မကွေးတိုင်း မြိုင်မြို့နယ် လက်ယက်မကျေးရွာကို မီးရှို့ပြီး တပ်ပြန်ဆုတ်လာတဲ့ စစ်ကောင်စီတပ်သားတွေကို မေ ၁၅ ရက်နေ့ ညနေပိုင်းမှာ ဒေသကာကွယ်ရေးမဟာမိတ်တပ်တွေ ပူးပေါင်းတိုက်ခိုက်ခဲ့တယ်လို့ မြိုင် PDF က ပြောပါတယ်။

“လက်ယက်မ (စံပြ)ရွာက အိမ်ခြေ ၇၀၀ ကျော်လောက်ကို မီးရှို့ပြီး တပ်ပြန်ဆုတ်လာတဲ့ စစ်ကောင်စီတပ်သားတွေကို မနေ့က ညနေ ၄ နာရီလောက်မှာ ကြည့်ကန်ရွာမြောက်ဘက်က တောတိုက်နားမှာ ကျနော်တို့ ဒေသကာကွယ်ရေးတပ်ပေါင်းစုက လက်နက်ကြီး လက်နက်ငယ်တွေနဲ့ ဝိုင်းဝန်းတိုက်ခိုက်ခဲ့တာဗျ။ စစ်(...) တွေဘက်က ၇ ယောက်လောက်သေပြီး အများအပြား ဒဏ်ရာရရှိသွားတယ်” လို့ မြိုင် PDF တပ်ရင်း ၂ ရဲ့ ဒုတပ်ရင်းမှူး ဗိုလ် Cross က ဒီဗွီဘီကို ပြောပါတယ်။

ညီနောင်မဟာမိတ်တပ်ဖွဲ့ဘက်က ရဲဘော်တွေ အထိခိုက် အကျဆုံးမရှိဘဲ ဆုတ်ခွာနိုင်ခဲ့ပြီး အပြစ်မဲ့ပြည်သူတယောက်တော့ စစ်ကောင်စီတပ်က ပစ်ခတ်တဲ့ကျည်ထိမှန်ပြီး ဒဏ်ရာအနည်းငယ်ရရှိခဲ့တယ်လို့ ဆိုပါတယ်။

စစ်ကောင်စီတပ်သားတွေဟာ မနေ့ကထိ ပိတောက်ကန်ရွာမှာ စခန်းချပြီး နေအိမ်တလုံးကို မီးရှို့ ဖျက်ဆီးခဲ့တယ်လို့ ဗိုလ် Crossက ပြောပါတယ်။

အဲဒီတိုက်ပွဲကို ကျေးလက်ဒေသပြောက်ကျားတပ်ဖွဲ့ မြိုင်၊ MVRF၊ မြိုင် PDF၊ ဂဠုန်ပြောက်ကျားတပ်ဖွဲ့၊ PUGF၊ ကိုခိုင်လေးလက်နက်ကြီးတပ်ဖွဲ့၊ တမာမြေပြောက်ကျားတပ်ဖွဲ့၊ PKU N PDF၊ YSO N PDF၊ YSO S PDF၊EPDF နဲ့ နဂါးနီတော်လှန်ရေးတပ်ဖွဲ့တို့ ပူးပေါင်းတိုက်ခိုက်ခဲ့ကြတာလို့ ဆိုပါတယ်။

တိုက်ပွဲ ဧရိယာအတွင်းမှာရှိတဲ့ ဒေသခံပြည်သူတွေကို ဘေးကင်းတဲနေရာကို ပို့ဆောင်ပေးပြီး နေထိုင်စားသောက်ဖို့ စီစဥ်ပေးထားကာ ဆေးဝါးနဲ့ စားနပ်ရိက္ခာတွေ အရေးပေါ်အကူအညီ လိုအပ်နေတယ်လို့ ပြောပါတယ်။

ကိုင်းတောမ-ကမ္မကားလမ်းပေါ်မှာလည်း မနေ့ မွန်းလွဲပိုင်းက စစ်ကောင်စီတပ်သားတွေနဲ့ ပျူစောထီးတွေ လိုက်ပါလာတဲ့ ရိက္ခာတင်ကားတစီးကို မြိုင် PDF နဲ့ ဂဠုန်ပြောက်ကျားတပ်ဖွဲ့ တို့ပူးပေါင်းပြီး စောင့်ကြိုတိုက်ခိုက်ခဲ့တယ်လို့ မြိုင် PDF တပ်ရင်း ၁ တပ်ရင်းမှူး ဗိုလ်လက်ယာ က ပြောပါတယ်။

