နိုင်ငံတော်သမ္မတ ဦး၀င်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ပြည်ထောင်စု၀န်ကြီး ဦးမင်းသူတို့ကို စစ်ကောင်စီတရားရုံးက ထောင်ဒဏ် ၃ နှစ်စီ အမိန့်ချမှတ်လိုက်ပါတယ်။
နိုင်ငံခေါင်းဆောင်တွေအပေါ် ရွေးကောက်ပွဲနဲ့ပတ်သက်ပြီး အာဏာသိမ်း စစ်ကောင်စီက တရား စွဲဆိုထားတဲ့အမှုအတွက် နေပြည်တော်အချုပ်ထောင်ရှိ အထူးတရားရုံးမှာ စက်တင်ဘာ ၂ ရက် ဒီနေ့ ရုံးထုတ်ပြီး အခုလို အမိန့်ချလိုက်တာဖြစ်တယ်လို့ တရားရုံးနဲ့နီးစပ်တဲ့ အသိုင်းအဝိုင်းက နေ သိရပါတယ်။
နိုင်ငံတော်သမ္မတ ဦး၀င်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ပြည်ထောင်စုအစိုးရအဖွဲ့ရုံး၀န်ကြီးဌာန ပြည်ထောင်စု၀န်ကြီး ဦးမင်းသူတို့ကို ၂၀၂၀ အထွေထွေရွေးကောက်ပွဲမှာ ပြည်ထောင်စုရွေးကောက်ပွဲကော် မရှင်အပေါ် မလျော်သြဇာ လွှမ်းမိုးခဲ့တယ်လို့ စစ်ကောင်စီက စွပ်စွဲပြီး ရာဇတ်ကြီးပုဒ်မ ၁၃၀-က နဲ့ တရားစွဲဆိုထားတာဖြစ်ပါတယ်။
“တစ်ယောက်ကို အလုပ်နဲ့ ထောင်ဒဏ် ၃ နှစ်စီချလိုက်တယ်။ အယူခံဆက်တက်မယ် ” လို့ တရားရုံးနဲ့နီးစပ်သူတစ်ဦးက ပြောပါတယ်။
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အနေနဲ့ ယခုထပ်မံချမှတ်လိုက်တဲ့ ထောင်ဒဏ် ၃ နှစ်နဲ့ဆိုပါက စုစုပေါင်း ချမှတ်ခံရတဲ့ ထောင်ဒဏ် အနှစ် ၂၀ ရှိပြီဖြစ်ပြီး နောက်ထပ် အမိန့်မချရသေးတဲ့ အမှုတွေလည်း ရှိနေပါသေးတယ်။
နိုင်ငံ့ခေါင်းဆောင်တွေအပေါ် ရွေးကောက်ပွဲနဲ့ပတ်သက်ပြီး စွဲဆိုထားတဲ့ အမှုအတွက် နေပြည်တော် အချုပ်ထောင်ရှိ အထူးတရားရုံးမှာ သြဂုတ် ၂၆ ရက်က ရုံးထုတ် စစ်ဆေးခဲ့တယ်လို့ တရားရုံးနဲ့နီးစပ်တဲ့ အသိုင်းအဝိုင်းကနေ သိရပါတယ်။
ဒီနေ့ရုံးချိန်းမှာ အမှုအတွက် အပြီးသတ် လျှောက်လဲချက်ပေးရပြီး လာမယ့် စက်တင်ဘာ ၂ ရက်နေ့မှာ အမိန့်ချမယ်လို့ တရားရုံးနဲ့ နီးစပ်သူတယောက်က ပြောပါတယ်။
စစ်ကောင်စီက နိုင်ငံတော်သမ္မတ ဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ပြည်ထောင်စုအစိုးရအဖွဲ့ရုံး ဝန်ကြီးဌာန ပြည်ထောင်စုဝန်ကြီး ဦးမင်းသူတို့ကို ၂၀၂၀ အထွေထွေရွေးကောက်ပွဲမှာ ပြည်ထောင်စု ရွေးကောက်ပွဲကော်မရှင်အပေါ် မလျော်သြဇာ လွှမ်းမိုးခဲ့တယ်လို့ စွပ်စွဲပြီး ရာဇသတ်ကြီးပုဒ်မ ၁၃၀-က နဲ့ တရားစွဲဆိုထားတာ ဖြစ်ပါတယ်။
တရားရုံးနဲ့နီးစပ်သူက “အဓိကကတော့ သူတို့စွပ်စွဲတဲ့ မဲမသမာမှုဆိုတဲ့ဟာတွေကို သူတို့ဘက်က သက်သေမပြနိုင်ဘူး။ မဲမသမာမှုဖြစ်တယ်ဆိုတဲ့ အထောက်အထားပေါ့။ မဲနဲ့ပတ်သက်ပြီး ၁၁ သန်းကျော် မဲမသမာမှုဖြစ်တယ်ဆိုပြီး ပြောတယ်။ သူတို့ တကယ်တရားစွဲထားတာက ၂,၀၀၀ ကျော်ပဲရှိတယ်လို့ သက်သေပြတယ်။ မေလျာ်သြဇာသုံးတာ၊ မဲမသမာမှုလုပ်တဲ့ ကိစ္စတွေ မပါဘူး” လို့ ပြောပါတယ်။
ဒီအမှုနဲ့ပတ်သက်လို့ နိုင်ငံတော်သမ္မတဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကလည်း သူတို့မှာ မပြစ်မရှိကြောင်း ထွက်ဆိုထားပါတယ်။
စက်တင်ဘာ ၂ ရက်နေ့မှာ ရွေးကောက်ပွဲနဲ့ပတ်သက်ပြီး အမိန့်ချမှာဖြစ်သလို ဦးမင်းသူအပေါ် ထပ်မံစွဲဆိုထားတဲ့ ခြေချုပ်အမှု ၁၀၇ ကိုလည်း အဲ့ဒီနေ့မှာပဲ အမိန့်ချမယ်လို့ သိရပါတယ်။
