မကွေးတိုင်းဒေသကြီး ပေါက်မြို့နယ် ရေပြာရဲစခန်းကို ဖေဖော်ဝါရီ ၂၃ ရက်နေ့ ညနေပိုင်းမှာ ဒေသကာကွယ်ရေး ညီနောင်မဟာမိတ် PDF ၃ ဖွဲ့ က ဝင်ရောက်စီးနင်းတိုက်ခိုက်ခဲ့ရာ စခန်းမှူးအပါဝင် ၅ ယောက်သေဆုံးခဲ့တယ်လို မြိုင် PDF တပ်ဖွဲ့က ပြောပါတယ်။
ပေါက်မြို့နယ် ရေပြာရဲစခန်းကို ဖေဖော်ဝါရီ ၂၃ ရက် ညနေ ၄နာရီလောက်မှာ မြိုင်PDF၊ ပေါက်PDF နဲ့ ရေစကြို PDF တို့ပူးပေါင်းပြီး ဝင်ရောက်စီးနင်းတိုက်ခိုက်ရာ ၄၅ မိနစ်လောက် တိုက်ပွဲ ဖြစ်ပွားခဲ့တယ်လို့ မြိုင် PDF ရဲ့ ပြန်ကြားရေးတာဝန်ခံက ဒီဗွီဘီကို ပြောပါတယ်။
ဒေသကာကွယ်ရေးညီနောင်မဟာမိတ် ၃ ဖွဲ့ပေါင်းပြီး စခန်းသိမ်းဖို့ သွားတဲ့အချိန်မှာ ရေပြာရဲစခန်းမှူးက ကားနဲ့ထွက်လာလို့ စခန်းရှေ့တည့်တည့်မှာ ပစ်ခတ်တိုက်ခိုက်ရာ စခန်းမှူးနဲ့ရဲဘော်တစ်ယောက်ကားထဲမှာ သေဆုံးပြီး စခန်းအတွင်းထဲက ရဲ ၃ ယောက် စုစုပေါင်း ၅ ယောက်သေဆုံးခဲ့တယ်လို့ ဆိုပါတယ်။
“သူတို့ဘက်ကလည်း ပြန်လည်ပစ်ခတ်တာကြောင့် ရေစကြို PDF က ရဲဘော် ၂ ယောက်ဒဏ်ရာရရှိကာ ဒဏ်ရအခြေနေကတော့ မစိုးရိမ်ရဘူး။ သွားတုန်းကတော့ စခန်းသိမ်းဖို့သွားခဲ့တာ ကျနော်တို့ဘက်က ရဲဘော် ၂ ယောက်ထိခိုက်သွားတာရယ်၊ ပေါက်ကနေ စစ်ကူကားတစ်စီးထွက်လာတာရယ်ကြောင့် စခန်းကိုတော့ မရခဲ့ဘူး။ ဒါပေမယ့် စခန်းရှေ့နဲ့ စခန်းအုပ်နံရံခြံစည်းရိုးနားထိ ချဉ်းကပ်တိုက်ခိုက်ခဲ့ပြီး ပြန်လည်ဆုတ်ခွာခဲ့ကြတယ်။”
မကွေးတိုင်းအတွင်းမှာ ယခင်ကလည်း ရေစကြိုမြို့နယ် ပခန်းငယ်ရဲစခန်းနဲ့ မြိုင်မြို့နယ် လင်းကတောရဲစခန်းတွေကို ဒေသကာကွယ်ရေးညီနောင်မဟာမိတ်တွေ ပူးပေါင်းပြီး စခန်းသိမ်းတိုက်ပွဲ ပြုလုပ်နိုင်ခဲ့တယ်လို့ သိရပါတယ်။
ရေပြာရဲစခန်းမှူးအပါအဝင် ၅ ယောက် သေဆုံးခဲ့တယ်ဆိုတာနဲ့ပတ်သက်ပြီး ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

ပဲခူးတိုင်းအနောက်ခြမ်း၊ မင်းလှမြို့နယ်အတွင်းက အုန်းနှဲချောင်းကျေးရွာမှာ အကြမ်းဖက်စစ်တပ်နဲ့ စီးပွားရေးဖက်စပ်လုပ်ကိုင်တဲ့ Mytel တာဝါတိုင် အောက်တိုဘာ ၁၅ ရက်နေ့ည ၈ နာရီခွဲဝန်းကျင်က ဗုံးခွဲဖျက်ဆီးခံလိုက်ရတယ်လို့ ဒေသခံတွေဆီက သိရပါတယ်။

