ကချင်ပြည်နယ် ရွှေကူမြို့နယ်မှာ ဇူလိုင် ၂၁ ရက်နေ့ ညနေ ၃ နာရီခွဲလောက်က မြို့လှ PDF နဲ့ စစ်ကောင်စီတပ်ဖွဲ့တို့ တိုက်ပွဲဖြစ်ပွားရာမှာ နှစ်ဘက်အကျဆုံးရှိတယ်လို့ သိရပါတယ်။
တိုက်ပွဲဟာ ရွှေကူမြို့နယ် မြို့ကုန်းကျေးရွာအထွက် ခိုလိပ်လမ်းအဆင်းမှာ ဖြစ်ပွားခဲ့တာဖြစ်ပြီး စစ်ကောင်စီတပ်ဖွဲ့မှ ခလရ ၆၀၁ နဲ့ မြို့လှ KPDF တပ်ရင်း၊ တပ်ခွဲ ၁ တို့ ထိတွေ့တိုက်ပွဲဖြစ်ခဲ့တာလို့ Myo Hla - PDF က ထုတ်ပြန်ထားပါတယ်။
အဲ့ဒီတိုက်ပွဲနဲ့ ပတ်သတ်ပြီး " တိုက်ပွဲဖြစ်တာ အနည်းငယ် ကြာပါတယ်။ စစ်ကောင်စီတပ်ဖွဲ့ဝင် ၃၀ လောက်သေတယ်လို့ ခန့်မှန်းခြေအရ ပြောနိုင်ပါတယ်။ အရေတွက်အတိကျတော့ မသိရသေးဘူး၊ ဒဏ်ရာရသူလည်း များတယ်။ ကျနော်တို့ ဘက်ကတော့ ၁ ယောက် ကျတယ်။ ရန်သူဘက်က လက်နက်ကြီးအတော်သုံးတယ်” လို့ မြို့လှ PDF တာဝန်ရှိသူက ပြောပါတယ်။
မြို့လှ KPDF တပ်ရင်းမှ တိုက်ပွဲကျဆုံးသွားသူဟာ တပ်စိတ်မှုး Viber ဆိုသူဖြစ်ပြီး သူ့ရဲ့ ရုပ်အလောင်းကို အလေးပြုအခမ်းအနားနဲ့ ကောင်းမွန်စွာ သင်္ဂြိုဟ်သွားမယ်လို့ ဆိုပါတယ်။
ရွှေကူမြို့နယ်မှာ စစ်ကောင်စီတပ်ဖွဲ့ဟာ ရေကြောင်းကို အသုံးပြုကာ အင်အားဖြည့်တင်းတာတွေ ပြုလုပ်နေပြီး ပြီးခဲ့တဲ့ ဇူလိုင် ၁၆ ရက်နေ့ကလည်း စစ်ကောင်စီတပ်ဖွဲ့ဝင်တွေ လိုက်ပါလာတဲ့ မော်တော်ရေယာဉ်ကို ရွှေကူမြို့နယ်အတွင်းမှာ မြို့လှ KPDF နဲ့ မြို့လှအရန်တပ်ဖွဲ့တွေက ပူးပေါင်းတိုက်ခိုက်ခဲ့တယ်လို့ သိရပါတယ်။
ကချင်ပြည်နယ် ရွှေကူမြို့နယ်အတွင်းမှာ မြို့လှပြည်သူ့ကာကွယ်ရေးတပ်နဲ့ စစ်ကောင်စီတပ်တို့ ဇန်နဝါရီ ၁၉ ရက်နေ့မနက်က တိုက်ပွဲဖြစ်ပွားရာမှာ စစ်ကောင်စီတပ်သား ၁၀ ဦးထက် မနည်းသေဆုံးပြီး အမြောက်အမြား ဒဏ်ရာရသွားတယ်လို့ မြို့လှ ပြည်သူ့ကာကွယ်ရေးတပ်က သိရပါတယ်။
စစ်ကောင်စီတပ်အင်အား ၆၀ လောက်ဟာ ရွှေငြိမ်းချမ်းရွာကနေတဆင့် ကျောက်ကြီးရွာဘက်ကို ဇန်နဝါရီ ၁၉ ရက်မနက် ၈ နာရီခွဲလောက်က ခြေလျင်စစ်ကြောင်းထိုးလာခဲ့တယ်လို့ သိရပါတယ်။
ကျောက်ကြီးရွာ မရောက်မီ လွင်ယားဒေသအနီးမှာ ပြည်သူ့ကာကွယ်ရေးတပ်ကနေ ကြိုတင်မိုင်း ၁၆ လုံးနဲ့ မိုင်းဆွဲတိုက်ခိုက်ခဲ့တာဖြစ်ပြီး တိုက်ပွဲကြာချိန် ၄၅ မိနစ်လောက်ကြာခဲ့တယ်လို့ မြို့လှပြည်သူ့ကာကွယ်ရေးတပ်ဖွဲ့က ပြောပါတယ်။
အဲဒီတိုက်ပွဲမှာ မြို့လှပြည်သူ့ကာကွယ်ရေးတပ်ဖွဲ့တွေဘက်က ထိခိုက်တာမရှိဘဲ ပြန်လည်ဆုတ်ခွာနိုင်ခဲ့တယ်လို့ သိရပါတယ်။
ဇန်နဝါရီ ၁၇ ရက်နေ့ကလည်း စစ်ကောင်စီတပ်နဲ့ မြို့လှပြည်သူ့ကာကွယ်ရေးတပ်၊ KIA ပူးပေါင်းတပ်တို့ အမှတ်ကြီးကုန်းကျေးရွာအနီး တိုက်ပွဲဖြစ်ပွားခဲ့ရာမှာ စစ်ကောင်စီဘက်က ၁၅ ဦးထက်မနည်းသေဆုံးခဲ့တာ ဆိုပါတယ်။
တိုက်ပွဲဖြစ်စဉ်နဲ့ သေဆုံးဒဏ်ရာရမှုအခြေအနေတွေကို စစ်ကောင်စီဘက်ကတော့ သတင်းထုတ်ပြန်တာ မရှိသေးပါဘူး။
photo Crd - မြို့လှpdf
