စစ်ကိုင်းတိုင်း၊ မုံရွာမြို့၊ စက်မှုဇုန်ထဲမှာရှိတဲ့ အမှတ် ၂ ရဲစခန်းကို အောက်တိုဘာ ၃၁ ရက်နေ့ နေ့လယ် ၁ နာရီက ပစ်ခတ်တိုက်ခိုက်ခဲ့တယ်လို့ Golden Eagle Force Monywa V2 က သတင်းထုတ်ပြန်ထားပါတယ်။
အမှတ် ၂ ရဲစခန်းကို ၄၀ မမနဲ့ နှစ်ဖက်ညှပ် ပစ်ခတ်ခဲ့တာဖြစ်ပြီး ပစ်ခတ်ခဲတဲ့ကျည်တွေ စခန်းအတွင်းကျရောက်ခဲ့တာကြောင့် ရဲ ၃ ဦး သေဆုံးတယ်လို့ ဆိုပါတယ်။
ရဲ ၃ ဦး သေဆုံးမှုနဲ့ ပတ်သက်ပြီး စစ်ကောင်စီဘက်က အတည်ပြုသတင်းထုတ်ပြန်ထားတာ မရှိသေးသလို့ ဒီဗွီဘီအနေနဲ့ သီးခြားအတည်မပြုနိုင်သေးပါဘူး။
ရဲစခန်း ပစ်ခတ်ခံရပြီးနောက် စစ်ကောင်စီတပ်က စက်မှုနဲ့အနီးတဝိုက်မှာ အိမ်စီးကားတွေနဲ့ ရှာဖွေနေတာကြောင့် ပြည်သူ့ကာကွယ်ရေးအဖွဲ့တွေ အလျင်အမြန်ဆုတ်ခွာခဲ့ကြပြီး အထိခိုက်မရှိခဲ့ဘူးလို့ ထုတ်ပြန်ထားပါတယ်။
အဆိုပါရဲစခန်းကိုGolden Eagle Force-Monywa-V2 နဲ့ Black Dragon Special Task Force၊Monywa Ranger Army တို့ ပူးပေါင်းတိုက်ခိုက်ခဲ့တာလို့ ဆိုပါတယ်။
အခုအပစ်ခတ်ခံရတဲ့ အမှတ် ၂ ရဲစခန်းကို ပြီးခဲ့တဲ့ အောက်တိုဘာ ၂၁ ရက်နေ့ကလည်း ဒေသခံပြည်သူ့ကာကွယ်ရေးအဖွဲ့တွေက ပစ်ခတ်ခဲ့သေးတယ်လို့ သိရပါတယ်။
မကွေးတိုင်း ပခုက္ကူမြို့နယ်က အနောက်ဘုန်းကန်ရွာအနီးမှာ တပ်စွဲထားတဲ့ စစ်ကောင်စီတပ်စခန်းကို မေ ၅ ရက်နေ့ ညနေ ၄ နာရီလောက်မှာ လက်နက်ကြီးနဲ့ တိုက်ခိုက်ခဲ့တယ်လို့ Earthquake People Defense Force ကဆိုပါတယ်။
“ဒီဟာလုပ်ဖို့ အစီစဥ်စွဲတာ ၃ ရက်လောက်ကြာပြီ၊ အရင် နှစ်ရက်ကလည်း သွားလုပ်တာ မအောင်မြင်ခဲ့တာပေါ့။ လက်နက်ချို့ယွင်းတာတွေ၊ လက်နက်ကြီး ၆၀-မမ မပေါက်တာတွေ ဘာတွေနဲ့ဆိုတော့ ဒီနေ့မှပေါက်တာ” လို့ Earthquake People's Defense Force အဖွဲ့ တာဝန်ရှိသူတဦးက ပြောပါတယ်။
အနောက်ဘုန်းကန်ရွာအနီးမှာ တပ်စွဲထားတဲ့ စစ်ကောင်စီတပ်စခန်းကို လက်နက်ကြီး ၆၀ မမနဲ့ အချက် ၂၀ ဝန်းကျင်လောက် ပစ်ခတ်ခဲ့တာကြောင့် စစ်ကောင်စီဘက်က ထိခိုက်ကျဆုံးမှုများနိုင်ပေမယ့် အတည်ပြုလို့ မရနိုင်သေးဘူးလို့ ဆိုပါတယ်။
စစ်ကောင်စီတပ်တွေက အနောက်ဘုန်းကန်ကျေးရွာအနီးမှာ တပ်စွဲထားတဲ့အပြင် ပျူစောထီးတွေကိုပါ သင်တန်းပေးနေတယ်ဆိုပြီး သတင်းရရှိတာကြောင့် မဟာမိတ်အဖွဲ့တွေနဲ့ ပူးပေါင်း ပစ်ခတ်တိုက်ခိုက်ခဲ့တာလို့ ဆိုပါတယ်။
အဆိုပါပစ်ခတ်မှုကို နံ့သာမြိုင်ပြောက်ကျားတပ်ဖွဲ့၊ တမာမြေပြောက်ကျားတပ်ဖွဲ့၊ Pakokku People's Defence Force နဲ့ Earthquake People's Defence Force မဟာမိတ်တပ်ဖွဲ့တို့က လုပ်ဆောင်ခဲ့တာလို့ ထုတ်ပြန်ထားပါတယ်။
