ရန်ကုန်တိုင်း၊ လမ်းမတော်မြို့နယ်မှာ နေထိုင်တဲ့ အသက် ၂၁ အရွယ် အမျိုးသားတဦးနဲ့ အသက် ၂၄ နှစ်အရွယ် အမျိုးသမီးတဦးကို မတ်လ ၈ ရက် ညနေပိုင်းက ဆေးခြောက်အမှုန့်‌တွေ၊ ဆေးခြောက်ကွတ်ကီးမုန့်တွေနဲ့အတူ ဖမ်းဆီးရမိခဲ့တယ်လို့ စစ်ကောင်စီ ပြန်ကြားရေးက ထုတ်ပြန်ပါတယ်။

စစ်ကောင်စီရဲတပ်ဖွဲ့က လမ်းမတော်မြို့နယ်၊ ၇ ရပ်ကွက်၊ ၁၆ လမ်းက ၈ လွှာ တိုက်ခန်းတခုမှာ နေထိုင်တဲ့ ၂၄ နှစ်အရွယ် အမျိုးသမီးဖြစ်သူကို အရင် ဖမ်းဆီးခဲ့တာပါ။

အဲဒီညနေပိုင်းမှာပဲ လမ်းမတော်မြို့နယ်၊ ၁၀ ရပ်ကွက်၊ ဗဟိုစည်အိမ်ရာဝန်းက ၃ လွှာတိုက်ခန်းတခုမှာ အသက် ၂၁ နှစ်အရွယ် အမျိုးသားကို ဆေးခြောက်အမှုန့် ၁၀၉ ဂရမ်၊ ဆေးခြောက်ထည့်သွင်းထားတဲ့ ကွတ်ကီးမုန့် အခု ၅၀ နဲ့ ဆေးဂေါက်တံ ၁ ခုတို့နဲ့အတူ ထပ်မံဖမ်းမိခဲ့တယ်လို့ သိရပါတယ်။

ရဲတပ်ဖွဲ့နဲ့ နီးစပ်သူတဦးက “ဖေ့စ်ဘွတ်ခ်မှာ ဆေးခြောက်ပါတဲ့ ကွတ်ကီးရောင်းတဲ့ နှစ်ယောက် အဖမ်းခံရတာပါ။ ပစ္စည်းတွေမိတာက ဗဟိုစည်မှာ များတယ်၊ ကောင်လေးဆီမှာမိတာ။ သူတို့ဘက်ကပြောတာတော့ မြဝတီကနေသွင်းတယ် ပြောတယ်။ ဒီဘက်ကတော့ စစ်နေတုန်းပဲ။ သူတို့ page မှာ မုန့်လုပ်ပြီးသားတွေက တခု ၄,၅၀၀၊ ၂ ခု အနည်းဆုံးယူမှ ပို့ပေးတယ်လို့ ရေးထားတာ တွေ့တယ်။ ဂရမ် ၁၀၀ လောက်ပဲတွေ့တော့ ရောင်းချမှုမရှိရင် လက်ဝယ်တွေ့ရှိမှုနဲ့ပဲ စွဲလို့ရတယ်။ ကွတ်ကီးထဲ ထည့်ရောင်းတာကျတော့ ဖြန့်ဖြူးသလို ဖြစ်နေပြန်တယ်”လို့ ပြောပါတယ်။

ဆေးခြောက်ကို အိမ်နီးချင်း ထိုင်းနိုင်ငံမှာ ဥပဒေပြုပြီး တရားဝင် စိုက်ပျိုး၊ အသုံးပြုခွင့် ပေးနေပေမဲ့ မြန်မာနိုင်ငံမှာတော့ မူးယစ်ဆေးဝါး အမျိုးအစားထဲ ထည့်သွင်းထားတယ်လို့ သိရပါတယ်။

ကွတ်ကီးမုန့်တွေ လူကြိုက်များစေဖို့နဲ့ လူငယ်လူရွယ်၊ ကျောင်းသား ကျောင်းသူတွေ မူးယစ်ဆေးဝါး သုံးစွဲလာစေဖို့ ရည်ရွယ်ပြီး ရက်စက်ယုတ်မာတဲ့အကြံနဲ့ ကွတ်ကီးမုန့်တွေအတွင်း ဆေးခြောက်တွေကို ထည့်သွင်းပြုလုပ်ကာ ရောင်းချခဲ့တာကို ဖော်ထုတ်သိရှိရတယ်လို့ စစ်ကောင်စီ ပြန်ကြားရေးသတင်းမှာ ထည့်သွင်းဖော်ပြပါတယ်။

