အခုနှစ်အတွင်း ဥရောပနိုင်ငံတွေကနေ  ရုရှားသူလျှိုလို့ သံသယရှိသူ အယောက် ၄၀၀ ကျော်ကို နှင်ထုတ်လိုက်ပါတယ်။

ဒါဟာ ဥရောပသမိုင်းမှာ ရာဇဝင်တွင်အောင် မော်စကိုကို ဆန့်ကျင်တဲ့ အထင်ရှားဆုံး ဗျူဟာမြောက် ထိုးနှက်ချက်ဖြစ်ပြီး ရုရှားသမ္မတ ဗလာဒီမာ ပူတင်လည်း အကြီးအကျယ် အံ့အားသင့်သွားလောက်တယ်လို့  ဗြိတိန် ပြည်တွင်းထောက်လှမ်းရေး အကြီးအကဲက နိုဝင်ဘာ ၁၆ ရက်မှာ ပြောပါတယ်။

လုံခြုံရေးဌာန (MI5) ညွှန်ကြားရေးမှူးချုပ် ကန် မက်ကောလ်လမ်က “ဒီနှစ်မှာ ဥရောပမှ ရုရှားအရာရှိ ၆၀၀ ကျော် အပါအဝင် ကမ္ဘာတဝန်းရှိ နိုင်ငံတွေကနေ နှင်ထုတ်ခံရသူ အများအပြားရှိပြီး အဲ့ဒီထဲက ၄၀၀ ကျော်က သူလျှိုတွေပါ” လို့ MI5 ရဲ့ လန်ဒန်ရုံးချုပ်မှာ ကျင်းပတဲ့ ဗြိတိန်အပေါ် ခြိမ်းခြောက်မှုဆိုင်ရာ နှစ်ပတ်လည်အစီရင်ခံစာမှာ မိန့်ခွန်း ပြောကြားထားပါတယ်။

“ဗြိတိန်မှာ သံတမန်အဖြစ် ရုရှားသူလျှို ၂၃ ဦးကို ဖယ်ရှားပြီးကတည်းက ရုရှားသံတမန်ဗီဇာ လျှောက်ထားမှု ၁၀၀ ကျော်ကို အမျိုးသားလုံခြုံရေးအရ ငြင်းဆိုထားပါတယ်။ ယူကေဟာ ရုရှား လျှို့ဝှက်လုပ်ဆောင်မှုတွေအတွက် အခက်ခဲဆုံး လည်ပတ်ရတဲ့ ပတ်ဝန်းကျင်ဖြစ်အောင် ပြင်းပြင်းထန်ထန် ဆက်လုပ်ဆောင်နေပါတယ်” လို့ သူက ပြောပါတယ်။

ကန် မက်ကောလ်လမ်က တရုတ်အာဏာပိုင်တွေဟာ အချိန်ကြာကြာ ရင်းနှီးထားပြီး တရုတ်ပြည်ရဲ့ လိုလားချက်အတွက် သဘောထားအမြင်တွေကို ခြယ်လှယ်ဖို့ အဆက်အသွယ်တွေ ပြုစုပျိုးထောင်လာတာကို တွေ့ရတယ်လို့ ပြောပါတယ်။

နိုင်ငံရေးအခင်းအကျင်းထဲက အထင်ကရ လွှတ်တော်အမတ်တွေသာမကဘဲ ထင်ရှားတဲ့ လွှတ်တော်အမတ်တွေကိုပါ ပူးပေါင်းရွေးချယ်ပြီး သြဇာလွှမ်းမိုးဖို့ ကြိုးပမ်းနေတာတွေလည်း တွေ့ရကြောင်းနဲ့ တရုတ်နိုင်ငံကနေ ရွှေ့ပြောင်းနေထိုင်လာကြသူတွေကိုလည်း စောင့်ကြည့်ပြီး နှောင့်ယှက်တဲ့ ပေကျင်းရဲ့ ကြိုးပမ်းမှုတွေအကြောင်းကို ထပ်ခါတလဲလဲ သတိပေး ပြောကြားခဲ့ပါတယ်။

