ထိုင်းတောင်ပိုင်း၊ ဆုန်ခလာခရိုင်၊ ဟတ်ယိုင်မြို့မှာ ပြီးခဲ့တဲ့ရက်ပိုင်းက ရေကြီးမှုကြောင့်  မြန်မာဆောက်လုပ်ရေးလုပ်သား ၆၀ ကျော် ရေဘေးသင့်ပြီး စားဝတ်နေရေး အခက်အခဲ ကြုံတွေ့နေကြရပါတယ်။ 

ဒီဇင်ဘာ ၁၈ မှ ၂၀ ထိ ၃ ရက်တာ ရေကြီးမှုကြောင့် ဟတ်ယိုင်မြို့ နားမွန်းရပ်ကွက်  ချိုတီဝပ်တနင်္ဂနွေဈေးအနောက်ဘက်ကဆောက်လုပ်ရေးအလုပ်သမား တန်းလျားမှာ ရေခဲသေတ္တာ ၊ ပန်ကာ၊ စောင်၊ အဝတ်အစား၊ အိုးခွက်ပန်းကန်တွေ အကုန်မျောပါသွားကြောင်း၊  ရေပြန်ကျသွားတော့ အစစအရာရာ တစ်ကနေပြန်စနေရကာ  ဒီကြားထဲအလုပ်မလုပ်ရတော့ ငွေကြေးအခက်အခဲ လည်းရှိနေတယ်လို့ ရေဘေး သင့်အလုပ်သမားတွေ သွားရောက်ကူညီနေတဲ့ ဟတ်ယိုင်မြို့ IBEC SWO လူမှုကူညီရေးအသင်းမှ ကိုသားကြီးက ဒီဗွီဘီကို ပြောပါတယ်။ 

“အခုတော့ ရေပြန်ကျသွားပြီခင်ဗျ။ ဒါပေမဲ့  သူတို့အသုံးအဆောင်ပစ္စည်း အဝတ်အစားတွေရော အကုန်ရေထဲပါသွားတာ၊ ရေခဲသေတ္တာတောင်မှ ဟိုးခြံစည်းရိုးနား ထိမျောသွားတာ၊ ဘာမှမကျန်တော့ အစစအရာရာလိုအပ်ပါတယ်၊  ထိုင်းလူမှုရေးအဖွဲ့ လည်းကူညီတယ်၊ ဒါပေမဲ့ ထိထိရောက်ရောက်တော့မရှိဘူးပေါ့။ ကျနော်တို့မြန်မာ အလုပ်သမားအချင်းချင်းက ဝိုင်းပြီးကူညီကြရတာပေါ့။”

ထိုင်းတောင်ပိုင်း ခရိုင်တွေမှာ ခုရက်ပိုင်းတွင်း အခါမဲ့မိုးသည်းထန်စွာရွာ သွန်းတာ ကြောင့်ရေကြီးမှုပြဿနာနဲ့ ကြုံတွေ့နေရပါတယ်၊ တောင်ပိုင်းမှာလည်း မြန်မာအလုပ်သမားတွေ များစွာဝင်ရောက်လုပ်ကိုင်နေတာကြောင့် ရေဘေးသင့်သူတွေလည်းရှိနိုင်တယ်လို့ ဆိုပါတယ်။ 

IBEC SWO လူမှု ကူညီရေးအသင်းမှအနေနဲ့တော့ လက်လှမ်းမီသလောက်သာ ကူညီနိုင်ကြောင်း ၊ ထိုင်းနိုင်ငံရောက်မြန်မာတွေအနေနဲ့ ရေဘေးသင့်မြန်မာလုပ်သားတွေကို ကူညီလိုပါက ဖုန်းနံပါတ် ၀၉ ၅၀၇၉၅၄၁၉ ကို ဆက်သွယ်ကူညီနိုင်တယ်လို့ ဆိုပါတယ်။

ဆုန်ခလာခရိုင်မှာ မြို့နယ်ပေါင်း ၅ မြို့နယ်၊ ၁၁၃ ရပ်ကွက်၊ ၇၆၄ ရွာက အိမ်ထောင်စုပေါင်း ၆၅၁၁၂ စုရေဘေးသင့်ခဲ့ပြီး သေဆုံးသူ ၂ ဦးရှိတယ်လို့ ထိုင်းနိုင်ငံ သဘာဝဘေးအန္တရာယ်ကာကွယ်ရေးနဲ့ ကူညီရေးဦးစီးဌာနက ထုတ်ပြန်ထားပါတယ်။ 

ပြီးခဲ့တဲ့ ရက်ပိုင်းက ထိုင်းတောင်ပိုင်း ခရိုင်ပေါင်း ၉ ခုမှာ ရေကြီးရေလျှံမှုဖြစ်ပွါးခဲ့ပြီး  တချို့နေရာမှာ ရေပြန်ကျသွားပေမယ့် ဒီကနေ့ ဒီဇင်ဘာ ၂၃ ရက်အထိ ခရိုင် ၆ ခုမှာ ရေပြန်ကြီးနေပါတယ်။

