ထိုင်းနိုင်ငံ ချင်းမိုင်အပါအဝင် ခရိုင် ၃ ခုမှာ အခြေပြုပြီး အွန်လိုင်းကနေပါ လက်နက်ရောင်းချနေတဲ့ လက်နက်မှောင်ခိုဂိုဏ်းကို ဖမ်းဆီးနှိမ်နင်းခဲ့ကြောင်း ထိုင်းအမျိုးသားရဲတပ်ဖွဲ့က ဒီဇင်ဘာ ၁၅ ရက်က ပြုလုပ်တဲ့ သတင်းစာရှင်းပွဲမှာ ပြောပါတယ်။

အဆိုပါဂိုဏ်းဟာ ဝက်ဘ်ဆိုက်ဖွင့်ထားပြီး လက်နက်တွေကို ဘယ်သူမဆို အလွယ်တကူ ဝယ်ယူနိုင်အောင် ရောင်းချပေးနေကြောင်း ပြည်သူတွေက သတင်းပေးလာတဲ့အတွက် အချိန်အတိုင်းအတာတခုထိ စုံစမ်းထောက်လှမ်းပြီး ချင်းမိုင်၊ ဆူရင်းနဲ့ ချွန်းပူးရီး စတဲ့ ခရိုင် ၃ ခုမှာ ဒီဇင်ဘာ ၁၃ ရက်နဲ့ ၁၄ ရက် နှစ်ရက်အတွင်း သွားရောက်ဖမ်းဆီးခဲ့တယ်လို့ ထိုင်းနိုင်ငံ နည်းပညာဆိုင်ရာ ရာဇဝတ်မှုနှိမ်နင်းရေးရဲတပ်ဖွဲ့ ရဲမှူးကြီး လွဲအင်းဖိုင်းရို့တ်က ပြောပါတယ်။

ပထမနေရာမှာ ချင်းမိုင်ခရိုင် ဆန်ကမ်ဖဲင်းမြို့ တွန့်ပေါင်းရပ်ကွက်ထဲက Shooter Tactical CNX အမည်ရှိ သေနတ်နဲ့ပတ်သက်တဲ့ အပိုပစ္စည်းအရောင်းဆိုင်တဆိုင်ဖြစ်ကြောင်း၊ အဲဒီနေရာကနေ တရားခံ အမျိုးသား ၁ ဦး၊ အမျိုးသမီး ၁ ဦးနဲ့ တရားမဝင်လက်နက် ပြောင်းရှည် ၂၄ လက်၊ ပစ္စတို ၆ လက်၊ ပေါင်း ၃၀၊ ဆိုက်စုံကျည်ဆန် ၁၆,၅၇၈ တောင့်၊ ဘဏ်ငွေစာရင်း ၁၈ အုပ်၊ ငွေသား ဘတ် ၃ သန်းကျော်၊ ကား ၅ စီးနဲ့ ဆိုင်ကယ် ၄ စီးတို့ကို သိမ်းဆည်းခဲ့တယ်လို့ ဆိုပါတယ်။

ဒုတိယမှာ ဆူရင်းခရိုင် ဆူရင်းမြို့ပေါ်ရပ်ကွက်နေ တရားခံ ၁ ဦးကို သက်သေခံ ကျည်ဆန် ၁၆,၃၀၀ တောင့်၊ တယ်လီဖုန်း ၁ လုံး၊ ဘဏ်စာအုပ် ၃ အုပ်တို့နဲ့အတူ ဖမ်းဆီးခဲ့ပါတယ်။

တတိယနေရာကတော့ ချွန်းပူးရီးခရိုင် ဘန်ဘိင်မြို့မှာဖြစ်ပြီး တရားခံ ၄ ဦး (အမျိုးသား ၃ ဦး၊ အမျိုးသမီး ၁ ဦး) တို့ကို သေနတ်အလက် ၃၀၊ ကျည်ဆန် ၃၂,၀၀၀ တောင့်၊ ကား ၅ စီးနဲ့ ပိုင်ဆိုင်မှု ဘတ်သန်းပေါင်း ၅၀ ကျော်ကို သိမ်းဆည်းခဲ့တယ်လို့ ဆိုပါတယ်။