“စစ်ကောင်စီတပ်သား ၁၀ ယောက်နဲ့ ပျူစောထီး ၃ ယောက် ကမ္မမြို့ဘက်ကနေ ကိုင်းတောမဘက်ကို လက်မယ်လို့ သတင်းကြိုရလို့ မနေ့က မွန်းလွဲ ၂ နာရီခွဲလောက်မှာ စောင့်ကြိုတိုက်ခိုက်ခဲ့တာဗျ။ ဝက်ပုတ်ကျေးရွာက ပျူစောထီးခေါင်းဆောင် ဝင်းငွေနဲ့ ပျူစောထီးအားလုံး သေဆုံးခဲ့တယ်ဗျ။ စစ်(...)ကတော့ တယောက်သ‌ေပြီး ၄ ယောက် ဒဏ်ရာရရှိသွားတယ်။” 

နှစ်ဖက်တိုက်ပွဲတွေနဲ့ ပတ်သက်လို စစ်ကောင်စီဘက်က ၁၁ ယောက်လောက်သေဆုံးကာ အများအပြားဒဏ်ရာရရှိခဲ့တယ်လို့ မြိုင် PDFရဲ့ တာဝန်ရှိသူတွေက ပြောဆိုထားပေးမယ့် ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်တာ မတွေ့ရသေးပါဘူး။

မြိုင်မြို့နယ်ထဲမှာ စစ်ကောင်စီတပ်သားတွေ လက်နက်​ကြီးလက်နက်ငယ်တွေနဲ့ ပစ်ခတ်ကာ စစ်ကြောင်းထိုးပြီး ကျေးရွာတွေကို မီးရှို့ဖျက်ဆီးနေတာကြောင့် ဒေသခံပြည်သူ ၂၀၀၀၀ ကျော် ဘေးလွတ်ရာနေရာတွေကို ထွက်ပြေးတိမ်းရှောင်နေကြရပါတယ်။

မကွေးတိုင်းဒေသကြီးမှာ စစ်တပ်အာဏာသိမ်းတဲ့ ဖေဖော်ဝါရီ ၁ ရက်နေ့ကနေ ဧပြီ ၃၀ ရက်နေ့အထိ စစ်ကောင်စီတပ်သားတွေမီးရှို့ဖျက်ဆီးလို့ အိမ်ခြေ ၂၁၃၁ လုံး မီးလောင် ဆုံးရှုံးခဲ့တယ်လို Data For Myanmar က မေလ ၁ ရက်နေ့ရက်စွဲနဲ့ ထုတ်ပြန်ထားပါတယ်။

မကွေးတိုင်းဒေသကြီး လက်ယက်မကျေးရွာမှာ ဇန်နဝါရီ ၁၆ ရက်နေ့မနက်ပိုင်းမှာ စစ်ကောင်စီတပ်တွေက မီးရှို့သတ်ဖြတ်သွားတဲ့ အလောင်း ၃ လောင်းတွေ့ရှိပြီး ဒေသခံ အမျိုးသား ၇၀ လောက်လည်း ဖမ်းဆီးနှိပ်စက်ခံခဲ့ရတယ်လို့ စစ်ကောင်စီလက်ထဲကနေ ပြန်လည်လွတ်မြောက်လာသူတွေဆီကနေ သိရပါတယ်။

လက်ယက်မကျေးရွာ သင်္ချိုင်းနားမှာ ဒီကနေ့မနက်ပိုင်းက မီးရှို့ သတ်ဖြတ်ခံထားရတဲ့ အလောင်း ၃ လောင်းတွေ့ရှိခဲ့ပြီး ဘယ်သူတွေဆိုတာကို အတိအကျ မသိရသေးလို့ စုံစမ်းနေတယ်လို့ စစ်ကောင်စီလက်ထဲက ပြန်လည်လွတ်မြောက်လာတဲ့ ဒေသခံတစ်ယောက်က ပြောပါတယ်။

စစ်ကောင်စီတပ်တွေဟာ လက်ယက်မကျေးရွာကို အင်အား ၂၀၀ လောက်နဲ့ စစ်​ကြောင်းထိုးပြီး ဒေသခံပြည်သူ ၃၀၀ လောက်ကို ဓားစာခံအဖြစ် ဖမ်းဆီးက အမျိုးသား ၇၀ လောက်ကို နည်းမျိုးစုံနဲ့ နှိပ်စက်ခဲ့ကြတယ်လို့ ဆိုပါတယ်။

