ရှမ်းပြည်နယ်မြောက်ပိုင်း မူဆယ်၊ နမ့်ခမ်း၊ ကွတ်ခိုင်၊ ပန်ခမ်း၊ လားရှိုး၊ တန့်ယန်းနဲ့ ပြည်ထောင်စု လမ်းမပေါ်တွေမှာ လတ်တလော ကချင်လွတ်မြောက်ရေးတပ်မတော် (KIA) တံဆိပ်တုံး အတုနဲ့ လိမ်လည်ခြိမ်းခြောက်ပြီး ငွေကောက်ခံနေတယ်လို့ ဒေသခံတွေက ပြောပါတယ်။ 

ကြုံခဲ့ရသူ ကွတ်ခိုင်ဒေသခံတဦးက "ခင်ဗျား ထည့်မလား မထည့်ဘူးလားလို့ ပြောတယ်။ ရုံးမှာ လာထည့်လို့ရှိရင် ၁၀ သိန်း ထည့်ရမယ်။ Kpay နဲ့ ထည့်ရင် ၂ သိန်းနဲ့ ရမယ်လို့ ပြောတယ်။ ဒီဘက်မှာ အဲဒီလို လုပ်စားနေကြတယ်။ အားလုံး သတိထားရမယ်" လို့ ပြောပါတယ်။

ကွတ်ခိုင်မှာလည်း ခြိမ်းခြောက်ငွေကောက်ခံတာတွေ များလာပြီး လူမပြဘဲ ဖုန်းနဲ့ ပြောဆို ခြိမ်းခြောက်တဲ့အပြင် Kpay နဲ့ ငွေလွှဲခိုင်းကာ တချို့ ဟိုတယ်တွေဆိုရင် တခါတည်း ၅ သိန်း ထည့်ရမယ်ဆိုပြီး လုပ်ငန်းကြီးရင် ကြီးသလို လိုက်ဝောာင်းနေတယ်လို့ ဆိုပါတယ်။  

KIA အဖွဲ့ကပါဆိုပြီး နေရာတကာ အခွန်ဆက်ကြေး အများကြီး ကောက်ခံနေတဲ့အပြင် KIA အဖွဲ့ကဖြစ်ကြောင်း လိမ်လည်ဓားပြတိုက်စားနေတဲ့ အဖွဲ့တွေ  များလာတယ်လို့လည်း ဖုန်းဆက်ခြိမ်းခြောက်ခံရသူ ဒေသခံနောက်တဦးက ပြောပါတယ်။ 

"KIA ဘယ်တပ်ရင်းကလဲလို့ မေးလည်း ဘာမှသိဘူး။ ရှမ်းအသံနဲ့၊ ကချင်တောင် မဟုတ်ဘူး။  နောက်မှ ကချင် မဟုတ်ဘူး ပြောလို့ ကချင် တယောက်နဲ့ ပြန်ပြောခိုင်းတယ်။" 

လားရှိုးမှာလည်း KIA နာမည်ခံပြီး အခွန်ဆက်ကြေး ကောက်စားနေတဲ့သူတွေ ပေါ်လာပြီလို့ လားရှိုးဒေသခံတဦးက ထပ်ပြောပါတယ်။ 

“ခု KIA နာမည် ရောင်းစားပြီး လမ်းပေါ်တွေမှာလည်း KIA ပါ ဆိုပြီး ဓားပြ တိုက်စားနေကြတယ်။ ကားတွေကို ပိုက်ဆံလိုက်ကောက်စားနေတာလည်း တော်တော် များနေတယ်။ အရမ်း သတိထားရမယ်။” 

မူဆယ်၊ နမ့်ခမ်း၊ ကွတ်ခိုင်၊ ပန်ခမ်း၊ လားရှိုး တွေမှာ KIA နာမည်နဲ့ တံဆိပ်တုံးအတု လုပ်ပြီး Myanmar Independent Study, KIA ဆိုတဲ့ တံဆိပ်ပါတဲ့ ဖြတ်ပိုင်းနဲ့ အခွန်ဆောင်ရန် ငွေ လိုက်လံ လိမ်လည်ကောက်ခံနေတယ်လို့ သိရပါတယ်။

နိုဝင်ဘာ ၂ ရက်ကလည်း ကန်မိန်း၊ လွယ်ဒေါင်ဝ်နယ်မြေ တန့်ယန်းက ဈေးဆိုင်၊ စားသောက်ဆိုင်ကြီးတွေမှာ KIA အဖွဲ့ ကပါ ဆိုပြီး ဖုန်းနဲ့ အခွန်ဆောင်ဖို့ ငွေတောင်းခံနေတယ်လို့ ဒေသခံတွေက ပြောပါတယ်။ 