အဆိုပါအဖွဲ့ဟာ တွစ်တာမှာ LOS SANTOS ဆိုတဲ့အမည်နဲ့ အကောင့်ဖွင့်ထားသလို LINE ထဲမှာလည်း TEXAS GUN အကောင့်အမည်နဲ့ လက်နက်ရောင်းဝယ်နေတယ်လို့ ဆိုပါတယ်။

ဝန်ကြီးချုပ် ပရယုဒ်ကျန်အိုးချားရဲ့ ညွှန်ကြားချက်နဲ့ အွန်လိုင်းပေါ်က ဒုစရိုက်မျိုးစုံကို နှိမ်နင်းနေရာမှာ ဒီဇင်ဘာ ၆ ရက်မှ ၁၀ ရက်အတွင်း အွန်လိုင်းမှ လိမ်လည်မှုပေါင်း ၆၁၆ မှု၊ တရားခံ ၅၉၅ ဦး၊ အခြားလိမ်လည်မှုပေါင်း ၄၁၀ မှု တရားခံ ၃၈၄ ဦး၊ ငွေစုငွေချေးလိမ်လည်မှု ၂၈ မှု တရားခံ ၂၂ ဦး၊ ကွန်ပြူတာဥပဒေနဲ့ ညိစွန်းမှု ၈၇၃ မှု တရားခံ ၈၃၀ ဦး စုစုပေါင်း အမှု ၁,၉၂၇ မှု တရားခံ ၁,၈၃၁ ဦးတို့ကို နှိမ်နင်းအရေးယူခဲ့တယ်လို့ ရဲမှူးကြီးက  ပြောသွားပါတယ်။

ဘယ်သူမဆို တရားမဝင် လက်နက်ရောင်းချတာ၊ နည်းပညာဆိုင်ရာ လိမ်လည်တာတွေ ခံရပါက ထိုင်းအမျိုးသားရဲတပ်ဖွဲ့ အရေးပေါ်ဖုန်းလိုင်း ၁၄၄ သို့မဟုတ် ၀၈၁ ၈၆၆၃၀၀ သို့ ၂၄ နာရီ ခေါ်ဆိုတိုင်တန်းနိုင်သလို ဝက်ဘ်ဆိုက် thaipoliceonline.com မှာလည်း တိုက်ရိုက် တိုင်စာပေးပို့နိုင်တယ်လို့ ဆိုပါတယ်။

ထိုင်းနိုင်ငံကနေ အိမ်နီးချင်းနိုင်ငံတွေကို တရားမဝင်ဖြန့်ဖြူးရောင်းချနေတဲ့ လက်နက်မှောင်ခိုဂိုဏ်းကို ဖမ်းဆီးရမိကြောင်း ထိုင်းအမျိုးသားရဲတပ်ဖွဲ့က ဇွန် ၁၃ ရက်  သတင်းစာရှင်းလင်းပွဲမှာ ပြောပါတယ်။ 

နိုင်းဘေးလ်ကျည်တစ်ထောင်လို့ အမည်တွင်တဲ့  အသက် ၃၂ နှစ်အရွယ် နိုင်းဒနုဖုန်းနဲ့ အပေါင်းအပါ တွေဟာ  အားကစားလုပ်ဖို့ အကြောင်းပြ သေနတ်ဆိုင်တွေကနေ ထောက်ခံစာအတု၊ အစစ်တွေနဲ့ ဝယ်ယူစုဆောင်းပြီး အိမ်နီးချင်းနိုင်ငံတွေကို တရားမဝင် လက်နက် တင်ပို့ရောင်းချနေကြောင်း စုံစမ်းသိရှိရတဲ့အတွက်  ဆက်စပ်နေတဲ့ ဘန်ကောက်၊ ချင်းမိုင်၊ ချွန်းပူးရီး၊ ကန်ကျနပူရီ၊ ဥဒွန်းဌာနီ စတဲ့ခရိုင် ၅ ခုက နေရာပေါင်း ၂၁ နေရာကို သွားရောက်စစ်ဆေးဖမ်းဆီးခဲ့တယ်လို့  ထိုင်းအမျိုးသားရဲတပ်ဖွဲ့ ရဲချုပ်ကြီးကြီး ဆူဝပ်ကျဲင့်ယွတ်ဆုခ်က ပြောပါတယ်။ 

