မြန်မာ့နွေဦးတော်လှန်ရေး အောင်မြင်ရေးအတွက် အမျိုးသားညီညွတ်ရေးအစိုးရ (NUG)၊ ကာကွယ်ရေးဝန်ကြီးဌာနနဲ့ ပြည်သူ့စစ်သားစစ်လက်နက်ထုတ်လုပ်ရေးအဖွဲ့ (PSPT) တို့ဟာ စစ်လက်နက်ပစ္စည်းထုတ်လုပ်ရေးနဲ့ ပြင်ဆင်ထောက်ပံ့ရေးလုပ်ငန်းတွေမှာ ပူးပေါင်းလုပ်ဆောင်နေကြတယ်လို့ သတင်းထုတ်ပြန်ပါတယ်။
NUG အစိုးရအနေနဲ့ အာဏာသိမ်းစစ်တပ်ကို ဆန့်ကျင်ကာ ပြည်သူ့ဘက် ရပ်တည်လာတဲ့ ပြည်သူ့စစ်သား၊ ရဲသားတွေနဲ့ စဥ်ဆက်မပြတ် လက်တွဲလုပ်ဆောင်နေသလို ပြည်သူ့ဘက်ရပ်တည်လာတဲ့ ပြည်သူ့စစ်သား၊ ရဲသားတွေထဲမှာလည်း NUG အစိုးရ ကာကွယ်ရေးဝန်ကြီးဌာနနဲ့ ပြည်သူ့ကာကွယ်ရေးတပ်မတော် (PDF) တို့မှာ တိုက်ခိုက်ရေး၊ လေ့ကျင့်ရေး၊ စစ်လက်နက်ပစ္စည်းတွေ ထုတ်လုပ်ရေးနဲ့ ပြည်သူ့ရင်ခွင်လုပ်ငန်းတွေမှာ ပါဝင်လုပ်ကိုင် ဆောင်ရွက်နေကြတယ်လို့ ဆိုပါတယ်။
ခုလို ပြည်သူ့ဘက် ရပ်တည်လာသူတွေကို NUG အစိုးရ ကာကွယ်ရေးဝန်ကြီးဌာနအနေနဲ့ ဆက်လက်ကြိုဆိုနေမှာဖြစ်ပြီး အကြောင်းအမျိုးမျိုးကြောင့် ပြည်သူနဲ့ မပူးပေါင်းနိုင်သေးသူတွေကိုလည်း အမာခံ သတင်းပေးပို့သူများ ဖိတ်ခေါ်ခြင်းဆိုင်ရာ ကြေညာချက် ထုတ်ပြန်ထားပြီး ဖြစ်တာကြောင့် ပြည်သူ့ဘက် အမြန်ဆုံးရပ်တည်ဖို့၊ ဒါမှမဟုတ် အမာခံသတင်းပေးတွေအဖြစ် ရပ်တည်ဖို့ တိုက်တွန်းထားပါတယ်။
NUG အစိုးရ ကာကွယ်ရေးဝန်ကြီးဌာန ထုတ်ပြန်ချက်ထဲမှာတော့ ပြည်သူ့စစ်သား စစ်လက်နက်ထုတ်လုပ်ရေးအဖွဲ့ (PSPT) အနေနဲ့ မြေပြင်တိုက်ပွဲတွေ ပြင်းထန်နေတဲ့ ဒေသတွေက လက်နက်ကိုင် ပြည်သူ့ကာကွယ်ရေး တပ်ရင်းတပ်ဖွဲ့တွေဆီ လက်နက်တွေ ထောက်ပံ့ကူညီပေးနိုင်ခဲ့တာတွေကို ဖော်ပြထားတာကို တွေ့ရပါတယ်။
လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပါတယ်။
PHOTO-NUG-MOD
ယူကရိန်းနိုင်ငံကို အနောက်နိုင်ငံတွေက ထောက်ပံ့ပေးတဲ့ လက်နက်အားလုံးဟာ ရုရှားတပ်ဖွဲ့တွေအတွက် တရားဝင်ပစ်မှတ်တွေဖြစ်ပြီး အဲဒီလက်နက်တွေဟာ ဖျက်ဆီးခံရမှာ ဒါမှမဟုတ် သိမ်းယူသွားမှာဖြစ်ကြောင်း ရုရှားနိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မာရီယာ ဇာခါရိုဗာက ဒီဇင်ဘာ ၁၅ ရက်က အပတ်စဉ် သတင်းစာရှင်းလင်းပွဲမှာ ပြောလိုက်ပါတယ်။
ဝါရှင်တန်ဟာ ယူကရိန်းကို ပက်ထရီယော့ ဒုံးကျည်ကာကွယ်ရေးစနစ်ကို ပေးပို့မယ့် အစီအစဉ်ကို အပြီးသတ်နေပြီဖြစ်ပြီး ဆုံးဖြတ်ချက်ကို အခုသီတင်းပတ်မှာ မကြာခင် ထုတ်ပြန်ကြေညာနိုင်လိမ့်မယ်လို့ အမေရိကန် အရာရှိသုံးဦးက ဒီဇင်ဘာ ၁၃ ရက်မှာ ရိုက်တာကို ပြောကြားခဲ့ပါတယ်။
ပက်ထရီယော့ ဒုံးကျည်ကာကွယ်ရေးစနစ်ဟာ လေယာဉ်တွေ၊ ခရုဇ်ဒုံးကျည်တွေနဲ့ ပဲ့ထိန်းဒုံးကျည်တွေ အပါအဝင် အမေရိကန်ရဲ့ အဆင့်မြင့်ဆုံး လေကြောင်းရန်ကာကွယ်ရေးစနစ်တွေထဲက တခုလို့ သတ်မှတ်ခံထားရတာပါ။
ဒီလက်နက်လွှဲပြောင်းမှု အဆိုပြုချက်ဟာ ရန်စတဲ့ကိစ္စဖြစ်ပြီး မှန်းဆလို့မရတဲ့ အကျိုးဆက်တွေကို ဖြစ်ပေါ်စေနိုင်တယ်လို့ ဝါရှင်တန်ရှိ ရုရှားသံရုံးက ပြောကြားထားပါတယ်။
“ဝါရှင်တန်ဟာ တခြား နေတိုးနိုင်ငံတွေရဲ့ လက်နက်တွေကို ယူကရိန်းရဲ့စစ်ရေးကိစ္စထဲကို ပိုပြီး များများထည့်ဝင်ဖို့ တောင်းဆိုပြီး လှည့်ဖျားနေတယ်” လို့လည်း ဆိုပါတယ်။
ကိယက်ဗ်အစိုးရကို ၁၀ လတာကာလအတွင်း နေတိုးရဲ့ လက်နက်ထောက်ပံ့မှုဟာ ဒေါ်လာ ၄၀ ဘီလီယံကျော်ရှိကြောင်း နိုဝင်ဘာ ၃၀ ရက်က ဘူခါရက်စ်မှာပြုလုပ်တဲ့ နိုင်ငံခြားရေးဝန်ကြီးများ အစည်းအဝေးမှာ အမေရိကန်နိုင်ငံခြားရေးဝန်ကြီး အန်တိုနီ ဘလင်ကန်က ပြောကြားတာဖြစ်ပြီး ဒါဟာ ၂၀၂၂ ခုနှစ် ပြင်သစ်ရဲ့ စစ်ရေးအသုံးစရိတ်နဲ့ နှိုင်းယှဉ်နိုင်တယ်လို့လည်း မာရီယာ ဇာခါရိုဗာက ပြောပါတယ်။
