ပဲခူးတိုင်း၊ ရွှေကျင်မြို့ရှိ လွှတ်တော်ကိုယ်စားလှယ် တယောက်ရဲ့ သားဖြစ်သူ ပိုင်ဆိုင်တဲ့ ချိပ်ပိတ်ခံထားရတဲ့ နေအိမ်ကို  တပ်ပြေးစစ်ဗိုလ်တယောက်က ဧပြီ ၃ ရက်မှာ ရောင်းစားလိုက်တယ်လို့ ဒေသခံတွေက ပြောပါတယ်။ 

စစ်ကောင်စီက လိုက်လံဖမ်းဆီးနေတာကြောင့် အိမ်ကို သော့ခတ်ပြီး၊ ထွက်ပြေးတိမ်းရှောင်နေရတဲ့ ရွှေကျင်မြို့နယ် တိုင်းဒေသကြီးလွှတ်တော်ကိုယ်စားလှယ် ဒေါ်လှလှဝင်းရဲ့ သားပိုင်ဆိုင်တဲ့အိမ်ကို တပ်ပြေးစစ်ဗိုလ်တယောက်က သိန်း ၁၂၀ နဲ့ရောင်းချလိုက်တာဖြစ်ပါတယ်။

ရွှေကျင်မြို့ခံတယောက်က "ရောင်းတဲ့သူက တပ်ပြေး ဗိုလ်ပြည့်စုံနဲ့ သူ့မိန်းမ NON-CDM ဆရာမ ဒေါ်ကြော့ကြောမြင့်မိုရ်တို့ကရောင်းလိုက်တာ။ ဝယ်သူက  အခုလက်ငင်း သိန်း ၈၀ ချေတယ်။ ကျန်ငွေကို နောက်ဘယ်တော့ပေးမယ်တော့မသိပါဘူး။ တပ်ပြေး ဗိုလ်ပြည့်စုံက အခုလက်ရှိ စစ်ကောင်စီခန့်မြို့နယ်စီမံကောင်စီဝင်ဗိုလ်မှူးအောင်ချမ်းအောင်နဲ့ အရင်က တတပ်ထဲနေလာတာ ဆရာတပည့်တွေဆိုတော့ ဒီဗိုလ်မှူးကိုပိုင်တာပေါ့”လို့ပြောပါတယ်။

အခု ရောင်းစားခံရတဲ့ အိမ်ဟာ ရွှေကျင်မြို့၊ ကျွဲတဲရပ်ကွက်၊ ငုဝါလမ်း၊ အိမ်အမှတ် ၆၃၃ ဖြစ်ပြီ ပေ ၄၀-၆၀ မြေကွက်ပေါ်မှာ ဆောက်ထားတဲ့ တထပ်တိုက်လေးဖြစ်ပါတယ်။

လွှတ်တော်ကိုယ်စားလှယ် ဒေါ်လှလှဝင်းက “ပထမ ချိပ်ပိတ်ခံရတဲ့ ကျမအိမ်ထဲကို ခိုးပြီးဝင်မွှေတော့၊ ကျမသားရဲ့ အိမ်နဲ့ပတ်သက်တဲ့ စာရွက်စာတန်းတွေရယ်၊ မြေကွက်ဝယ်ယူထားတဲ့ စာချုပ်တွေရယ်ကို ရသွားတာ။ ကျမသားကလည်း ထွက်ပြေးနေရတော့ အိမ်ကို ဒီအတိုင်းပိတ်ထားခဲ့ရတာ။ အဲ့ဒီမှာ သူတို့က ကျမသားအိမ်ထဲကို အရင်ခိုးဝင်ပြီး၊ အိမ်ထဲက ရေခဲသေတ္တာ၊ TV၊ အဝတ်လျှော်စက်၊ အိမ်ထောင်ပရိဘောဂတွေ အကုန်လုံးသယ်ယူသွားတာ၊ အိမ်ကိုအပြောင်လုပ်ပြီးမှ ရောင်းလိုက်တာ။ ဝယ်သူနာမည်တော့  စုံစမ်းနေတုန်းပဲ အဲ့ဒီအိမ်က မီတာဘောက်တောင် ကျမ နာမည်ပေါက်ပါ”လို့ ပြောပါတယ်။

ရွှေကျင်မြို့ ရှမ်းကြေးရပ်ကွက်၊ ရုံးလမ်းရှိ လွှတ်တော်အမတ် ဒေါ်လှလှဝင်းပိုင်ဆိုင်တဲ့ အိမ်အမှတ် ၈၇ ကိုလည်း  ၂၀၂၂ ခုနှစ် နိုဝင်ဘာ  ၂၄ ရက်မှာ  စစ်ကောင်စီက ချိပ်ပိတ်ခဲ့ပါတယ်။

အခုလို အိမ်ကိုရောင်းစားခဲ့တဲ့ ဗိုလ်ပြည့်စုံနဲ့ သူ့မိန်းမ NON-CDM ဆရာမ ဒေါ်ကြော့ကြောမြင့်မိုရ် တို့ကို  ဖုန်းနဲ့ အကြိမ်ကြိမ် ဆက်သွယ်ခဲ့ပေမဲ့ ဖုံးမကိုင်ခဲ့ပါဘူး။

