ကချင်ပြည်နယ်၊ မြစ်ကြီးနားမြို့မှာ နိုဝင်ဘာ ၈ ရက် မနက်ပိုင်းက စစ်ကောင်စီတပ်ဖွဲ့ဝင်တွေက မော်တော်ယာဉ်လိုင်စင် စစ်ဆေးနေပြီး ဆိုင်ကယ်တွေနဲ့ ကားတွေကိုလည်း ဖမ်းဆီးထားတယ်လို့ ဒေသခံတွေထံက သိရပါတယ်။

မြစ်ကြီးနားမြို့ ဗလမင်းထင်တံတားနဲ့ မန်ခိန်ရပ်ကွက် ပြည်နယ်လွှတ်တော်ရုံးအနီးမှာ စစ်ကောင်စီလက်နက်ကိုင်တပ်ဖွဲ့ဝင်တွေ အလုံးအရင်းနဲ့  မော်တော်ယာဉ်တွေကို ဖမ်းဆီးနေတာလို့ ဒေသခံတွေဆီက သိရပါတယ်။

မြစ်ကြီးနားမြို့ခံ တဦးက “မနက် ၁၁ နာရီခွဲလောက်က  ဝိုင်းမော်ဘက်ကနေ မြစ်ကြီးနား ပြန်လာတော့ ဗလမင်းထင်တံတားထိပ်မှာ ယာဉ်တွေ စစ်နေတယ်။ ကားတွေ ဆိုင်ကယ်တွေကို လိုင်စင်စစ်ပြီး မပြည့်စုံရင်ဖမ်းတယ်။ အဖမ်းခံထားရတာတွေလည်း အများကြီး။ အဲဒီကနေ လွှတ်တော်ရုံးရှေ့ရောက်တော့ နောက်တဖွဲ့ကလည်း ထပ်ဖမ်းနေတယ်။ ကားတွေကို လွှတ်တော်ရုံးထဲ မောင်းသွင်းခိုင်းတယ်။ ကျနော့်ဆိုင်ကယ်ကတော့ အားလုံး ပြည့်စုံလို့ အဖမ်းမခံရဘူး” လို့ ပြောပါတယ်။

စစ်ကောင်စီတပ်ဖွဲ့ဝင် စစ်တပ်၊ ရဲနဲ့ ယာဉ်ထိန်းရဲအင်အား  ၂၅ ယောက်လောက်က ဖြတ်သန်းသွားလာတဲ့  မော်တော်ကားတွေကို  နောက်ဖုံးနဲ့  လိုင်စင်တွေ စစ်ဆေးကာ မော်တော်ယာဉ်အစီး ၆၀ ထက်မနည်းကို  ဖမ်းဆီးခဲ့ပါတယ်။

ဗလမင်းထင်တံတားအနီး နေထိုင်သူတစ်ဦးက “ဖမ်းထားတဲ့ ကားတွေ အတော်များတယ် တန်းစီနေတာပဲ။ ကချင်ပြည်နယ်မှာ ကားအတော်များများက  without  (လိုင်စင်မဲ့)တွေ များတယ်။ အဲဒီလို မဖမ်းတာအတော့်ကို ကြာပြီ။ အဲ့ဘက်  ဖြတ်လာတဲ့ ကားတွေ၊ ဆိုင်ကယ်တွေကို စစ်ပြီးဖမ်းနေတာ။ အစီး ၆၀ နဲ့ ၇၀ လောက် ရှိတယ်။ ဖမ်းပြီး ဘာလုပ်မလဲတော့ မသိဘူး” လို့ ပြောပါတယ်။

ဗလမင်းထင်တံတား စစ်ဆေးရေးဂိတ်မှာ ၂၀၂၁ ခုနှစ် ဇူလိုင်လပိုင်းက ဝိုင်းမော်မြို့ကနေ မောင်းနှင်လာတဲ့ မော်တော်ယာဉ်တစ်စီးကို  စစ်ကောင်စီတပ်ဖွဲ့ဝင်တွေက သေနတ်နဲ့ ပစ်ခတ်ခဲ့လို့ ဂိတ်အနီးဈေးရောင်းနေသူအမျိုးသမီး တယောက်  ကျည်ထိမှန်ခဲ့ပါသေးတယ်။

Photo -CJ

ကချင်ပြည်နယ်၊ မြစ်ကြီးနားမြို့မှာ ဖမ်းဆီးသိမ်းယူထားတဲ့ လိုင်စင်မဲ့ ကားတွေနဲ့ ဆိုင်ကယ်တွေကို ဖြတ်ပိုင်းမပါဘဲ ငွေနဲ့ ပြန်ရွေးခိုင်းနေတယ်လို့ မြို့ခံတစ်ဦးက ပြောပါတယ်။

အောက်တိုဘာလ ၁ ရက်နေ့ကစပြီး ယာဉ်ထိန်းရဲတွေမှာ မိန်းလမ်းမီးပွိုင့်ဆုံတဲ့ နေရာတွေမှာ ဖမ်းဆီးထားတဲ့ ကားနဲ့ ဆိုင်ကယ်တွေကို ငွေနဲ့ ပြန်ရွေးခိုင်းနေတာလို့ ဒေသခံတဦးက ပြောပါတယ်။

“ကားလိုင်စင်၊ ဆိုင်ကယ်လိုင်စင် ရှီ၊ မရှိ အရင်စစ်တယ်။ လိုင်စင်မရှိဘူးဆိုရင် သော့ကို အရင်သိမ်းပြီး ပိုက်ဆံပဲ တောင်းပါတယ်။ လိုင်စင်မဲ့ကားတစ်စီးဆို ၃ သိန်း၊ ဆိုင်ကယ်ဆိုရင် ၁ သိန်းခွဲ တောင်းပါတယ်။ ဘာဖြတ်ပိုင်းမှလည်း မပေးပါဘူး။ ကိုဗစ်ကပ်ဘေးကြောင့် အလုပ်အကိုင် ရှားပါးပြီး ပြည်သူတွေ ဒုက္ခရောက်နေတဲ့အချိန် မညှာမတာ ကိုယ်ကျိုးအတွက် ပိုက်ဆံရှာနေကြတာ၊ သူတို့မို့လို့ လုပ်ရက်တယ်” လို့ ပြောပါတယ်။

မြစ်ကြီးနားမြို့မှာ ယာဉ်မောင်းသူတွေ စည်းကမ်းမလိုက်နာတဲ့အတွက် ယာဉ်တိုက်မှုတွေလည်း မကြာခဏ ဖြစ်ပေါ်နေတယ်လို့ သိရပါတယ်။