ကျေးရွာဒေသခံတဦးက “ပေါက်ကွဲသံကြီးကြားရပြီး မီးလောင်နေတာ မြင်ရတာပဲ။ Mytel ဖုန်းလိုင်းတွေလည်းပြတ်သွားတယ်။ ရွာကလူတွေလည်း သွားမကြည့်ရဲကြဘူးလေ” လို့ ဒေသခံတဦးက အတည်ပြုပြောပါတယ်။

ဗုံးပေါက်ကွဲပြီး မိနစ်ပိုင်းအကြာမှာ စစ်ကောင်စီတပ်သားတွေ ကားနဲ့ရောက်လာပြီး သေနတ်တွေပစ်ဖောက်ကာ အော်ဟစ်ဆဲဆိုနေကြတယ်လို့ ဆိုပါတယ်။

မင်းလှမြို့နယ်မှာ အခုဖျက်ဆီးခံရတဲ့ Mytel တာဝါတိုင်ဟာ ပထမဦးဆုံးဖြစ်ပြီး ဘယ်အဖွဲ့က ပြုလုပ်တယ်ဆိုတာတော့ သတင်းထုတ်ပြန်တာ မရှိသေးပါဘူး။ 

နိုင်ငံတဝန်း အကြမ်းဖက်စစ်တပ်နဲ့ စီးပွားရေးဖက်စပ်လုပ်ကိုင်ထားတဲ့ Mytel တာဝါတိုင်ပေါင်း ၁၅၀ ကျော်ဖျက်ဆီးခံထားရတယ်လို့ မှတ်တမ်းပြုလုပ်ထားသူတွေဆီက သိရပါတယ်။

မကွေးတိုင်း၊ ပေါက်မြို့နယ်၊ ရေပြာရဲစခန်းနဲ့ မြင်းခြံကုန်းကျေးရွာက စစ်ကောင်စီသတင်းပေးလို့ နာမည်ကြီးနေတဦးရဲ့ ကုန်စုံဆိုင်တို့ အောက်တိုဘာ ၁၅ ရက် မွန်းလွဲ ၂ နာရီဝန်းကျင်က လက်ပစ်ဗုံးနဲ့ တိုက်ခိုက်ခံရတယ်လို့ ဒေသခံတွေဆီက သိရပါတယ်။

ဒေသခံတဦးက "ရေပြာရဲစခန်းနဲ့ ပေါက်မြို့နယ်ထဲက မြင်းခြံကုန်းရွာက ဒလန်စိုးသန်းရဲ့ ကုန်စုံဆိုင်ကို လက်ပစ်ဗုံးနဲ့ တိုက်ခိုက်ခံရတာပါ။ သေဆုံးမှုရှိ၊ မရှိတော့မသိရသေးပါဘူး။ စစ်သားနဲ့ရဲတွေ အများကြီးဘဲ။ မသွားရဲကြသေးဘူး” လို့ ပြောပါတယ်။

အဆိုပါတိုက်ခိုက်မှုတွေကို မကွေးမြို့နယ် ပြည်သူ့ကာကွယ်ရေးတပ်မတော်တပ်ရင်း (၂)၊ CAF-MGPDF နဲ့ PPDF-Kingfighter တို့ ၃ ဖွဲ့ပူးပေါင်း တိုက်ခိုက်ခဲ့တာဖြစ်ပြီး တပ်ပေါင်းစုတွေဘက်က အထိအခိုက်မရှိဘဲ ပြန်ဆုတ်ခွာလာနိုင်ခဲ့တယ်လို့ တပ်ပေါင်းစုရဲ့ တာဝန်ရှိသူတဦးက အတည်ပြုပြောပါတယ်။

ရေပြာရဲစခန်းတိုက်ခိုက်ခံရမှုနဲ့ စစ်ကောင်စီသတင်းပေး ကိုစိုးသန်း ရဲ့ ကုန်စုံဆိုင်တို့ ဗုံးပစ်ခံရမှုနဲ့သတ်သက်ပြီး သီးခြားအတည်ပြုနိုင်ဖို့ ဒီဗွီဘီက ဆက်လက်စုံစမ်းနေပါတယ်။

ပြီးခဲ့တဲ့ အောက်တိုဘာလ ၁၂ ရက်နေ့ကလည်း မြိုင်မြို့နယ်နဲ့ ပေါက်မြို့နယ်ကြားက ဇီးပြားရဲကင်းစခန်းကို ပြည်သူ့ကာကွယ်ရေးတပ်ဖွဲ့တွေ သွားရောက်တိုက်ခိုက်လို့ ရဲတပ်ဖွဲ့ဝင် ၂ ဦးထက်မနည်းသေဆုံးပြီး အများအပြား ဒဏ်ရာရရှိခဲ့ကြတယ်လို့ မှတ်တမ်းတွေအရ သိရပါတယ်။