ထိုင်းနိုင်ငံမှာ ၁၀ ရက်အတွင်း မိုးဆက်တိုက်ရွာတာ၊ ဆည်ရေဖောက်ထုတ်တာတွေကြောင့် ခရိုင် ၃၂ ခုမှာ ရေကြီးရေလျှံပြီး  ရေဘေးသင့်ပြည်သူ ၁ သိန်းကျော်အထိရှိလာပါတယ်။ 

ထိုင်းပြည်ထဲရေးဝန်ကြီးဌာန သဘာဝဘေးအန္တရာယ်တားဆီးကာကွယ်ရေးနဲ့ကယ်ဆယ်ရေးဌာနရဲ့ ဒီမနက် ၁၁ နာရီထုတ်ပြန်ချက်အရ   စက်တင်ဘာ ၄ ရက်ကနေ ဒီနေ့ စက်တင်ဘာ ၁၄ ရက်အထိ ၁၀ ရက်အတွင်း ခရိုင်ပေါင်း ၃၂ ခုထဲမှာ မိုးသည်းထန်စွာရွာသွန်းခဲ့တာပါ။

မိုးရွာသွန်းမှုကြောင့် မြို့နယ်ပေါင်း ၈၇ မြို့နယ် ၊ အုပ်စု/နယ်မြေ ၁၈၆ ခု ၊ ရပ်ကွက်/ကျေးရွာပေါင်း ၇၄၁ ခုထဲမှာ  ရေကြီးတာ၊ တောင်ကျချောင်းရေလျှံတာ၊ ဆည်ရေလျှံတာတွေ ဖြစ်ပွါးပြီး လူပေါင်း ၁၁၆၈၃၃ ဦး ရေဘေးသင့်ခဲ့တယ်လို့ ဆိုပါတယ်။ 

ဒီကနေ့မှာ ခရိုင်အချို့ရေပြန်ကျသွားပေမဲ့  လမ်းပွန်း ၊ လမ်းပန်း ၊ ဖယောဝ်း၊ တာ့ခ် ၊ နောင်ဘိုလမ်းဖူး ၊ ခွန်ကဲန် ၊ လွေး ၊ ကားလားဆင် ၊ ပထုန်ဌာနီ၊ စမွတ်ပရကန်၊ ဆရကျောက် ၊ လယောင်း၊ ချွန်းပူးရီး နဲ့ ကျန်ထပူရီ ခရိုင်တွေမှာ ရေတွေဝပ်နေသေးတယ်လို့ ဆိုပါတယ်။ 

စက်တင်ဘာ ၁၄ ရက် ဒီကနေ့မှာ ဥဘွန်းရာ့ချ်ဌာနီ၊ အယုဒ္ဓယ၊ အန်ထောင်း ၊ ပထုန်ဌာနီစတဲ့ ခရိုင် ၄ ခုရှိ မြို့နယ်ပေါင်း ၁၂ မြို့နယ်၊ အုပ်စု/နယ်မြေ ၁၁၂ ခု ၊ ရပ်ကွက်/ကျေးရွာ ၆၀၆ ခုမှာတော့ ရေကြီးနေဆဲလို့ ဆိုပါတယ်။

ရေဘေးသင့်ပြည်သူတွေကို သက်ဆိုင်ရာ ကယ်ဆယ်ရေးအဖွဲ့တွေက အချိန်နဲ့တပြေးညီ ကူညီ ကယ်ဆယ်ရေးတွေ ဆောင်ရွက်နေပြီး ရေဘေးကြုံလို့ အခက်အခဲဖြစ်နေတယ်ဆိုရင် အရေးပေါ် ဖုံးနံပါတ် ၁၇၈၄ ကို ၂၄ နာရီ အကြောင်းကြားနိုင်တယ်လို့ ဆိုပါတယ်။ 

ထိုင်းနိုင်ငံမိုးလေဝသဌာနရဲ့ ဒီကနေ့မနက် ၆ နာရီထုတ်ပြန်ချက်အရ လာမယ့် ၂၄ နာရီအတွင်း ဘန်ကောက်နဲ့ အနီးတဝိုက်ဒေသ ၇၀ ရာခိုင်နှုန်းမှာလည်းကောင်း၊ ထိုင်းမြောက်ပိုင်း၊ အရှေ့ မြောက်ပိုင်း၊ အလယ်ပိုင်း၊ အရှေ့ပိုင်းနဲ့ တောင်ပိုင်းခရိုင်တချို့မှာ မိုးဆက်လက်ရွာ သွန်းနိုင်ပြီး ပင်လယ်ပြင်မှာ လှိုင်းတွေဟာ အမြင့် ၁ မီတာမှ ၂ မီတာထိ မြင့်တက်လာနိုင်ခန့်မှန်းထားပါတယ်။ 

