ရှမ်းပြည်နယ် ဖယ်ခုံမြို့နယ်မှာ စစ်ကောင်စီတပ်နဲ့ တိုက်ပွဲအပြင်းအထန်ဖြစ်ပွားနေတာကြောင့် ဖယ်ခုံ PDF တပ်ရင်း ၂၊ တပ်ခွဲ ၃ အတွက် အရေးပေါ်ဆေးဝါးနဲ့ လက်နက်ကျည် အကူအညီ လိုအပ်နေတယ်လို့ တပ်ရင်းတာဝန်ရှိသူတဦးက ပြောပါတယ်။

ဖယ်ခုံမြို့နယ် အင်းလေးအရှေ့ဘက်ခြမ်းရှိ ဆောင်ကန်းလမ်းဆုံကို စစ်ကောင်စီက ထိန်းချုပ်ဖို့ အင်အားအလွန်အကျွံ စစ်ကြောင်းထိုး စစ်ဆင်လာတဲ့ပေါ် ဖယ်ခုံ PDF တပ်ရင်း ၂ အပါအဝင် ပူးပေါင်းတပ်ဖွဲ့က ခုခံကာကွယ်ရင်း တိုက်ပွဲပြင်းထန်နေတာလို့ ဆိုပါတယ်။

ဖယ်ခုံ PDF တပ်ရင်း ၂ တာဝန်ခံတဦးက "ခုတိုက်ပွဲအခြေအနေကတော့ ရှေ့ရက်တွေက လက်နက်ကြီး တွေ ၁၂၀ မမတွေ၊ ၁၀၅ မမတွေတရစပ်ပစ်ခတ်လို့ ရွာသားတွေလည်းထိခိုက်တယ်၊ ရဲဘော် တွေလည်းထိခိုက်တယ်” လို့ ပြောပါတယ်။

၅ ရက်ဆက်တိုက်တိုက်ပွဲပြင်းထန်ခဲ့ပြီး စစ်ကောင်စီဘက်က အများအပြား ထိခိုက်သေဆုံး ဒဏ်ရာရရှိမှုရှိသလို ပူးပေါင်းတပ်ဖွဲ့ ဘက်ကလည်း ထိခိုက်သေဆုံးမှု ရှိပါတယ်။

"ဆေးဝါးတွေကတော့ လက်ရှိအထိမပြည့်စုံဘူး၊ အဆင်ပြေအောင် ကြိုးစားစီစဉ်နေကြတယ်ဆိုတာထက် ပိုပြောလို့မရသေးပါဘူး။ ဒဏ်ရာရတဲ့သူတွေကိုတော့ ဆရာဝန်တွေ ကိုယ်တိုင်ကြပ်မတ်ကုသနိုင်အောင်စီစဉ်ထားပါတယ်။ စစ်ကောင်စီက အင်အားအများပြားနဲ့ ထိုးစစ်ဆင်လာတာမို့ တန်ပြန်ထောက်လှမ်းရေးအတွက်နဲ့ တိုက်ခိုက်ရေးတွက် drone လည်း လိုအပ်သလို ကျည်လည်းလိုအပ်နေတယ်။” ဖယ်ခုံ PDF တပ်ရင်း ၂ တာဝန်ခံက ပြောပါတယ်။

လက်ရှိခုခံစစ်မှာ စစ်ကောင်စီက လက်နက်ကြီး အလွန်အကျွံအသုံးပြုပြီး တိုက်ခိုက်လာတာကြောင့် ပူးပေါင်းတပ်ဖွဲ့အပြင် ပြည်သူတွေကိုလည်းထိခိုက် သေဆုံးမှုတွေ ရှိနေတယ်လို့ ဆိုပါတယ်။

"ကျနော်တို့ တပ်ရင်း၂ တပ်ခွဲ ၃ ဟာ အမြဲရွပ်ရွပ်ချွံချွှံတိုက်ပွဲဝင်ခဲ့တဲ့တပ်ရင်းဖြစ်တယ်၊ မိုးဗြဲတိုက်ပွဲမှာ လဲ ရဲဘော်ဆုံးရှုံးခဲ့ပြီးပြီ အခုလဲ ရဲဘော်တစ်ယောက်ထပ်ဆုံးရှုံးခဲ့ရပါတယ်၊ ခြေလက်အင်္ဂါဆုံးရှုံးခဲ့ရသူလဲ အများပြားရှိပါတယ် အလှူရှင်တွေလိုအပ်ပါတယ်။"

လွိုင်ကော် မိုးဗြဲတလျှောက်အရေးပါတဲ့ ဆောင်ကန်းလမ်းဆုံကို သိမ်းပိုက် အထိုင်ချနိုင်ရေးအတွက် စစ်ကောင်စီက စစ်အင်အား အလွန်ကျွံသုံးပြီး  ကျေးရွာတွေပါမချန် လက်နက်ကြီးနဲ့ တရစပ်ပစ်ခတ်တာနဲ့ စစ်ကြောင်း သုံးလေးကြောင်းဖြန့်ပြီး ထိုးစစ် ဆင်နေတာတွေလည်း ပြုလုပ်နေတယ်လို့ သိရပါတယ်။