ဒါ့အပြင် အီရန်ထောက်လှမ်းရေးတွေကလည်း တီဟီရန်ကနေ သူတို့ရန်သူလို့ သတ်မှတ်ထားတဲ့ ဗြိတိန်နိုင်ငံသားတွေ ဒါမှမဟုတ် ဗြိတိန်မှာ အခြေစိုက်တဲ့ လူပုဂ္ဂိုလ်တွေကို ပြန်ပေးဆွဲဖို့ သို့မဟုတ် သတ်ပစ်ဖို့ထိ ကြိုးပမ်းမှု ၁၀ ကြိမ်ထက်မနည်း ရှိခဲ့ကြောင်း မက် ကောလ်လမ်က သတင်းစာရှင်းလင်းပွဲမှာ ပြောကြားခဲ့ပါတယ်။

အီရန်မှာ လက်ရှိဆန္ဒပြမှုတွေက အာဏာရှင်အစိုးရရဲ့ အခြေခံပြဿနာတွေကို မေးမြန်းနေတာဖြစ်ပြီး ဒါဟာ လေးနက်တဲ့ အပြောင်းအလဲကို အချက်ပြနိုင်ပေမဲ့ လမ်းကြောင်းကတော့ မသေချာသေးပါဘူးလို့လည်း ပြောသွားပါတယ်။

ဂျာမန်ရဲတွေက မြို့တော်ဘာလင်ရှိ ဗြိတိန်သံရုံးမှာ အလုပ်လုပ်နေတဲ့ ဗြိတိန် အမျိုးသား တယောက်ကို ရုရှားအစိုးရအတွက် သူလျှိုထောက်ပေးမှု သံသယနဲ့ ဖမ်းဆီးလိုက်တယ်လို့  အစိုးရ ရှေ့နေတွေက သြဂုတ် ၁၁ ရက်မှာ ပြောပါတယ်။

ဒေးဗစ်အဲ့စ်လို့ ဖော်ပြထားတဲ့ ဗြိတိန်အမျိုးသားရဲ့ နေတဲ့နေရာနဲ့ အလုပ်လုပ်တဲ့ နေရာတွေကို ရှာဖွေခဲ့ပြီး သူ့ကို မနေ့ညနေက စုံစမ်းစစ်ဆေးမှု ဆိုင်ရာ တရားသူကြီးက စစ်မေးမြန်းတယ်လို့ ဂျာမန်အစိုးရ ရှေ့နေတွေက ပြောပါတယ်။

သူဟာ ငွေအတွက် ရုရှားထောက်လှမ်းရေးဌာနကို စာရွက်စာတမ်းတွေ ပေးခဲ့တဲ့ သံသယနဲ့ ဘာလင်မြို့တော် အပြင်ဘက်က ပို့စ်ဒန်မြို့မှာ အင်္ဂါနေ့က အဖမ်းခံခဲ့ရတာပါ။

သူ့အလုပ်ထဲက လှုပ်ရှားမှုတွေအတွင်း ရတဲ့ စာရွက်စာတမ်းတွေကို ရုရှား ထောက်လှမ်းရေးဌာန ကိုယ်စားလှယ်ဆီပေးခဲ့တယ် စွပ်စွဲခံရသူဟာ သူပေးတဲ့ သတင်း အချက်အလက်အတွက် ပမာဏ မသိရတဲ့ ငွေသားတွေကို လက်ခံရရှိခဲ့တယ်လို့ ပြည်ထောင်စု အစိုးရရှေ့နေချုပ်ရုံးက ကြေညာချက် ထုတ်ပြန်ခဲ့ပါတယ်။

သူဟာ အဖမ်းမခံရခင်ကအထိ သံရုံးမှာ ဒေသခံ ဝန်ထမ်းအဖြစ် အလုပ်လုပ်ခဲ့တာကြောင့် သူ့ကို ဂျာမနီနဲ့ဗြိတိန်အစိုးရ အာဏာပိုင်တွေက ပူးတွဲစစ်မေးမယ်လို့ အစိုးရ ရှေ့နေက ပြောပါတယ်။

နိုင်ငံခြားသံရုံးမှာ အလုပ်လုပ်တယ်ဆိုပေမယ့် ဒေသခံဝန်ထမ်းအဖြစ် လုပ်ကိုင်သူတွေဟာ သံတမန်ရေး ကင်းလွတ်ခွင့်ကို မခံစားရပါဘူး။