ရုရှားရေနံအပေါ် ဈေးနှုန်းကန့်သတ်ဖို့  G-7 ဘဏ္ဍာရေးဝန်ကြီးတွေဟာ စက်တင်ဘာ ၂ ရက်မှာ သဘောတူညီမှု ရရှိခဲ့တယ်လို့ G7 အဖွဲ့ ထုတ်ပြန်တဲ့ ပူးတွဲကြေညာချက်အရ သိရပါတယ်။ 

ရုရှားရေနံကုန်စည်တွေကို စျေးနှုန်းသတ်မှတ်မှုအတိုင်း ဒါမှမဟုတ် စျေးနှုန်းအောက် ရောက်မှသာ သယ်ယူပို့ဆောင်ခွင့်ပြုမှာဖြစ်ပါတယ်။ 

အီးယူရဲ့ ဆဋ္ဌမမြောက် ဒဏ်ခတ်အရေးယူမှု အစီအစဉ်ထဲမှာ ဆက်စပ်နေတဲ့ ဆောင်ရွက်မှုတွေ အတွက် အချိန်ဇယားနဲ့ စျေးနှုန်းကန့်သတ်မှုကို အကောင်အထည်ဖော်ဖို့ ရည်ရွယ်ကြောင်း ကြေညာချက်က ဆိုပါတယ်။ 

ဝန်ကြီးတွေဟာ စျေးနှုန်းသတ်မှတ်ချက် ဒီဇိုင်းကို တခါတည်း ထည့်သွင်းထားဖို့နဲ့ ဒီအရေးကြီးတဲ့ ဆောင်ရွက်ချက်ကို အကောင်အထည်ဖော်ဖို့ နိုင်ငံတိုင်းကိုလည်း ပန်ကြားထားပါတယ်။ 

ဥရောပသမဂ္ဂဟာ ရုရှားဓာတ်ငွေ့ပိုက်လိုင်းအတွက် စျေးနှုန်းသတ်မှတ်ဖို့ လိုအပ်ကြောင်း အီးယူကော်မရှင်အကြီးအကဲ အာဆူလာ ဖွှန်ဒယ်ရ်လေယန်က စက်တင်ဘာ ၂ ရက်အစောပိုင်းမှာ ပြောကြားခဲ့ပါတယ်။ 

ရုရှားသမ္မတ ဗလာဒီမာပူတင်ရဲ့ စွမ်းအင်ဈေးကွက်ကို ကြိုးကိုင်မယ့် ကြိုးပမ်းမှုတွေကို လျော့ပါး စေဖို့လို့လည်း သူက ဆိုပါတယ်။ 

လက်ရှိ G7 ဘဏ္ဍာရေးဥက္ကဋ္ဌ၊ ဂျာမန်ဘဏ္ဍာရေးဝန်ကြီး ခရစ္စစတီရန်လင်ဒါက ကမ္ဘာ့ရေနံ ဈေးကွက်အပေါ် စျေးနှုန်းသတ်မှတ်ချက် အစီအမံတွေရဲ့ အကျိုးသက်ရောက်မှုကို လျှော့ချနိုင်မယ်လို့ မျှော်လင့်ကြောင်း ပြောကြားခဲ့ပါတယ်။ 

ရုရှားကလည်း ရုရှားနိုင်ငံရဲ့စွမ်းအင်ရင်းမြစ်တွေအပေါ် စျေးနှုန်းစည်းကြပ်တဲ့ နိုင်ငံတွေဆီ ရေနံ ရောင်းချတာကို ရပ်ဆိုင်းမှာဖြစ်ပြီး ဒါဟာ ကမ္ဘာ့ရေနံဈေးကွက်ကို သိသိသာသာ မတည်မငြိမ် ဖြစ်စေမယ် လို့ ကရင်မလင်က ပြောပါတယ်။