စစ်ကောင်စီက အဲဒီဒေသမှာရှိတဲ့ ဘာသာရေးခေါင်းဆောင်တွေ ကယန်းပြည်သစ်ပါတီတွေကို စည်းရုံးပြီး စစ်ရှောင်တွေ ပြန်လာခိုင်းတဲ့အတွက်လည်း စစ်ရေးလုပ်ရှားမှုတွေ ခက်ခဲလာတယ်လို့ သိရပါတယ်။

မြန်မာနိုင်ငံဘက်မှာ တိုက်ပွဲပြင်းထန်ပြီး လက်နက်တွေနဲ့ ပြင်းပြင်းထန်ထန် ပစ်ခတ်နေတာကြောင့် အောက်တိုဘာ ၂၂ ရက်နေ့က နယ်မြေချင်းထိစပ်နေတဲ့ ဘင်္ဂလားဒေ့ရှ်နိုင်ငံ ဘန်ဒါဘန်ခရိုင်ထဲက ရာနဲ့ချီတဲ့ ဒေသခံတွေ နေရပ်စွန့်ခွာပြီး ဘေးလွတ်ရာကိုရှောင်ပြေးနေခဲ့ကြရတယ်လို့ TRT World သတင်းမှာ ဖော်ပြပါတယ် ။

ပြင်းပြင်းထန်ထန် ပစ်ခတ်မှုတွေဟာ ဘင်္ဂလားဒေ့ရှ်နယ်စပ်နဲ့ ကီလိုမီတာ ၂၀ ခန့်အကွာက မြန်မာနယ်နိမိတ်အတွင်းမှာ ဖြစ်ပွားခဲ့တာဖြစ်ပါတယ်။

မြန်မာဘက်အခြမ်းမှာ ပြင်းပြင်းထန်ထန် ပစ်ခတ်နေကြတာကြောင့် စနေနေ့ညမှာပဲ နယ်စပ်အနီးမှာ နေထိုင်ကြတဲ့ ဘင်္ဂလားဒေ့ရှ်ဘက်အခြမ်းက မိသားစု ၁၅၀ ကျော်ဟာ ဘေးလွတ်ရာကို ရွှေ့ပြောင်းခဲ့ကြရတယ်လို့ နိုင်ခွန်းချဟာရီစာဒါ နယ်မြေ ဥက္ကဋ္ဌ က ပြောပါတယ်။

စနေနေ့ မွန်းလွဲပိုင်းမှာ ပစ်ခတ်မှုတွေ စတင်ဖြစ်ပွားပြီးနောက် နယ်စပ်တစ်လျှောက်မှာနေထိုင်ကြတဲ့ မိသားစုတွေကို ဘေးလွတ်ရာရွှေ့ပြောင်းခိုင်းခဲ့ကြောင်း ဒေသခံ အရာရှိတစ်ယောက်က ပြောပါတယ်။

စနေနေ့ မွန်းလွဲပိုင်းကနေ ညနေအထိ ပစ်ခတ်မှုတွေရှိနေပြီး တနင်္ဂနွေ မနက်ပိုင်းမှာတော့ အခြေအနေတွေက တည်ငြိမ်နေခဲ့တယ်လို့လည်း သူကပြောပါတယ်။

ပြီးခဲ့တဲ့ နှစ်လအတွင်းမှာ မြန်မာစစ်တပ်က ပစ်ခတ်တဲ့ မော်တာကျည်ထိမှန်မှုတွေကြောင့် ဘင်္ဂလားဒေ့ရှ် ပိုင်နက်အတွင်းမှာ အနည်းဆုံးရိုဟင်ဂျာ နှစ်ဦးသေဆုံးခဲ့ရပြီး၊ ဘင်္ဂလားဒေ့ရှ်နိုင်ငံသားတွေ အပါအဝင် အခြား တစ်ဒါဇင်နီးပါး ဒဏ်ရာရရှိခဲ့ကြပါတယ်။

ဘင်္ဂလားဒေ့ရှ်ဘက်က အကြိမ်ကြိမ်သတိပေးတောင်းဆိုနေတဲ့ကြားက နယ်စပ်ဒေသမှာ ပိုမိုဆိုးရွားလာနေတဲ့ စစ်ရေးတင်းမာမှုတွေအပေါ်  မြန်မာစစ်ကောင်စီဘက်က လက်လျော့မယ့် လက္ခဏာတော့မပြသေးပါဘူး။

အဲဒီဒေသရဲ့ မြန်မာဘက်အခြမ်းက နယ်စပ်ဂိတ်တွေကို ရက္ခိုင့်တပ်တော်(အေအေ)က ဝင်ရောက်စီးနင်း သိမ်းယူထားခဲ့တာ ရက်အတော်ကြာပြီဖြစ်ပါတယ်။

Ref-TrtWorld