အဆိုပါစစ်ဆေးမှုကနေ သေနတ်မျိုးစုံ အလက်ပေါင်း ၁၀၀ ကျော်နဲ့ ကျည်ဆန် ၁၀၀၀၀ ကျော် သိမ်းဆည်းရမိကြောင်း၊ ဒါ့အပြင် နိုင်းဘေးလ် ခေါ် နိုင်းဒနုဖန်းရဲ့ ချွန်းပူးရီးခရိုင်က တိုက်အိမ် ၂ လုံး၊ ကား ၆ စီး၊ လှေ ၅ စီးနဲ့ ဘဏ်စာအုပ်ပေါင်း ၂၈ အုပ်၊ သေနတ်ဝယ်ခွင့် ထောက်ခံစာ ၄၉၀ စောင်ကိုလည်း သိမ်းဆည်းခဲ့တယ်လို့ ဆိုပါတယ်။ 

အဆိုပါလက်နက်ကုန်ကူးမှုမှာ  ငွေရင်းနှီးစိုက်ထုတ်သူ၊ သေနတ်တွေစုဆောင်းဝယ်ယူသူ၊ သေနတ် ဝယ်နိုင်ဖို့ ဝယ်ခွင့်ရှိသူထံ ချဉ်းကပ်ကာ ထောက်ခံစာရယူတာ၊  ဌာနဆိုင်ရာဝန်ထမ်းထံမှ ထောက်ခံ စာရယူခြင်း၊ သေနတ်ရောင်းတဲ့ဆိုင်တွေနဲ့ ချိတ်ဆက်ဝယ်ယူတာ၊ အိမ်နီးချင်းနိုင်ငံသို့ တင်ပို့တာ စသဖြင့် အဆင့်လိုက် အဖွဲ့လိုက်ရှိပြီး သေနတ် တလက်ရောင်းရင် အမြတ်အစွန်း ဘတ်ငွေ ၃၀,၀၀၀ မှ ၅၀,၀၀၀ ရရှိကြောင်း၊ လုပ်ငန်းလည်ပတ်ငွေမှာ ဘတ်သန်းပေါင်း ၁၅၀ ခန့်ရှိတယ်လို့ ဆိုပါတယ်။ 

လောလောဆယ် နိုင်းဘေးလ်နဲ့တကွ အပေါင်းပါ ၁၆ ဦးကို ဖမ်းဆီးထိန်းသိမ်းထားပြီး အဲဒီထဲမှာ ထောက်ခံစာလက်မှတ်ထိုးပေးတဲ့ မြို့နယ်အုပ်ချုပ်ရေးမှူးအဆင့် ဝန်ထမ်း ၁ ဦး၊ အငြိမ်းစား ဝန်ထမ်း ၁ ဦး ပါဝင်ကြောင်း၊ နောက်ထပ်ပတ်သက်နေတဲ့ ဝန်ထမ်းတွေလည်း ဆက်လက်စုံစမ်း ဖော်ထုတ်သွားမယ်လို့  ရဲချုပ်ကြီးက ပြောသွားပါတယ်။

ဒီမတိုင်ခင် လွန်ခဲ့တဲ့ ၂ နှစ်က  တရားမဝင် လက်နက်ဖမ်းဆီးရရှိမှု နှစ်ကြိမ်ရှိခဲ့ပြီး အဆိုပါတရားခံတွေကို စစ်ဆေးမေးမြန်းရာမှာ နိုင်းဒနုဖုန်းထံမှ ဝယ်ယူကြောင်း ထုတ်ဖော်ပြောဆိုတဲ့အတွက် ထိုင်းအထူးစုံစမ်းစစ်ဆေးရေးရဲတပ်ဖွဲ့က အချိန်ယူစုံစမ်းပြီး အခုလို ဝင်ရောက်ဖမ်းဆီးလိုက်တာ ဖြစ်ပါတယ်။ 

ကိုးကား - komchadluek.net