ပဲခူးတိုင်း၊‌ ရွှေကျင်မြို့နယ် တိုင်းဒေသကြီးလွှတ်တော်ကိုယ်စားလှယ် ဒေါ်လှလှဝင်းရဲ့ နေအိမ်အပါအဝင် ပိုင်ဆိုင်မှုတွေကို ချိပ်ပိတ်မယ်လို့ နိုဝင်ဘာ ၂၄ ရက်မှာ   ဝရမ်းထုတ်ထားတယ်လို့ မြို့နယ် တရားရုံးကနေ သိရပါတယ်။

ဒေါ်လှလှဝင်းကို စစ်ကောင်စီတရားရုံးက ရာဇသတ်ကြီးပုဒ်မ ၁၃၀-က နဲ့ တရားစွဲထားပြီး ရုံးချိန်း မလာတာကြောင့် အခုလို ပိုင်ဆိုင်မှုတွေ ချိပ်ပိတ်ဖို့ လုပ်ဆောင်တာဖြစ်ပါတယ်။

တိုင်းဒေသကြီးလွှတ်တော်ကိုယ်စားလှယ် ဒေါ်လှလှဝင်းက “အဲ့ဒီအိမ်နဲ့မြေက ကျမပိုင်တာ မဟုတ်ဘူး။ ကျမအမျိုးသား ပိုင်တာ။ သူတို့က သူတို့ထုတ်ထားတဲ့ ဥပဒေလည်း သူတို့မလေးစားဘူး၊ မလိုက်နာဘူး။ အိမ်ကို ချိပ်ပိတ်ရအောင်က ကျမပိုင်ဆိုင်တဲ့အိမ်မှ မရှိတာ။ သူတို့ လုပ်ချင်သလို လုပ်နေတာ။”လို့ပြောပါတယ်။

စစ်အာဏာရှင်ဆန့်ကျင်တဲ့ လူထုဆန္ဒပြပွဲတွေမှာ ပါဝင်ခဲ့တဲ့အတွက် ဒေါ်လှလှဝင်းကို စစ်ကောင်စီက ပုဒ်မ-၅၀၅(က) ဝရမ်းထုတ်ထားသလို သူ့ရဲ့သားဖြစ်သူကိုပါ ဝရမ်းထုတ်ထားတဲ့အတွက် ဘေးလွတ်ရာမှာ တိမ်းရှောင်နေရတာဖြစ်ပါတယ်။

ဒေါ်လှလှဝင်းက “ကျမသားလေးကိုလည်း ၅၀၅ ကော၊ အကြမ်းဖက်ဆိုပြီး ဝရမ်းထုတ်ထားတယ်။  နှစ်ယောက်လုံးကို ဖမ်းဖို့လုပ်တာ၊ ကျမတို့ ထွက်ပြေးနေတာ။ အခု ရပ်ကွက်ထဲကလူတွေက လှမ်းပြောလို့ သိရတာ။ အမှုလာရင်မဆိုင်ရင် ကျမတို့နေတဲ့အိမ်ကို ချိပ်ပိတ်မယ်ဆိုပြီး ရပ်ကွက်ရုံးမှာ ဝရမ်းလာကပ်သွားတယ်ဆိုပြီး လှမ်းပြောလို့ သိရတာ။ ကျမကတော့ သူတို့တရားရုံးကိုလည်း သွားဖို့ အစီအစဉ်မရှိသလို သူတို့ဥပဒေကိုလည်း အယုံအကြည်မရှိပါဘူး။ အခုလို အိမ်ကို ချိပ်ပိတ်တာလည်း မမှုပါဘူး။ ဒီကိစ္စလောက်ကို ခါချဉ်ကိုက်တာလောက်တောင် မမှုပါဘူး။ သူတို့ အဲဒီလို လုပ်နေနေ အာဏာရှင်ကို တော်လှန်ဖို့ စိတ်ထားတွေ ပိုပြီး ပြတ်သားလာလေပဲ။ တော်လှန်ရေး စိတ်ထားတွေ ပိုပြီးမြင့်မားလာနေပါတယ်” လို့ ပြောပါတယ်။

လွှတ်တော်ကိုယ်စားလှယ် ဒေါ်လှလှဝင်းရဲ့အိမ်ဟာ ရွှေကျင်မြို့၊ ရှမ်းကြီးရပ်ကွက်၊ အိမ်အမှတ် ၈၇၊ ရုံးလမ်းမှာရှိပြီး သူ့ကို ရွှေကျင်မြို့နယ်တရားသူကြီးက ရာဇသတ်ကြီးပုဒ်မ ၁၃၀-က ကျူးလွန်ကြောင်း တိုင်ချက်ရှိတဲ့အတွက် ဖမ်းဝရမ်းထုတ်ခဲ့ပါတယ်။

ဒေါ်လှလှဝင်းအပေါ် စွဲဆိုချက်တွေကို ထုချေရှင်းလင်းဖို့ နိုဝင်ဘာ ၂၄ ရက်အတွင်း လာရောက်ဖို့နဲ့ ပျက်ကွက်ပါက ပိုင်ဆိုင်တဲ့ ပစ္စည်းတွေကို ဝရမ်းကပ် သိမ်းဆည်းမယ်လို့ သမ္မန်စာထုတ်ပြီး ရပ်ကွက်ရုံးမှာ ကပ်ထားတယ်လို့ ဒေသခံတယောက်က ပြောပါတယ်။