ဘန်ကောက်ခရိုင်တွင်း တုဆစ်၊ နောင်ကျောက်၊ မိင်ဘူရီ၊ လတ်ကရဘန်း၊ ဖယားထိုင်း၊ ဘန်ဖလတ်၊ ဘန်ဆိ၊ ကျဒူးကျတ်နဲ့ ရာ့ချ်ဒေဝီစတဲ့ နယ်မြေ ၉ ခုမှာ ၂၄ နာရီအတွင်း မိုးသည်းထန်နိုင်ပြီး ရေကြီးမယ်အခြေအနေကြိုတင်ကာကွယ်ထားဖို့  ဘန်ကောက်မိုးလေဝသဌာနခွဲကလည်း ထုတ်ပြန်ထားပါတယ်။

ကချင်ပြည်နယ်၊ ဖားကန့်မြို့နယ် ဆယ်ဇင်းကျေးရွာမှာ ဥရုချောင်းရေမြင့်တက်လာပြီး ရေမြုပ်နေတဲ့ လူနေအိမ်တွေကို ကချင်လွတ်မြောက်ရေးတပ်မတော် (ကေအိုင်အေ) တပ်သားတွေက ဇွန် ၁၂ ရက် မနက်ပိုင်းက ကူညီကယ်ဆယ်ရေးလုပ်ကိုင်ဆောင်ရွက်နေတယ်လို့ ဒေသခံတွေထံက သိရပါတယ်။

ရေဘေးသင့်သူတစ်ဦးက “လူနေအိမ် ၁၀၀ ကျော် ရေနစ်မြုပ်နေလို့  ကေအိုင်အေ စစ်သားတွေက ရေဘေးသင့် မိသားစုတွေကို ကူညီကယ်ဆယ်ရေး ရွာကလူတွေနဲ့အတူ လုပ်ပေးနေတယ်"လို့ ပြောပါတယ်။

ဆယ်ဇင်းကျေးရွာဟာ ကေအိုင်အေ အမှတ် ၉ တပ်မဟာ ထိန်းချုပ်တဲ့ နယ်မြေအတွင်းက ကျေးရွာဖြစ်ပြီး မိုးရာသီ ဥရုချောင်းရေကြီးချိန် ရေဘေးဒဏ်ကိုနှစ်စဉ် ကြုံတွေ့နေရတဲ့ ရွာလည်းဖြစ်ပါတယ်။

ရေဘေးသင့် ဒေသခံ အမျိုးသားတစ်ဦးက “အရင်တုန်းက ရေဘေးဆို ပရဟိတလူငယ်တွေနဲ့ အချင်းချင်းတွေ ဝိုင်းကူညီတာပဲရှိတယ်။ ဒီနှစ် ရေကြီးတာနဲ့  ကေအိုင်အေရဲဘော်တွေလာကူညီလို့ ကျေးဇူးတင်တယ် " လို့ပြောပါတယ်။

ကချင်ပြည်နယ်မှာ ဒီနှစ် မိုးရာသီအစမှာကတည်းက မိုးကောင်းနေပြီး ဥရုချောင်းတလျှောက် အနိမ့်ပိုင်းတွေ ရေဝင်နစ်မြုပ်နေကာ ချောင်းဘေး ဝဲ/ယာ နေထိုင်သူတွေ ကမ်းပါးပြိုမှာ စိုးရိမ်နေကြတယ်လို့ ဒေသခံတွေကပြောပါတယ်။

စစ်ကောင်စီအာဏာသိမ်းပြီးနောက် မြစ်/ချောင်းတွေထဲမှာ သယံဇာတ တူးဖေါ်တာတွေ ပိုဆိုးလာကာ ရေကြောင်းပြောင်းတာတွေ၊ ရေစီးရေလာပိတ်တာတွေ ရှိနေတယ်လို့လည်း  ဒေသခံတွေက ဆိုပါတယ်။