ဒီလို KIA က သတ်မှတ်ထားတဲ့ အခွန်ဖြတ်ပိုင်း မဟုတ်ဘဲနဲ့ KIA နာမည်ခံပြီး နာမည်ဖျက်နေသူ တယောက်ယောက် ဒါမှမဟုတ် အဖွဲ့တွေကို ပြည်သူတွေအနေနဲ့လည်း ခွဲခြားသိမြင်ပြီး ပါဝင် ဆန့်ကျင်ဖို့ လိုတယ်လို့ KIA နဲ့ နီးစပ်သူတဦးက ပြောပါတယ်။  

တန့်ယန်းဒေသမှာတော့ KIA တပ်ဖွဲ့အနေနဲ့ တပ်စခန်းချထားတာ မရှိပေမဲ့ ငွေမပေးဆောင်ရင် အသက်အန္တရာယ် ပြုလာမှာကို စိုးရိမ်ကြောင်း အဲဒီဒေသခံတဦးက ပြောပါတယ်။ 

ဒါ့အပြင် ကချင်ပြည်နယ် ဗန်းမော်ဘက်မှာလည်း အဲဒီ လိုဂိုတံဆိပ်အတုနဲ့ ငွေတွေ ခြိမ်းခြောက် ကောက်ခံနေတယ်လို့  ‌ဒေသခံက ပြောပါတယ်။ 

"ဗမာစကားပြောတယ် အဲဒီအဖွဲ့တွေ။ ပိုက်ဆံ ပါသွားတဲ့သူတွေ လည်းရှိတယ်။ နောင်းခူးဘက် ကောက်စားနေတယ်။"

ရှမ်းပြည်နယ်မြောက်ပိုင်းမှာ KIA အမည်ခံပြီး လူတစုက အခွန်ကောက်နေတာ K.I.A ဘက်က လုံးဝ မဟုတ်ကြောင်း၊ သတိထားကြပါဖို့နဲ့ အဲဒီလိုဂို တံဆိပ်တုံးအတုနဲ့ ပိုက်ဆံ လာကောက်ရင် သက်ဆိုင်ရာ နီးစပ်ရာ KIA တပ်စခန်း၊ တိုက်နယ်ရုံးတွေကို အကြောင်းကြားဖို့၊ အဲဒီအဖွဲ့ကို ဖမ်းဆီးဖို့ ရှာဖွေနေဆဲဖြစ်ကြောင်း KIA က လူမှုကွန်ရက်မှာ အသိပေးထားပါတယ်။ 

ရှမ်းပြည်နယ်မြောက်ပိုင်း၊ မူဆယ်ခရိုင်မှာ  စစ်ကောင်စီတပ်တွေနဲ့ MNDAA ၊ KIA တပ်တွေအကြား ဇူလိုင် ၂၅ ရက်ကစပြီး ၂၈ ရက် အထိ နေ့စဉ် ဆက်တိုက် တိုက်ပွဲတွေ ဖြစ်ပွားခဲ့ပြီး ကလေးငယ် တယောက် လက်နက်ကြီးကျည်စ ထိမှန် ဒဏ်ရာ ရရှိခဲ့တယ်လို့ ဒေသခံတွေ ဆီက သိရပါတယ်။ 

ဒီနေ့ မွန်းလွဲ ၁၂ နာရီကျော်လောက်က  ကွတ်ခိုင်နဲ့ နမ့်ဖတ်ကာကြားမှာ စစ်ကောင်စီတပ်နဲ့ KIA တို့အကြား နာရီအနည်းငယ်ကြာ တိုက်ပွဲဖြစ်ပွားခဲ့တယ်လို့ KIA ရှေ့တန်း သတင်းရင်းမြစ်က ပြောပါတယ်။

"ကွတ်ခိုင် ရှုခင်းသာ၊ ဖာခေတ်နဲ့ နမ့်တွန်းကြား သစ်ကြားသီးခြံတလျှောက် KIA တပ်ရင်း ၉၊ ကချင်ပြည်သူ့စစ် Army ပူးပေါင်းတို့နဲ့ စစ်ကောင်စီတပ်တို့ တိုက်ပွဲ ဖြစ်ပွားတယ်။ စစ်ကောင်စီဘက်က နမ့်ဖတ်ကာ ၁၂၃ တပ်၊ နမ့်ခိုင်တပ်၊ ကွတ်ခိုင် ၂၄၂ တပ် တို့ကနေ လက်နက်ကြီး ပစ်ကူတယ်။" 

