ဧရာဝတီတိုင်း၊ ရေကြည်မြို့နယ်မှာ ဇူလိုင် ၉ ရက်က မနက်က ရိုဟင်ဂျာ ၅၁ ယောက်ကို စစ်ကောင်စီက ဖမ်းဆီးခဲ့တယ်လို့ ဒေသခံတွေထံက သိရပါတယ်။
ရခိုင်ပြည်နယ်မြောက်ပိုင်းကနေ ကား နှစ်စီးနဲ့ လိုက်ပါလာတဲ့ ရိုဟင်ဂျာ ၅၁ ယောက်ဟာ ဂွမြို့နယ်က ဗေဒါစစ်ဆေး ရေးဂိတ်မှာ အစစ်ဆေးခံရချိန် ကားရပ်မပေးဘဲ ထွက်ပြေးတာကြောင့် ရေကြည်မြို့နယ် စာဥစမ်းကျေးရွာနားမှာ ဖမ်းဆီးခံခဲ့ရတာလို့ ရဲတပ်ဖွဲ့နဲ့နီးစပ်သူတွေထံက သိရပါတယ်။
“သူတို့က ရခိုင်ဘက်ကနေလာတာ ဂွမြို့နယ်ထဲက စစ်ဆေးရေးဂိတ်မှာ ရပ်မပေးတော့ ဒီဘက်ကို ဖမ်းဖို့ အကြောင်းကြားလို့တားဖမ်းတာ တစီးက ထွက်ပြေးတော့ နောက်ကလိုက်ဖမ်းရတယ် အားလုံးပေါင်း ၅၁ ဦး ဖမ်းမိတာ”လို့ ရဲတပ်ဖွဲ့ဝင်တဦးက ပြောပါတယ်။
ဖမ်းဆီးခံရတဲ့ ရိုဟင်ဂျာ ၅၁ ဦးကို လက်ရှိမှာ ရေကြည်မြို့နယ် ကုန်းပြင်နယ်မြေ ရဲစခန်းမှာ ဖမ်းဆီးထားပြီး တရားစွဲဖို့ စစ်ကောင်စီကို တင်ပြထားတယ်လို့ ရဲတပ်ဖွဲ့က သိရပါတယ်။
ဧရာဝတီတိုင်း၊ ရေကြည်မြို့နယ် ကုန်းပြင်ကျေးရွာမှာရှိတဲ့ နယ်မြေရဲစခန်း ဒီဇင်ဘာလ ၁၅ ရက်နေ့ ညပိုင်းမှာ မီးရှို့ခံခဲ့ရတယ်လို့ သိရပါတယ်။
ကုန်ပြင်နယ်မြေရဲစခန်းမှာ ည ၈ နာရီခွဲလောက်ကစတင်ကာ မီးတောက်တွေထွက်လာတွေ့ရပြီး မီးသတ်ကား ၄ စီးနဲ့ လာရောက် မီးငြှိမ်းခဲ့လို နာရီဝက်အကြာမှာ မီးငြိမ်းသွားတယ်လို့ ဒေသခံတွေက ပြောပါတယ်။
“မီးက ရှို့မီးဖြစ်ဖို့များတယ်၊ ၇၅ ရာနှုန်းလောက်သေချာပါတယ်၊ ခုတော့ မီးငြိမ်သွားပါပြီ” လို့ မီးငြိမ်းသတ်ရာမှာပါဝင်ခဲ့သူတဦးက ပြောပါတယ်။
မီးလောင်ကျွမ်းမှုနဲ့ပတ်သက်ပြီး ပျက်စီးဆုံးရှုံးမှုအခြေအနေတွေကိုတော့ အတိအကျသိရသေးဘဲ ဒီဗွီဘီက စုံစမ်းမေးမြန်းနေဆဲဖြစ်ပါတယ်။
မီးရှို့ခဲ့သူတွေကို ဖမ်းမမိတာကြောင့် အာဏာသိမ်းစစ်ကောင်စီ တပ်သားတွေနဲ့ ရဲတွေက ကျေးရွာအနီးတဝိုက် ပိတ်ဆို့ရှာဖွေဖို့ ပြင်ဆင်နေတယ်လို့ သိရပါတယ်။
