနိုင်ငံရဲ့စွမ်းအင်ရင်းမြစ်တွေအပေါ် စျေးနှုန်းစည်းကြပ်တဲ့ နိုင်ငံတွေဆီ ရေနံ ရောင်းချတာကို ရပ်ဆိုင်းမှာဖြစ်ပြီး ဒါဟာ ကမ္ဘာ့ရေနံဈေးကွက်ကို သိသိသာသာ မတည်မငြိမ် ဖြစ်စေမယ် လို့ ကရင်မလင်က ပြောပါတယ်။
ရုရှားရေနံကို အီးယူ ဥရောပသမဂ္ဂက တစိတ်တပိုင်းဒဏ်ခတ်ဖို့ သဘောတူခဲ့ပြီးတဲ့နောက် လောင်စာဆီစျေးဟာ တရိပ်ရိပ် ထိုးတက်နေပါတယ်။
အမေရိကန်နဲ့ ဥရောပတို့မှာ နွေရာသီ ကားမောင်းချိန်ကလည်း မကြာခင် အထွတ်အထိပ် ရောက်တော့မှာပါ။
ဘရန့်ရေနံစိမ်းက မေ ၃၁ ရက်မှာ ၁ ဒသမ ၉ ရာခိုင်နှုန်း စျေးတက်ခဲ့ပြီး ရေနံစိမ်းတစည်ကို အမေရိကန်ဒေါ်လာ ၁၂၃ ဒသမ ၉၈ ဒေါ်လာနဲ့ စျေးပိတ်ခဲ့ပါတယ်။
အမေရိကန်အနောက်ပိုင်းမှာ တက်ဆပ် အင်တာမီဒီယိတ် ရေနံစိမ်းကတော့ တစည်ကို အမေရိကန်ဒေါ်လာ ၁၁၉ ဒသမ ၃၄ ဒေါ်လာ ပေါက်စျေးရှိပြီး ၃ ဒသမ ၇ ရာခိုင်နှုန်း စျေးတက်ခဲ့ပါတယ်။ ဒါဟာ မေ ၉ ရက်နောက်ပိုင်း အမြင့်ဆုံးစျေးဖြစ်ပြီး ရေနံစျေးမြင့်တက်နေတာ ၆ လဆက်တိုက် ရှိနေပြီလို့ ရိုက်တာသတင်းဌာနက ဖော်ပြပါတယ်။
၂၀၂၂ နှစ်ကုန်ပိုင်းမှာ ရုရှားဆီက ရေနံတင်သွင်းမှု ၉၀ ရာခိုင်နှုန်းကို လျှော့ချမယ်လို့ ဥရောပသမဂ္ဂ ခေါင်းဆောင်တွေ သဘောတူထားပါတယ်။ ဒါဟာ လွန်ခဲ့တဲ့ ၃ လက ရုရှားက ယူကရိန်းကို ကျူးကျော်အပြီး အတင်းမာဆုံး ဒဏ်ခတ်မှုလည်း ဖြစ်ပါတယ်။
ထုတ်လုပ်မှုဘက်မှာတော့ ရေနံရောင်းချသူနိုင်ငံများအသင်း (အိုပက်) က တနေ့မှာ ရေနံစိမ်းစည်ပေါင်း ၄၃၂,၀၀၀ နှုန်းနဲ့ ဇူလိုင်လမှာ အထွက်နှုန်း နည်းနည်းမြှင့်တင်ဖို့ စီစဉ်ထားတယ်လို့ အိုပက် သတင်းရင်းမြစ်ခြောက်ခုက ပြောပါတယ်။ စျေးကျရေး အရှိန်မြှင့်ဖို့ အနောက်နိုင်ငံတွေရဲ့ တောင်းဆိုမှုတွေကိုတော့ အိုပက်က ငြင်းဆန်ထားပါတယ်။
