ဖားကန့်မြို့ စစ်ကောင်စီဗျူဟာကုန်းပေါ်ကို ဒီကနေ့ ဖေဖော်ဝါရီ ၁၁ ရက်နေ့ နေ့လည် ၂ နာရီ ၄၅ မိနစ်လောက် စစ်ရဟတ်ယာဥ်တစီး ဆင်းသက်ခဲ့ပြီး လက်နက်သေတ္တာတွေ လာချသွားခဲ့တယ်လို့ ဒေသခံတွေက ပြောပါတယ်။
"ချသွားတာတော့ သေတ္တာလိုက်ချသွားတာ။ မကြာဘူး အရမ်းမြန်တယ်။ ၅ မိနစ် တစင်းပဲ လာချသွားတာ။ ဗျူဟာကုန်းမှာ အဲလိုလာချသွားပြီးရင်တော့ နေ့တိုင်းနီးပါး လက်နက်ကြီးသံတွေ ကြားရတော့မှာ။ ဒါမှ မဟုတ်ရင်လည်း တိုက်ပွဲတွေဖြစ်ရင် လက်နက်ကြီးတွေနဲ့ ကူပစ်ပေးနေတာ။"
စစ်ကောင်စီက စစ်ရဟတ်ယာဥ်နဲ့ လက်နက်တွေ လာချပြီးနောက်ပိုင်းမှာ ဖားကန့်မြို့ ဗျူဟာကုန်းပေါ်ကနေ လက်နက်ကြီးနဲ့ ပစ်ခတ်သံတွေကို နေ့တိုင်းနီးပါးကြားရတယ်လို့ ဆိုပါတယ်။
လတ်တလောမှာလည်း ဖားကန့်မြို့ပေါ်မှာ စစ်ကောင်စီဘက်က လုံခြုံရေးတင်းကြပ်ထားသလို အချိန်မရွေး နေရာမရွေး စစ်ဆေးမေးမြန်းတာတွေ လုပ်ဆောင်နေတယ်လို့ ဒေသခံတွေက ပြောပါတယ်။
ဇန်နဝါရီ ၂၂ ရက်နေ့က ဖားကန့် လုံးခင်းရပ်ကွက်မှာ ကင်းပုန်းဝပ်နေတဲ့ စစ်ကောင်စီ စစ်သားတွေက လူငယ် ၂ ဦးကို ပစ်သတ်ခဲ့သလို အကြောင်းမဲ့ ဖမ်းဆီးခံလိုက်ရတဲ့ ပြည်သူ ၈၀ ကျော်ထက်မနည်းရှိလာပြီလို့ ဖားကန့် တော်လှန်ရေးအင်အားစုတွေက ပြောပါတယ်။
စစ်ကောင်စီတပ်တွေက အခုလို လုံခြုံရေးတင်းကြပ်လာတာက ဖားကန့်မြို့နယ်အတွင်းမှာရှိတဲ့ စစ်ကောင်စီတပ်စခန်းတွေ မကြာခဏ တိုက်ခိုက်ခံရတာကြောင့် ဖြစ်နိုင်တယ်လို့လည်း ဒေသခံတွေက သုံးသပ်ပါတယ်။
စစ်ကောင်စီက တဖက်သတ်အပစ်ရပ်တယ်ဆိုပြီး ၂၀၂၃ ခုနှစ် တနှစ်တာ အပစ်ရပ်ကြေညာခဲ့ပေမယ့် နိုင်ငံအနှံ့မှာ စစ်ကြောင်းထိုးတာတွေကတော့ ဆက်လက်လုပ်ဆောင်နေသလို ကချင်လွတ်မြောက်ရေးတပ်မတော် (KIA) နဲ့ ထိတွေ့ တိုက်ပွဲတွေ မကြာခဏဖြစ်ပွားနေတာပါ။
