ရခိုင်ပြည် တောင်ကုတ်မြို့က ဒေသခံ ၁ ဦးနဲ့ရဲသတင်းပေး ၂ ဦးကို စက်တင်ဘာ ၁၈ ရက်နေ့မနက်မှာ စစ်ကောင်စီက ဖမ်းဆီးသွားခဲ့တယ်လို့ မိသားစုဝင်တွေနဲ့ မြို့ခံတွေက ပြောပါတယ်။  

ဖမ်းဆီးခံလိုက်ရသူတွေကတော့ တောင်ကုတ်မြို့ ချောင်းကောက်ရပ်ကွက်က ဦးထွန်းချစ်၊ တောင်ကုတ်မြို့ ဂူတာရပ်က ကိုဦးနဲ့ စိုးဝင်းချေတို့ ဖြစ်ကြတယ်လို့ ဆိုပါတယ်။ 

ဦးထွန်းချစ်ကို မနက် ၂ နာရီလောက်မှာ နေအိမ်ကနေ စစ်ကောင်စီ တပ်ဖွဲ့ဝင်တွေနဲ့ ရပ်ကွက်အုပ်ချုပ်ရေးအဖွဲ့တွေက လာရောက်ဖမ်းဆီးသွားတာလို့ မိသားစုဝင်တယောက်က ပြောပါတယ်။ 

“ဖမ်းဆီးသွားတာက ဟုတ်ပါတယ်။ မနက် ၂ နာရီလောက်မှာ အိမ်ကိုလာပြီးတော့ စစ်သားနဲ့ ရဲသား အင်အား ၂၀ လောက်ပါတယ်။ နောက် ရပ်ကွက် အုပ်ချုပ်ရေးမှူးနဲ့ ရာအိမ်မှူးတွေပါတယ်။ အခုအချိန်အထိတော့ သူ့ကို ဘယ်မှာ ထိန်းသိမ်းထားတယ်ဆိုတာ မသိရသေးဘူး။ ရဲစခန်းကို သွားမေးတော့လည်း မရှိဘူးပြောတယ်။ ဖမ်းတဲ့အခါ ပါလာတဲ့ရပ်ကွက်က လူကြီးတွေ မေးတော့လည်း တခါတည်း ခေါ်သွားတယ်လို့ ပြောတယ်။ ဘယ်ကို ခေါ်သွားတယ်ဆိုတာ ဘယ်သူမှ မသိကြဘူး။”  

ဦးထွန်းချစ်ဟာ လက်သမားအလုပ် လုပ်ကိုင်နေသူတယောက်ဖြစ်ပြီး ရပ်ကွက်တွင်း သာရေးနာရေး အဖွဲ့တွေမှာ ပါဝင်လုပ်ကိုင်နေသူတယောက်ဖြစ်တယ်လို့ သူက ဆိုပါတယ်။ 

ဒါ့အပြင် နောက်ထပ်ဖမ်းဆီးခံလိုက်ရတဲ့ ကိုဦးနဲ့ စိုးဝင်ချေတို့ကတော့ ရှုထောင့်သတင်စုံဂျာနယ်မှာ လုပ်ကိုင်နေကြတဲ့ ရဲသတင်းပေးတွေလို့ ဒေသခံတွေက ပြောပါတယ်။ တောင်ကုတ်မြို့ခံတယောက်က “သူတို့ကို စစ်သားတွေက ဖမ်းဆီးသွားတာက ဟုတ်တယ်ဗျာ။ ဘာကြောင့် ဖမ်းဆီးသွားတယ်ဆိုတာတော့ မသိဘူး။ ခမရ ၅၄၄ တပ်ရင်းဘက်ကို ခေါ်သွားတယ် လို့သိရတယ်” လို့ ပြောပါတယ်။

ဖမ်းဆီးခံလိုက်ရတဲ့ ကိုဦးဆိုသူဟာ တောင်ကုတ်ခရိုင်အတွင်း စစ်ကောင်စီလက်အောက်ခံ ဌာနဆိုင်ရာက လုပ်ဆောင်ချက်တွေကို သူ့ရဲ့ Facebook အကောင့်ပေါ်မှာ ရေးသားလေ့ရှိပြီး ရဲအငြိမ်းစားတွေ စုပေါင်းတည်ထောင်ထားတဲ့ (ရှူထောင့်သတင်းစုံဂျာနယ်) မှာလည်း လုပ်ကိုင်တယ်လို့ ဒေသခံတွေက ပြောပါတယ်။ 

တောင်ကုတ်မြို့မှာ စက်တင်ဘာ ၁၆ ရက်နေ့က စစ်ကောင်စီ  သင်္ဘောတစီးကို အေအေက တိုက်ခိုက်ခဲ့ပြီးနောက် စစ်ကောင်စီက လုံခြုံရေးတင်းကျပ်ထားတယ်လို့ သိရပါတယ်။

ရန်ကုန်၊ အင်းစိန်မြို့သစ်က ရဲသတင်းပေးလို့ လူသိများသူ အမျိုးသား ၁ ဦး  စက်တင်ဘာ ၄ ရက် ဒီနေ့ မွန်းတည့် ၁၂ နာရီ  ဝန်းကျင်လောက်က  ခ- ၅လမ်း လမ်းထိပ်မှာ သေနတ်နဲ့ပစ်သတ်ခံရပြီး ပွဲချင်းပြီး သေဆုံးသွားတယ်လို့ ဒေသခံတွေက ပြောပါတယ်။ 

“ခေါင်းကို ငါးချက် ပစ်ခံရတယ်၊ ပွဲချင်းပြီး သေတယ်၊ သူ့ကြောင့် ဖမ်းခံရထားသူတွေ အများကြီးပဲ၊ သူက အရင်ကတည်းက ရဲသတင်းပေးလုပ်တာ” လို့ ဒေသခံတစ်ဦးက ဆိုပါတယ်။

အသတ်ခံရသူ ဦးစိုးမြင့်ထွေးက အသက် ၄၇ နှစ်အရွယ် ရှိပြီဖြစ်ပြီး သူနေထိုင်တဲ့ ခ-၇ လမ်းကနေ ဆိုင်ကယ်နဲ့ထွက်လာပြီးနောက် ပစ်သတ်ခံရတာဖြစ်တယ်လို့ ဆိုပါတယ်။ 

ပစ်သတ်သွားတဲ့အဖွဲ့ကို အတည်ပြုနိုင်ခြင်းမရှိသေးဘဲ ရဲသတင်းပေးလို့ အများက သိကြသူ အသတ်ခံရသူ ဦးစိုးမြင့်ထွေးကြောင့် ရပ်ကွက်အတွင်းက ဖမ်းဆီးခံထားရတဲ့ လူငယ်တွေ အများကြီးရှိပါတယ်။