CCDAC Myanmar ရဲ့ ထုတ်ပြန်ချက်အရ ရန်ကုန်မှာ ၂၀၂၃ ဇန်နဝါရီ ၁ ရက်ကနေ မတ်လ ၁၀ ရက်နေ့အထိ မူးယစ်ဆေးဝါး လက်‌ဝယ်တွေ့ရှိမှုနဲ့ ဖြန့်ဖြူးမှုအတွက် ဖမ်းဆီးခံထားရသူ ၁၄ ယောက်ရှိနေပြီး ဆေးခြောက်သုံးစွဲဖြန့်ဖြူးမှုအတွက် ဖမ်းဆီးခံရသူ ၄ ဦးအထိ ရှိနေတယ်လို့ သိရပါတယ်။

စစ်တပ်အာဏာသိမ်းပြီးနောက်  ရန်ကုန် အပါအဝင် နိုင်ငံတဝန်း မူးယစ်ဆေးဝါး ရောင်းဝယ် ဖောက်ကားမှုတွေ ပိုများလာပြီး မူးယစ်ဆေးဝါးတွေကို ဈေးနှုန်းချိုသာစွာ အလွယ်တကူ ဝယ်ယူရရှိနေတဲ့အတွက် ကျောင်းသားလူငယ်တွေအကြားမှာ သုံးစွဲသူတွေလည်း ပိုမိုများပြား လာနေတာဖြစ်ပါတယ်။

ရန်ကုန်တိုင်း၊ လမ်းမတော်မြို့နယ်မှာ နေထိုင်တဲ့ အမှတ် ၂ ရပ်ကွက်၊ အုပ်ချုပ်ရေးမှူးဟောင်း ဦးတင်အောင်လွင်နဲ့ အမှတ် ၉ ရပ်ကွက်၊ လက်ရှိအုပ်ချုပ်ရေးမှူး ကိုနိုင်အောင်(ခ) ကိုရှည်ကြီးတို့ အပါအဝင် ပြည်သူ ၉ ယောက်ကို ဧပြီ ၁၁ ရက် ည ၁၁ နာရီဝန်းလောက်မှာ စစ်တပ်က အကြမ်းဖက်ဖမ်းဆီးသွားတယ်လို့  ဒေသခံက  ပြောပါတယ်။ 

အဖမ်းခံရတဲ့ ပြည်သူတွေထဲမှာ အန်အယ်လ်ဒီ မြို့နယ်လူငယ်လုပ်ငန်းအဖွဲ့ဝင်တယောက်၊ အမှတ် ၄ ရပ်ကွက် ၉ လမ်းမှာ  နေထိုင်သူ ၃ ယောက်နဲ့ ပရဟိတသမား ၃ ယောက်တို့ ပါဝင်ပါတယ်။ 

လမ်းမတော်မြို့နယ်မှာ နေထိုင်သူတယောက်က "ဘာအကြောင်းပြချက်မှမရှိဘဲ မတရား ဖမ်းဆီးသွားတာပါ။ သူတို့လာဖမ်းတဲ့အချိန်မှာ ရပ်ကွက်ကို မီးဖြတ်ထားပြီး အဖမ်းခံရတဲ့သူတွေကို ခေါင်းစွပ်တွေစွပ်သွားတယ်။ လက်နောက်ပြန်လက်ထိတ်ခတ်သွားတယ်။ ဘယ်ကို ဖမ်းခေါ်သွားတယ်ဆိုတာတော့ မသိရသေးဘူး" လို့ပြောပါတယ်။

လမ်းမတော်မြို့နယ်၊ လုံခြုံရေးနဲ့အုပ်ချုပ်ရေးတာဝန်ခံ ဗိုလ်မှူးကုဋေဖြိုးအောင်ကို ဧပြီ ၁၀ ရက် ညနေပိုင်းက “နန်းထိုက်အောင်” စစ်ဆင်ရေးအရ မြို့ပြပြောက်ကျားအဖွဲ့တွေက ပစ်ခတ်ရှင်းလင်းခဲ့ပြီး နောက်တရက်မှာ ပစ်ခတ်မှုနဲ့ဘာမှမဆိုင်တဲ့  ရပ်ကွက်တွင်းနေတဲ့ အရပ်သားတွေကို   ဖမ်းဆီးခဲ့တာဖြစ်ပတယ်။

ဗိုလ်မှူးကုဋေဖြိုးအောင်ဟာ ကြည်း-၄၂၉၃၇ က ဖြစ်ပြီးအရင်က ရန်ကုန်တိုင်းလွှတ်တော်ကိုယ်စားလှယ်အဖြစ် တာဝန်ထမ်းဆောင်ခဲ့ဖူးသူ ဖြစ်ပါတယ်။ သူဟာ  DSA အပတ်စဉ် ၄၈ ဆင်း  ကွန်ပျူတာအထူးပြုနဲ့ ဘွဲ့ရရှိထားသူဖြစ်ပြီး ရုရှားမှာ ME ဘွဲ့ရယူခဲ့သူလည်း ဖြစ်ပါတယ်။