ရုရှားမှ ဥရောပသို့ပို့သည့် ရေနံပိုက်လိုင်း ယိုစိမ့်
ရုရှားကနေ ဥရောပဆီ ရေနံစိမ်းတွေပို့တဲ့ ဒရူရှ်ဘာပိုက်လိုင်းမှာ ရေနံစိမ်းတွေ ယိုစိမ့်နေတာ တွေ့အပြီး ပိုလန်နိုင်ငံဟာ ရေနံနည်းနေပေမဲ့ အထောက်အပံ့ အလုံအလောက် ရနေသေးတယ်လို့ ဂျာမနီအစိုးရက အောက်တိုဘာ ၁၂ ရက်မှာ ပြောလိုက်ပါတယ်။
ရေနံယိုစိမ့်တာဟာ အဖျက်အမှောင့် လုပ်ရပ်ကြောင့်ထက်စာရင် မတော်တဆ ဖြစ်နိုင်တယ်လို့ ပိုလန်အစိုးရက ပြောပါတယ်။
ဂျာမနီနိုင်ငံဆီ ရေနံတင်ဆောင်တဲ့ အဓိကလမ်းကြောင်းမှာ ရေနံယိုစိမ့်နေတာကို အောက်တိုဘာ ၁၁ ရက် ညပိုင်းမှာ တွေ့ခဲ့တယ်လို့ လုပ်ငန်းလည်ပတ်သူ PERN က ပြောပါတယ်။
ရုရှားက ယူကရိန်းကို ကျူးကျော်အပြီး ဓာတ်ငွေ့တင်ပို့မှု ဖြတ်တောက်ပြီးချိန် ဥရောပမှာ စွမ်းအင်ဖူလုံရေးအတွက် မြင့်မြင့်မားမား တပ်လှန့်ထားရပါတယ်။
ရေနံယိုစိမ့်မှုဟာ မတော်တဆ ပျက်စီးတာလား၊ ဒါမှမဟုတ် ဖောက်ခွဲဖျက်ဆီးခံရတာလား ဆိုတာ ပြောဖို့ စောလွန်းနေသေးတယ်လို့ ပိုလန်ဝန်ကြီးချုပ် မာတဲယုစ် မော်ရာယတ်စ်ကီက ပိုလန်နိုင်ငံပိုင် ရေဒီယိုအသံလွှင့်ဌာန PR3 ကို ပြောပါတယ်။
ယိုစိမ့်မှုဖြစ်နိုင်တဲ့ အကြောင်းရင်းအားလုံးကို ထည့်သွင်းစဉ်းစားထားတယ်လို့ ပိုလန်လုံခြုံရေး ဌာနတွေရဲ့ ပြောရေးဆိုခွင့်ရှိသူ စတန်နစ္စလော ဇာ့ရင်က ရိုက်တာသတင်းဌာနကို ပြောပါတယ်။
