တောင်အာဖရိကနိုင်ငံမှာ ဆက်လက်ဖြစ်ပွားနေတဲ့ လျှပ်စစ်ဓာတ်အားအကျပ်အတည်းက နိုင်ငံရဲ့ ရေသန့်စင်ရေးနဲ့ ရေပေးဝေရေးကွန်ရက်တွေမှာ သက်ရောက်ခဲ့တဲ့အတွက် ရေပြတ်လို့ ပြည်သူတွေက အမျက်ဒေါသ ထွက်နေကြပါတယ်။ 

နိုင်ငံပိုင်လျှပ်စစ်ဓာတ်အားဝန်ဆောင်မှုလုပ်ငန်း အက်စ်ကွန်မ်ဟာ ဒီနှစ်အစ ပိုင်းကတည်းက ဝန်လျှော့ချတဲ့ အလေ့အကျင့်ကို အရှိန်မြှင့်လုပ်ဆောင်ခဲ့ရသလို သုံးစွဲသူတွေဟာလည်း တစ်နေ့မှာ ၆ နာရီကြာ လျှပ်စစ်မီးပြတ်တောက်မှုနဲ့ ရင်ဆိုင်နေရတာပါ။ 

ရေဖြန့်ချိရေးစနစ်အပေါ်မှာ သက်ရောက်မှု ပိုဆိုးလာလို့ ဂျိုဟန်နက်စ်ဘက်ဂ်မြို့နဲ့ နယ်လ်ဆင်မန်ဒဲလားဘေးမြို့အပါအဝင် မြို့ကြီးတွေနဲ့ မြို့ငယ် အများအပြားမှာ ရေပြတ်တောက်မှု ပြဿနာတွေနဲ့ အပြင်းအထန် လုံးပန်းနေရတာပါ။ 

“အခုဆို ရေဆွဲချလို့ မရတာကြောင့် အိမ်သာတောင် သွားလို့မရဘူး၊ မချက်ပြုတ်နိုင်သလို ရေတောင်မချိုးနိုင်တဲ့ အနေအထားပါ၊ တက္ကစီကားထဲမှာဆိုရင် မင်းဘယ်လောက်အနံ့ ပြင်းနေမလဲဆိုတာ စဉ်းစားကြည့်ပါဦး” လို့ ဂျိုဟန်နက်စ်ဘတ်ဂ်မြို့ခံ တစ်ဦးက ပြောပါတယ်။

တချို့သော ကျွမ်းကျွင်သူတွေက လက်ရှိ ရေပိုင်းဆိုင်ရာ အကျပ်အတည်းတွေဟာ အဆိုးဆုံး အခြေအနေအထိ ရောက်ရှိလာနိုင်တယ်လို့ သတိပေးနေကြပြီး ဒါဟာ ရေနဲ့ပက်သက်တဲ့ အခြေခံ အဆောက်အအုံတွေ ကောင်းမွန်တဲ့အနေအထားမှာ ရှိမနေတဲ့အပေါ် ရည်ညွှန်းပြော ဆိုခဲ့ကြတာပါ။

တောင်အာဖရိကတက္ကသိုလ်က ရေသုတေသနကျွမ်းကျင်ပညာရှင် ပါမောက္ခ အန်ညာဒူပလိစစ် ကလည်း“ပထမဆုံးအချက်အနေနဲ့ ကျနော်တို့ရဲ့ အခြေခံအဆောက်အအုံတွေက ပျက်စီးယိုယွင်းနေပါပြီ၊ ဒါကို ပြုပြင်ထိန်းသိမ်းခြင်းမရှိတာကလည်း ဆယ်စုနှစ် ၂ခုကျော်လောက် ရှိနေပါပြီ၊ ဒါတွေဟာ သိသာထင်ရှားတဲ့ အချက်တွေပါပဲ”လို့  သူကမှတ်ချက်ပေးပါတယ်။ 

ဒါ့အပြင် လျော့နည်းလာတဲ့ မိုးရွာသွန်းမှုနဲ့ အပူလှိုင်း အခြေအနေတွေကြောင့်  ဂျိုဟန်နက်စ်ဘတ်ဂ်မြို့က ရေလှောင်တမံတွေဟာလည်း ခြောက်ခန်းသွားဖို့ ရှိနေပါတယ်။

မကြာခဏ ရေပြတ်လာတာနဲ့အမျှ ရေတိုင်ကီတွေကို မြို့တစ်လျှောက် နေရာချထားတာကိုလည်း တွေ့ရပါတယ်။ 