ကချင်ပြည်နယ်၊ ဖားကန့်မြို့ စစ်ကောင်စီတပ် ဗျူဟာကုန်းပေါ်ကို စစ်ရဟတ်ယာဥ် ၂ စီး လာရောက်ခဲ့ပြီး လက်နက်သေတ္တာတွေ လာချသွားခဲ့တယ်လို့ ဒေသခံတဦးက ပြောပါတယ်။
ဒီဇင်ဘာ ၁ ရက် နေ့လယ်ပိုင်းမှာ တကြိမ်နဲ့ ညနေ ၄ နာရီလောက်မှာတကြိမ် စစ်ရဟတ်ယာဥ်နဲ့ လက်နက်သေတ္တာတွေ ချသွားခဲ့တယ်လို့ ဆိုပါတယ်။
“ဒီနေ့ နေ့လယ်ပိုင်းမှာ တကြိမ်၊ ညနေ ၄ နာရီလောက်မှာ တကြိမ် လက်နက်သေတ္တာတွေ ချသွားတာ။ အရင်တုန်းကလည်း အဲ့လို လာပြီးသွားရင် ဗျူဟာကုန်းပေါ်ကနေ လက်နက်ကြီးနဲ့ ပစ်သံတွေ ကြားရပြီ။ လတိုင်းလိုလိုတော့ အဲ့လို ရဟတ်ယာဥ်နဲ့ လာချသွားတာပဲ။”
ပြီးခဲ့တဲ့ နိုဝင်ဘာလကုန်ပိုင်းကစပြီး ဖားကန့်မြို့နယ်က စစ်ကောင်စီဗျူဟာကုန်းတွေကနေ လက်နက်ကြီးနဲ့ ပစ်ခတ်သံ နေ့တိုင်းလိုလိုကြားရတယ်လို့ ဒေသခံတွေက ပြောပါတယ်။
နိုဝင်ဘာ ၂၃ ရက်နေ့ကလည်း ကောင်ဆန်ကျေးရွာအနီး သောင်းကော့ဘက်ကို စစ်ကောင်စီက လက်နက်ကြီးနဲ့ ပစ်ခတ်ခဲ့တာကြောင့် နေအိမ် ၄ လုံး မီးလောင်ပျက်စီးခဲ့ပြီး အရပ်သား ၁ ဦး သေဆုံးကာ ၁၀ ဦး ထိခိုက်ဒဏ်ရာ ရရှိခဲ့တယ်လို့ ဆိုပါတယ်။
ဖားကန့်ဒေသမှာ ပြီးခဲ့တဲ့ အောက်တိုဘာ ၂၃ ရက်နေ့က KIA တပ်မဟာ ၉ နယ်မြေ အနန့်ပါမှာ စစ်ကောင်စီက လေယာဥ်နဲ့ ဗုံးကြဲတိုက်ခိုက်ခဲ့ပြီးနောက် စစ်ကောင်စီဘက်က ဖားကန့်နယ်မြေအတွင်း စစ်အင်အားတွေဖြည့်တင်းပြီး စစ်ရေးလှုပ်ရှားတာနဲ့ လုံခြုံရေးတင်းကြပ်တာတွေ ဆက်တိုက် လုပ်ဆောင်လာသလို ကချင်လွတ်မြောက်ရေးတပ်မတော် (KIA) နဲ့ တိုက်ပွဲတွေ မကြာခဏဖြစ်ပွားနေတာပါ။
ပြီးခဲ့တဲ့ နိုဝင်ဘာလအတွင်း စစ်ကောင်စီတပ်တွေနဲ့ ကချင်လွတ်မြောက်ရေးတပ်မတော် (KIA) တို့ တိုက်ပွဲအတွင်း စစ်ကောင်စီတပ်သား ၅၀ လောက် သေဆုံးခဲ့ပြီး ၁၀၀ ထက်မနည်း ထိခိုက်ဒဏ်ရာ ရရှိခဲ့တယ်လို့ KIA သတင်းအရင်းအမြစ်က သိရပါတယ်။
