ဆော်ဒီအာရေဗျနဲ့ ရေနံရောင်းချသူနိုင်ငံများအသင်း (အိုပက်) အဖွဲ့ဝင် တခြားနိုင်ငံတွေဟာ သူတို့ရဲ့ ရေနံထုတ်လုပ်မှုကို ကိုယ်တိုင်ရဲ့ သဘောဆန္ဒအရ လျှော့ချမယ်လို့ ကြေညာလိုက်ကြပါတယ်။
ဆော်ဒီအစိုးရကတော့ မေလကနေ ၂၀၂၃ နှစ်ကုန်ပိုင်းထိ နေ့စဉ် ရေနံစိမ်းစည် ငါးသိန်း ထုတ်လုပ်မှု လျှော့ချမယ်လို့ အစိုးရမီဒီယာက ထုတ်ပြန်ပါတယ်။
ရုရှားဒုဝန်ကြီးချုပ်ကလည်း ရုရှားအစိုးရဟာ ၂၀၂၃ နှစ်ကုန်ပိုင်းအထိ ရေနံစိမ်းစည် တရက် ငါးသိန်း ဆက်လက်လျှော့ချပြီး ထုတ်လုပ်သွားမယ်လို့ ပြောပါတယ်။
အာရပ်စော်ဘွားများပြည်ထောင်စု၊ ကူဝိတ်၊ အီရတ်၊ အိုမန်နဲ့ အယ်လ်ဂျီးရီးယားနိုင်ငံတွေကလည်း အလားတူ အချိန်အတွင်း ရေနံစိမ်းထုတ်လုပ်မှု လျှော့ချသွားမယ်လို့ ပြောပါတယ်။
အာရပ်စော်ဘွားများပြည်ထောင်စု (ယူအေအီး) က ရေနံစိမ်းစည် တရက်ကို ၁၄၄,၀၀၀၊ ကူဝိတ်က ၁၂၈,၀၀၀၊ အီရတ်က ၂၁၁,၀၀၀ ၊ အိုမန်က ၄၀,၀၀၀ နဲ့ အယ်လ်ဂျီးရီးယားက ၄၈,၀၀၀ စီ လျှော့ချထုတ်လုပ်မယ်လို့ အသီးသီး ကြေညာခဲ့ပါတယ်။
ဆော်ဒီ စွမ်းအင်ဝန်ကြီးဌာနကတော့ သူ့နိုင်ငံဟာ ရေနံစျေးကွက်တည်ငြိမ်ရေး ပံ့ပိုးဖို့ ရည်ရွယ်ချက်နဲ့ ကြိုတင်ကာကွယ်တဲ့အနေနဲ့ ကိုယ့်သဘောဆန္ဒနဲ့ကိုယ် လျှော့ချ ဖြတ်တောက်တာလို့ ကြေညာချက်ထုတ်ပြန် ပြောပါတယ်။
ရုရှားကနေ ဥရောပဆီ ရေနံစိမ်းတွေပို့တဲ့ ဒရူရှ်ဘာပိုက်လိုင်းမှာ ရေနံစိမ်းတွေ ယိုစိမ့်နေတာ တွေ့အပြီး ပိုလန်နိုင်ငံဟာ ရေနံနည်းနေပေမဲ့ အထောက်အပံ့ အလုံအလောက် ရနေသေးတယ်လို့ ဂျာမနီအစိုးရက အောက်တိုဘာ ၁၂ ရက်မှာ ပြောလိုက်ပါတယ်။
ရေနံယိုစိမ့်တာဟာ အဖျက်အမှောင့် လုပ်ရပ်ကြောင့်ထက်စာရင် မတော်တဆ ဖြစ်နိုင်တယ်လို့ ပိုလန်အစိုးရက ပြောပါတယ်။
ဂျာမနီနိုင်ငံဆီ ရေနံတင်ဆောင်တဲ့ အဓိကလမ်းကြောင်းမှာ ရေနံယိုစိမ့်နေတာကို အောက်တိုဘာ ၁၁ ရက် ညပိုင်းမှာ တွေ့ခဲ့တယ်လို့ လုပ်ငန်းလည်ပတ်သူ PERN က ပြောပါတယ်။
ရုရှားက ယူကရိန်းကို ကျူးကျော်အပြီး ဓာတ်ငွေ့တင်ပို့မှု ဖြတ်တောက်ပြီးချိန် ဥရောပမှာ စွမ်းအင်ဖူလုံရေးအတွက် မြင့်မြင့်မားမား တပ်လှန့်ထားရပါတယ်။
ရေနံယိုစိမ့်မှုဟာ မတော်တဆ ပျက်စီးတာလား၊ ဒါမှမဟုတ် ဖောက်ခွဲဖျက်ဆီးခံရတာလား ဆိုတာ ပြောဖို့ စောလွန်းနေသေးတယ်လို့ ပိုလန်ဝန်ကြီးချုပ် မာတဲယုစ် မော်ရာယတ်စ်ကီက ပိုလန်နိုင်ငံပိုင် ရေဒီယိုအသံလွှင့်ဌာန PR3 ကို ပြောပါတယ်။
ယိုစိမ့်မှုဖြစ်နိုင်တဲ့ အကြောင်းရင်းအားလုံးကို ထည့်သွင်းစဉ်းစားထားတယ်လို့ ပိုလန်လုံခြုံရေး ဌာနတွေရဲ့ ပြောရေးဆိုခွင့်ရှိသူ စတန်နစ္စလော ဇာ့ရင်က ရိုက်တာသတင်းဌာနကို ပြောပါတယ်။
