ရခိုင်ပြည်နယ်၊ ပုဏ္ဏားကျွန်းမြို့နယ်၊ ကန်ချောင်ကျေးရွာမှာ သောက်သုံးရေကန်တွေ ခန်းခြောက်သွားလို့ ရေရှားပါးမှုပြဿနာနဲ့ ရင်ဆိုင်ကြုံတွေ့နေရတယ်လို့ ဒေသခံတွေဆီကနေ သိရပါတယ်။

ပုဏ္ဏားကျွန်းမြို့နယ်၊ ကန်ချောင်းကျေးရွာမှာ ဖေဖော်ဝါရီလ တတိယပတ်လောက်ကစလို့ သောက်သုံးရေကန်တွေ ခန်းခြောက်သွားပြီး ရေရှားပါးမှုပြဿနာနဲ့ ရင်ဆိုင်ကြုံတွေ့နေကြရတယ်လို့ ကံချောင်းကျေးရွာ ဒေသခံ ကိုထွန်းထွန်းဦးက ဒီဗွီဘီကို ပြောပါတယ်။

“ရေကန်တွေ ခန်းခြောက်သွားတော့ လတ်တလောက် အခြေအနေမှာ တမိုင်၊ နှစ်မိုင်လောက် ကွာဝေးတဲ့ တောတောင်တွေထဲက စိမ့်စမ်းရေတွေကို သွားခပ်ပြီး သုံးစွဲနေကြရတယ်။ နောက်နှစ် နွေရာသီကာလမှာ သောက်သုံးရေရှားပါးမှု မဖြစ်အောင်တော့ အဲဒီရေကန်တွေကို ရွာသူရွာသားတွေ ဝိုင်းဝန်းတူးဖော်နေကြပေမဲ့ ဘက်ဟိုးနဲ့တူးတာမဟုတ်တော့ သိပ်အဆင်မပြေဘူးဗျ။ ဘက်ဟိုးနဲ့ တူးဖော်မယ်ဆိုရင်တော့ ငွေကျပ် သိန်း ၅၀ လောက် ကုန်ကျနိုင်တယ်။”

တချို့ကျေးရွာတွေမှာတော့ ဌာနဆိုင်ရာတွေက သောက်သုံးရေကန် ပြုပြင်မွမ်းမံစရိတ်တွေ ချပေးပေမဲ့ ကန်ချောင်းကျေးရွာကို မွမ်းမံစရိတ် ချမပေးတဲ့အတွက် သက်ဆိုင်ရာ အဖွဲ့အစည်းတွေနဲ့ ပြည်တွင်းပြည်ပမှာရှိတဲ့ အလှူရှင်တွေရဲ့ ကူညီထောက်ပံ့မှုတွေ လိုအပ်နေတယ်လို့ ကိုထွန်းထွန်းဦးက ဆိုပါတယ်။

“ရေကန်တူးဖော်ပြုပြင်တာတွေက မိုးရာသီမရောက်ခင် လုပ်ကြရမှာဗျ။ မိုးကျသွားရင် လုပ်လို့ အဆင်မပြေတော့ဘူး။ အဲဒီရေကန်တွေကို တူးဖော်မှသာ ၁၂ ရာသီလုံး ရေသိုလှောင်နိုင်မှာဖြစ်ပြီး သောက်သုံးရေရှားပါးတဲ့ အခက်အခဲကို ရင်ဆိုင်ဖြေရှင်းနိုင်မယ်။”

ကန်ချောင်းကျေးရွာမှာ အိမ်ခြေ ၂၂၀ ကျော်လောက်ရှိပြီး လူဦးရေ ၁,၀၀၀ ကျော်လောက် နေထိုင်ကြကာ အနီးပတ်ဝန်းကျင်က ကျောက်ခွဲပြင်၊ ကျောက်ပြင်ဆိပ် ကျေးရွာတွေမှာလည်း သောက်သုံးရေရှားပါးတဲ့ ပြဿနာတွေနဲ့ ရင်ဆိုင်ကြုံတွေ့နေရတယ်လို့ သိရပါတယ်။