ဒါပေမဲ့ တချိန်တည်းမှာ ဒီရေတိုင်ကီတွေက လူရာပေါင်းများစွာကို ရေဝန်ဆောင်မှု ပေးနိုင်ပေမဲ့ ကျွမ်းကျင်သူတွေကတော့ အခုလို ကြောက်မက်ဖွယ်အခြေအနေအပေါ်မှာ ပိုအရေးတယူ လုပ်ဆောင်ကြဖို့ တောင်းဆိုနေကြပါတယ်။

ရန်ကုန်က မြို့နယ်တော်တော်များများ ရေပြတ်နေတာကြောင့် အခက်အခဲ ကြုံနေကြတယ်လို့ ဒေသခံတွေက ပြောပါတယ်။

ရေပေးဝေနေတဲ့ မြို့တော်စည်ပင်က ကြိုတင်အသိပေးတာမရှိဘဲ ရေပြတ်သွားတာကြောင့် စုဆောင်းသိုလှောင်တာ မလုပ်ခဲ့ရဘူးလို့ ရန်ကုန်မြို့နေတွေက ပြောပါတယ်။

“ဘာမှမသိလိုက်ရဘူး။ မနေ့ကတည်းက ရေမလာတာ။ ခုလည်း ဘယ်အချိန်အထိ ပြတ်မယ်ဆိုတာ မသိရသေးဘူး” လို့ မရမ်းကုန်းမြို့နယ်မှာ နေထိုင်သူတယောက်က ပြောပါတယ်။

လှော်ကားရေလှောင်ကန်ကနေ ရေသွယ်ယူလာတဲ့ ၆၆ လက်မ ရေပိုက် ပျက်စီးတာကြောင့် ပြင်ဆင်နေတာလို့ စုံစမ်းသိရပေမယ့် တာဝန်ရှိတဲ့ စည်ပင်သာယာ ဘက်ကတော့ ထုတ်ပြန်ထားတာ မတွေ့ရပါဘူး။

ရပ်ကွက်အုပ်ချုပ်ရေးပိုင်းနဲ့ နီးစပ်သူတယောက်က “၂ ရက်လောက်ကြာမယ်လို့တော့ သိရတယ်။ ၂၂ ရက်နေ့ ညနေ ဒါမှမဟုတ် ၂၃ ရက် မနက်မှာ ပြန်ရမယ်လို့ သိရတယ်။ အတိအကျတော့ ပြောလို့မရပါဘူး” လို့ ပြောပါတယ်။

ဇန်နဝါရီ ၂၁ ရက်မနက်ကစလို့ ရေပြတ်သွားတာဖြစ်ပြီး တချို့မြို့နယ်တွေက နေရာတချို့ကတော့ အခုအချိန်ထိရေရနေသေးတယ်လို့ ဆိုပါတယ်။ ဒါကလည်း ရေပေးဝေတဲ့ ပိုက်ရဲ့ အကျယ်နဲ့ ပိုက်ထဲမှာ ရေကျန်ရှိတဲ့ပမာဏ၊ မြေပြင်အနိမ့်အမြင့်ပေါ်မူတည်ပြီး ရတာဖြစ်မယ်လို့ ဒေသခံတချို့က ဆိုပါတယ်။

“အိမ်မှာရေပြတ်လို့ ခေါင်းလျှော်မယ်ဆိုပြီး ဆိုင်ကိုသွားတော့လည်း ဆိုင်မှာ လူတွေတန်းစီရတယ်။ ဆိုင်မှာလည်း ရေမရတော့ ခေါင်းလျှော်ရဖို့တောင် မသေချာဘူး” လို့ ရန်ကုန်မြို့နေသူတယောက်က ပြောပါတယ်။

စုံစမ်းသိရသလောက်တော့ ပန်းပဲတန်း၊ ဗိုလ်တထောင်၊ ကျောက်တံတား၊ မရမ်းကုန်း၊ ရန်ကင်း၊ ဗဟန်း၊ တာမွေ၊ ပုဇွန်တောင်နဲ့ မင်္ဂလာတောင်ညွန့်မြို့နယ်တို့မှာ ရေပြတ်နေတာပါ။

ဒါ့အပြင် မနေ့ညပိုင်းက ဘီလူးချောင်း ၂- တီကျစ်ဓာတ်အားလိုင်းက တိုင်တတိုင် လဲကျပျက်စီးသွားတာကြောင့် ရန်ကုန်တိုင်းက နေရာတချို့မှာ မီးပြတ်မယ်လို့ ရန်ကုန် လျှပ်စစ်ဓာတ်အားပေးရေး ကော်ပိုရေးရှင်းက ဒီနေ့ ထုတ်ပြန်ထားပါတယ်။