“သူတို့စစ်ကြောင်းထိုးလာတော့ ရွာကနေ ထွက်ပြေးသူကပြေး၊ ဘုန်းကြီးကျောင်းထဲမှာ ပုန်းသူကပုန်းနဲ့ပေါ့ဗျာ။ ဘုန်းကြီးကျောင်းက ၇ ကျောင်းရှိတာတိုတော့ ပြည်သူတွေကို ဖမ်းဆီးပြီး တစ်ကျောင်းတည်း ပေါင်းလိုက်ကြတယ်။ အဲဒီအဖမ်းခံရတဲ့ထဲကမှ အသက် ၅၀ ကျော် သက်ကြီးပိုင်းတွေကို သပ်သပ်၊ အမျိုးသမီးနဲ့ ကလေးတွေကို သက်သက်စီ ခွဲထုတ်ပြီးတော့ အသက် ၁၈ နှစ်ကနေ ၅၀ အထိ အမျိုးသား ၇ဝ လောက်ကို နှိပ်စက်ခဲ့ကြတာ။ အသက်ပြည့်တဲ့ အမျိုးသားတွေကို ရိုက်နှက်နှိပ်စက်တယ်၊ ဆေးလိပ်မီးတွေနဲ့ ထိုးတယ်၊ စစ်ဖိနပ်တွေနဲ့ ကန်တယ်။ PDF တွေ ဘယ်မှာရှိလဲ အမည်စာရင်းတွေနဲ့ မေးတယ်။ သူတို့ စိတ်မကြည်ရင် မကြည်သလို နည်းအမျိုးမျိုးနဲ့ နှိပ်စက်တယ်။ ကျနော်တို့ရဲ့ မျက်နှာတွေကိုလည်း နှာခေါင်းစည်းတွေနဲ့ အုပ်ထားတယ်” လို့ ပြန်လွတ်လာသူတဦးက ပြောပါတယ်။

ဘုန်းကြီးတွေက ဝင်ရောက်တားဆီးမှ နှိပ်စက်တာတွေ လျော့သွားပြီး PDF အဖွဲ့တွေ ထပ်ပြီးတော့ လှုပ်ရှားပါက စစ်ကြောင်းထပ်ထိုးပြီး ရွာလည်း ဒီထက်ပိုနာမယ်လို့ ခြိမ်းခြောက်သွားကြောင်း ဆိုပါတယ်။

“အဲဒီအဖမ်းခံရတဲ့ထဲက ၅ ယောက်ကိုတော့ စစ်ကောင်စီတပ်တွေက ခေါ်သွားကြတယ်ဗျ။ ဘယ်သူတွေဆိုတာကိုတော့ မသိရသေးဘူး။ ကျနော်တို့လည်း လွတ်လွတ်ချင်း ဘေးလွတ်ရာကို ထွက်ပြေးလာကြတာ” လို့ ပြန်လာလာသူက ပြောပါတယ်။

ဒီနောက် စစ်ကောင်စီတပ်တွေဟာ လက်ယက်မရွာကနေ တပ်ဆုတ်သွားပြီးနောက် မနေ့က ပေါင်းတည်ကျေးရွာမှာ ညအိပ်စခန်းချကာ ပေါင်းတည်ရွာတောင်ဘက်က ကျေးရွာတွေကို ဆက်ထွက်သွားတယ်လို့ စုံစမ်းသိရတယ်လို့ ဆိုပါတယ်။

စစ်ကောင်စီတပ်တွေဟာ မြိုင်မြို့နယ်ထဲက ကျေးရွာအများအပြားကို ဝင်မွှေပြီး နေအိမ်တွေ၊ တဲတွေနဲ့ ဆိုင်ကယ်တွေကို မီးရှို့ဖျက်ဆီးတာတွေ၊ ပြည်သူတွေရဲ့ ငွေကြေးနဲ့ ပစ္စည်းတွေကို ခိုးယူတာတွေနဲ့ အိမ်မွေးတိရစ္ဆာန်တွေကိုလည်း သတ်ဖြတ်စားသောက်သွားကြတယ်လို့ ပြောပါတယ်။

မြိုင်မြို့နယ်ကို စစ်ကောင်စီတပ်တွေဟာ အင်အားအလွန်အကျွံသုံးပြီး စစ်ကြောင်း ၅ ကြောင်းလောက်နဲ့ ထိုးစစ်ဆင်နေတာကြောင့် ကျေးရွာ ၁၀ ရွာကျော်လောက်က ဒေသခံပြည်သူ ၂၀၀၀၀ နီးပါးလောက် ဘေးလွတ်ရာ ထွက်ပြေးတိမ်းရှောင်နေကြရတယ်လို့ သိရပါတယ်။