ရေကြီးနေတဲ့ ခရိုင်တွေကတော့ နခွန်းဆီထမရတ်၊ ဖတ်ထလုန်း၊ ဆုန်ခလာ၊ ပတ္တနီ၊ ယာ့လားနဲ့ နရာသီဝပ်တို့ဖြစ်ပြီး မြို့နယ်ပေါင်း ၄၂ မြို့နယ်၊ ၂၅၅ ရပ်ကွက်၊ ၁၄၈၅ ရွာက အိမ်ထောင်စုပေါင်း ၁၅၅၅၅၂ စု ရေဘေးသင့်နေတယ်လို့ ထိုင်းပြည်ထဲရေးဝန်ကြီးဌာနလက်အောက်ခံ သဘာဝဘေးအန္တရာယ်ကာကွယ်ရေးနဲ့ ကူညီရေးဦးစီးဌာနက ထုတ်ပြန်ထားပါတယ်။ 

ပါကစ္စတန်နိုင်ငံက ရေဘေးသင့်သူတွေထဲမှာ ရေကြောင့်ဖြစ်တဲ့ ရောဂါတွေအပြင်  ခြင်ကြောင့်ဖြစ်တဲ့ ရောဂါတွေကိုလည်း ထပ်တွေ့နေရတယ်လို့ ယာယီဆေးရုံတွေက ဆရာဝန်တွေက စက်တင်ဘာ ၁၃ ရက်မှာ ပြောကြားလိုက်ပါတယ်။

တဲဆေးရုံမှ ဆရာဝန် ဇီရှန်းအူလ်ဟတ်ခ်က “ဒီအချိန်ဟာ ရေထဲမှာ ခြင်တွေပေါက်ပွားနိုင်တဲ့ ရာသီဖြစ်ပြီး စက်တင်ဘာနဲ့ အောက်တိုဘာ လတွေကလည်း ခြင်ကြောင့် ငှက်ဖျားနဲ့ သွေးလွန်တုပ်ကွေးရောဂါ အဖြစ်များတဲ့လတွေ ဖြစ်တာကြောင့် ရေဘေးဒုက္ခသည်တွေအတွက် ဒီစခန်းတွေမှာ ငှက်ဖျားရောဂါဖြစ်ပွားမှု အများအပြားကို လက်ခံပေးနေရတယ်” လို့ ပြောပါတယ်။

ဒါ့အပြင် အပူနဲ့ အစာမကြေတာကြောင့် ဝမ်းပျက်ဝမ်းလျှော အများအပြား ဖြစ်ပွားနေပြီး အအေးမိ၊ ချောင်းဆိုးတဲ့ ရာသီလည်း ဖြစ်တယ်လို့ ဆိုပါတယ်။

ရေဘေးကယ်ဆယ်ရေးစခန်းမှာ လူပေါင်းရာချီ ယာယီရွက်ဖျင်တဲတွေမှာ နေထိုင်နေရပြီး တကိုယ်ရေသန့်ရှင်းမှုနဲ့ သန့်ရှင်းရေးကိုလည်း စိန်ခေါ်နေတဲ့ အခြေအနေပါ။

သောက်သုံးရေအတွက် ယူလာတဲ့ တန်ကာ ရေစည်ကြီးတွေထဲက ရေတွေကလည်း မသန့်ရှင်းပေမဲ့ ဘာမှမတတ်နိုင်ကြောင်း ရေဘေးစခန်းနေ ဒုက္ခသည်တွေက ပြောပါတယ်။

ရေကြီးမှု စတင်ကတည်းက လူနာပေါင်း ၈၅၆,၀၀၀ ကို ကုသပေးခဲ့ပြီး ကျန်းမာရေးဌာန ၁,၂၀၀ ကျော် ရေအောက်မြုပ်နေတာကြောင့် အများစုမှာ မိုဘိုင်းဆေးခန်းတွေမှာပဲ ကုပေးခဲ့ရကြောင်း ဆင်းန်ဒ်ပြည်နယ် ကျန်းမာရေးဝန်ကြီး အက်ဇ်ရာ ဖာဇလ် ပီချူဟိုက ပြောကြားခဲ့ပါတယ်။

ဝမ်းပျက်ဝမ်းလျှော၊ ငှက်ဖျားရောဂါ၊ အရေပြားရောဂါတွေနဲ့ သွေးလွန်တုပ်ကွေး အပါအဝင် အခြေအနေတွေက ပျံ့နှံ့နေပြီလို့ သူက အခုသီတင်းပတ်အစောပိုင်း သတင်းစာရှင်းလင်းပွဲမှာ ပြောကြားခဲ့ပါတယ်။