အဆိုပါတိုက်ပွဲမှာ နှစ်ဖက်တပ်တွေ ထိခိုက်သေဆုံးတဲ့ အခြေအနေကိုတော့ အတိအကျ မသိရသေးပါဘူး။

ဇူလိုင် ၂၇ ရက်ကလည်း နမ့်အွမ်နဲ့ တီးမကြား ထင်းရှူးတောမှာ စစ်ကောင်စီတပ်နဲ့ MNDAA တို့ တိုက်ပွဲပြင်းထန်ခဲ့‌တယ်လို့  နမ့်အွမ် ဒေသခံ တယောက်က ပြောပါတယ်။ 

"တိုက်ပွဲကတော့ ဖြစ်တယ်။ ညနေပိုင်း ၂ နာရီ ဝန်းကျင်က။ လက်နက်ကြီးတွေလည်း ပစ်တယ်။ ရွာထဲတော့ ဘာမှ မဖြစ်ဘူး။”

ဒီညနေ ၃ နာရီ ကျောင်းဆင်းချိန်မှာတော့ တိုက်ပွဲမဖြစ်ဘဲ နမ့်ခိုင်ဘက်မှ လက်နက်ကြီးနဲ့ ပစ်ခတ်မှုကြောင့် ကျောင်းက အပြန်လမ်း နမ့်ဖလွန်ရွာအနီး လီဆူရွာသစ်မှာ အော်ခဲရွာက အသက် ၈ နှစ်အရွယ် မူလတန်းကျောင်းသား မောင်ခမ်းဂေါန်ကို လက်နက်ကြီး ကျည်စ ထိမှန်ဒဏ်ရာရခဲ့တယ်လို့  ဒေသခံတွေနဲ့ အကူအညီ ပေးခဲ့သူတွေက ပြောပါတယ်။ 

"ကလေး တယောက်ကျောမှာ လက်နက်ကြီးကျည်စ ထိမှန်တယ်။ ကျည်စ အထဲမှာ ရှိနေသေးတော့ မနေ့ည ကွတ်ခိုင်ဆေးရုံရောက်တယ်။ ဒီနေ့ ခွဲစိပ်ဖြစ်လားတော့ မသိရသေးဘူး။" လို့ အကူအညီပေးခဲ့သူ ‌တဦးက ပြောပါတယ်။

ဇူလိုင် ၂၇ ရက်နဲ့  ၂၈ ရက်မှာ  နမ့်ဖတ်ကာ စစ်ကောင်စီ ၁၂၃ တပ်ကနေ လက်နက်ကြီးနဲ့ ပစ်ခတ်ခဲ့တယ်လို့  နမ့်ဖတ်ကာ ဒေသခံက ပြောပါတယ်။

"နမ့်ဖတ်ကာကလည်း ပစ်နေတာ။ မနေ့ကလည်း ပစ်တယ်။ ဒီနေ့လည်း ပစ်တယ်။ ၈ ချက်၊ ၉ ချက်လောက်ရှိတယ်။ အိမ်တောင်တုန်တယ်။ သူတို့ပစ်တာ လှမ်းမြင်ရတယ်လေ ဒီက။ အသံကလည်း အကျယ်ကြီး။ မီးတွေလည်း အဲလိုသွားတာ လှမ်းမြင်ရတယ်။ ပစ်ပြီးတော့ ခဏလေးဆို ပြန်ကျတဲ့ အသံ ကြားရတယ်။”

အခုလ ဇူလိုင် ၂၅ ရက်က ကွတ်ခိုင်လွယ်ဆမ်ဆစ်တောင်ခြေမှာ စစ်‌ကောင်စီနဲ့ KIA တို့ တိုက်ပွဲ ဖြစ်ပွားခဲ့ပြီး လက်နက်ကြီ ကျစထိမှန်လို့ အသက် ၃ နှစ်အရွယ် ကလေးငယ် တယောက် သေဆုံးခဲ့တဲ့အပြင် ဇူလိုင် ၂၆ ရက်မှာလည်း  ကွတ်ခိုင်ဂေါက်ကွင်း အနီး စစ်‌ကောင်စီတပ်နဲ့ KIA တို့ တိုက်ပွဲ ဖြစ်ပွားခဲ့ပါသေးတယ်။