ပုံမှန်အားဖြင့် ဩဂုတ်လမှာ ရေပြည့်လေ့ရှိတဲ့ တရုတ်နိုင်ငံရဲ့ ပိုယန်ရေကန်​ကြီးဟာ  အခုတော့ ရေခန်းခြောက်ပြီး ရေကန်ကြမ်းပြင်နေရာတချို့မှာ  ပက်ကြားအက်တွေကို  သြဂုတ် ၂၈ ရက်မှာ ရိုက်ကူးထားတဲ့ ဒရုန်းဗီဒီယိုမှာ မြင်တွေ့ရပါတယ်။   

အဲဒီ ဒရုန်းဗီဒီယိုဖိုင်ဟာ နိုင်ငံတွင်း ကာလရှည်ကြာ မိုးခေါင်မှုနဲ့ အပူလှိုင်းဒဏ်ကို သက်သေပြနေတာလည်းဖြစ်ပါတယ်။

တရုတ်နိုင်ငံရဲ့ အကြီးဆုံး ရေချိုအိုင် ပိုယန်ရေကန်ဟာ ကျန်းရှီးပြည်နယ်အလယ်ပိုင်း ယန်ဇီမြစ် စီးဆင်းမှုကို ထိန်းညှိရာမှာ အလွန်အရေးပါတာကြောင့် နိုင်ငံရဲ့ ကျောက်ကပ်အဖြစ် တင်စား ခေါ်ဝေါ်လေ့ ရှိပါတယ်။

ခုတော့ ဒီရေကန်ဟာ  ပုံမှန်စိုစွတ်တဲ့ နွေရာသီမှာ ရေလွှမ်းမိုးပြီးတဲ့နောက် ခြောက်သွေ့တဲ့ ဆောင်းဦးနဲ့ ဆောင်းရာသီမှာ ရေသိသိသာသာ လျော့နည်းသွားခဲ့ပါတယ်။

ခုနှစ်မှာ ယန်ဇီမြစ်ဝှမ်းတစ်လျှောက် စံချိန်တင် အပူလှိုင်းဟာ ရက်ပေါင်း ၇၀ ကျော်အထိ ပျံ့နှံ့လာလို့ ရေကန်အကျယ်က ပုံမှန်ထက်စောပြီး ကျုံ့သွားခဲ့တာပါ။  လွန်ခဲ့တဲ့လ နည်းငယ်မှာတော့ ရေကန်ဟာ မူလ အရွယ်အစားရဲ့ ငါးပုံတစ်ပုံသာ ကျန်ရှိပါတော့တယ်။ 

ရွာသားတွေနဲ့ ခရီးသွားတွေဟာ ဂုံးကောင်တွေနဲ့ ငါးတွေကြားက အက်ကွဲနေတဲ့ ရေကန်ရဲ့ ကြမ်းပြင်ပေါ်မှာ  နင်းရင်း သက်သောင့်သက်သာ သွားလာနိုင်ကြပါပြီ။

ရေမျက်နှာပြင် ကျုံ့သွားလို့ အနီးနားနေထိုင်သူတွေအတွက်   ပို့ဆောင်ရေးနဲ့ သောက်သုံးရေ ထောက်ပံ့ရေးကိုလည်း ထိခိုက်ခဲ့ပါတယ်။

အာဏာပိုင်တွေက မြစ်အောက်ပိုင်း ရေပြတ်လပ်မှုကို လျှော့ချဖို့ ဥမင်သုံးသွယ်ဆည်နဲ့ တန်းကျန်ခို့ ဆည်တွေက ရေတွေကို ထုတ်လွှတ်ထားပြီးပြီလို့ နိုင်ငံပိုင်ရုပ်သံ CCTV က ကြေညာခဲ့ပါတယ်။